2 Korint 10

Pal ba karnika brisa apastil baku

1Bamna yang, Pal, man nani ra mamkabisna Kraist kupia swapnika bara latwanka ba dukiara. Upla nani aisisa, yang na man nani tilamra sna ba ra lika bawikira pali sna, kuna laihura sna ba ra man nani mampara aisasara sna. 2Baku bamna, mamkabisna man nani mai kaikaia wamna ba ra, taibi ai muni banhpara man nani wina tila nani wan wîna lâka kat diara dauki ba mapara bûi aisaia; bahmuna uplika nani ba mawan kat aisaia ridi sni. 3Âu rait yang nani na upla, sakuna naha tasba uplika nani aiklabi ba baku lika aiklabras. 4Kan yawan ra aiklabaia dukia ba lika naha tasba wina apia sa, sakuna Gâd wina karnika brisa, bara ba mita kan kahbaika pliska nani ba sip sa âpu daukaia, baku dahra kwakwahkra nani ra sin. 5Baku bamna, dahra kwakwahkra nani, wan mapara babura nani bara ai prautka lâka ra Gâd tânka kaikaia wina wan takaski nani ba sut, yang nani mita bataki banhwisna. Wan wîna sinska lâka ba sut Kraist mihta ra mangkisna, witinka ba bîla wali daukbia dukiara, 6bara ridi pali banhwisna bîla wali daukras nani ba sut klala yaia, man nani bîla wali dadaukra apia sma ba bîla wali dadaukra taki banhma ningkara.

7Man nani lika diara nani wan mawan kat ba baman kaikisma. Bamna ani uplika kasak lukisa witin ba Kraist dukia sa, baha ba ban ai kupia ra bri kaia sa, baha sim natka ra yang nani sut na sin Kraist dukia sna. 8Bamna baha karnika yang nani ra aikan ba purara kau munisna kaka, dîa dukiara swiri lukaia tânka ba âpu sa; kan Kraist mita naha karnika na yang nani ra aikan, man nani ba kau maikrika pâwaia spirit lâka mapa ra, man nani sauhki mai tikaia lika apia. 9Brin ai daukras wauhkitaya nani ni man nani ra sirang mai iki baku mai munaia. 10Upla nani wisa, yang wauhkitaya nani ba lika wirha bara karna pali sa, kuna wîni tara mapa ra wîk bara bîlas baku sturi sip pain aisaras sna. 11Bahamna baha aisi uplika ba kaikaia sa, yang nani laihura sna ba ra dîa ulbi banhwisna ba, man nani tilamra sna ba ra yang nani sin baha daukisna.

12Bamna brin wan daukras, ai wîna dukiara pain man aisi uplika nani ba wal, wan prakaia apia kaka, wan kulkaia. Witin nani diara bahki bahmuna baman daukisa, kulki kaikaia dukia ba ni kulki bamna bara upla wala ba witin nani wal praki kulki ba mita sin. 13Diara nani yang nani duki apia ba dukiara sip apia sna maiyunaia. Gâd mita sika anira yang nani wark takaia pliska ba ai marikisa, bamna witin mita wan marikan yang nani na man nani Korint nani kat waia. 14Baha mita sika, wan markka ba wina yang nani taki waras sna ba; baha ba baku kaia kan, yang nani na man nani ra pas balras katna kaka. Yang nani pas sika man nani ra balri Kraist sturka yamni ba wal. 15Upla wala nani wark daukan ba dukiara yang nani mita maiyunras, yang nani warkki ba wina tnaya ra tawi. Baha watlika ra, yang nani lika man nani tilamra kau wark daukaia brin ai daukisa, baku man nani kau kasak luki kaia, sakuna ban yang nani warkki daukaia brisna ba wina tnaya ra tawras. 16Baha ningkara yang nani sip kamna wark na kau tara daukaia, bara swaki sakan sturka yamni ba brih waia man nani wina kau laihura iwi uplika nani ra, kuna upla wala wark daukan ba dukiara maiyunras sna.

17Upla kumi aimayunan daukisa kaka, witin Dawan dukiara lika aimayunaia sa.#Jir 9.24. 18Kan pain kulkan uplika ba lika witin ai painka dukiara aisi ba apia, sakuna ani uplika ra Dawan mita pain kulki ba lika.

Currently Selected:

2 Korint 10: MSKTU

Highlight

Copy