2 Korint 9

Muihni nani dukiara lalah sakan ba

1Bamna kasak lukan lâka ra wan muihnika nani dukiara lalah sakan ba man nani ra yang ulbaia apia sna, 2kan man nani kupiam wilin ba tânka param kaikisna. Baha dukiara kupi aiska ni Macedonia tasbaya aiska ra aisisna, nahki man nani Acaya uplika nani ba, mani luan wina ridi pali banhwisma hilp munaia; bara Macedonia uplika nani aihkika prais man nani ra mai kaiki karna taki buan. 3Ban sakuna, naha wan muihni nani na blikisna, naha warkka ra man nani pain daukram dukiara aisari ba kunin kaia apia ba mata; wiaia kaka, ridi pali banhwi kama, yang aisari ba baku. 4Macedonia wina upla tila nani kra yang wal wabia ba ra, ban kra man nani kau ridi apia kama dukiara. Baha lika yang nani maipa ra uya swira lâka kabia, kan man nani kat wan kupia mangki luki ba mita, man nani mampa ra sin swira lâka kabia. 5Baha mita yang aitani lukri naha wan muihni nani ra makabaia man nani ra pas wih mai kaikaia, bara hilp mai munbia lalah yaia pramis munram ba sakaia. Baku lika man nani lalah sakram ba latwan lâka tânka baku ridi kabia, bara yang nani mita taibi mai munri tânka lika apia kabia.

6Naha diara nani na kupiam krauki bas: Ya wiria mangki ba, wiria krikan kabia; bara ya ailal mangki ba, ailal krikan kabia. 7Upla bani dîa yaia ai kupia ra lukan ba kat yaia sa; saura luki baku taiban lâka ni lika apia, kan Gâd mita latwan kaikisa liliakira ni yabi uplika ra. 8Gâd sip sa man nani ra dîa dîa brin mai dauki ba purkara kau maikaia, bara baha purkara man nani dukiam kau manis pali bri kama bara wark yamni sât sât daukaia dukiara sin aitani kat. 9Bamna Ulbanka ba wisa:

“Umpira nani ra mihta banhki pali yan,

bara ai kasakka lâka nani ba ban kabia.”#Law 112.9.

10Bara Gâd, witinka mita saumuk mangkaia bara plun saki piaia sin yabi ba,#Ais 55.10. witin sin namsla ra dîa dîa mangkaia luha sma ba maikbia, bara sip sa yaka pain pâwaia, bara mâ sin manis maikaia warkkam yamni ba dukiara. 11Baku mika man nani kupiam pihni lâka ra diara manis yaia bri kama. Bamna yang nani mihtik, baha lalah sakan blikuma ba dukiara wan muihni nani Gâd ra tingki wibia. 12Bamna naha hilpka wan muihni nani ra yabuya na lika, diara witin nani luha ba dukiara baman lika yawan yaras, sakuna witin nani mita sin Gâd ra tingki wibia baha tâka mita. 13Naha hilpka yabi banhma ba mita witin nani kaikbia man nani lika Kraist smalkanka bîla kat wali daukisma, bara baha mita witin nani bui Gâd nina mayunbia, kan man nani lika witin nani ra bara upla wala nani ra sin kupiam wilinkira hilp munram bamna. 14Bara witin nani sin man nani dukiamra ai pura sunbia, uya latwan sin mai kaikbia, Gâd latwanka lâka ba man nani bâk kaikan bamna. 15¡Gâd ra tingki wip, kan witin diara uya tara pali wankan sa, sip aisi tnata alkaia apia praiska kat!

Currently Selected:

2 Korint 9: MSKTU

Highlight

Copy