2 Korint 11

Pal bara apastil kuninkira nani ba wal

1¡Bamna pain lukaina, yang taniski lâka ba mapara man nani kupiam alki takaski bri kama kaka! Tâinka nahki bri kamna sin ban kupiam alki bri bas. 2Kan yang lika man nani tâmwan lawisna, tâmwan lawanka kum Gâd wina sa; kan man nani ba Kraist mihta ra mai mangkri, bamna brin ai daukisa man nani ba witin mawanra mai brih waia, sim tiara pain kumi waitna kumi kat wal marit taki ba baku kaia. 3Kuna si brisna piuta ai kuninka ba ni Iv ra kunin munan ba baku,#Bla St 3.1-5,13. swirka man nani ra sin kunin mai munbia, bara kupiam lukanka kumi ba bara sunu kaia lâka Kraist tani brisma ba sin swima. 4Kan man nani lika uya kupiam alki takaski brisma, baha nani Jisas sât wala dukiara smalki ba mapara, yang nani mita smalkatna Jisaska sât apia ba; bara spirit sât wala, yang nani smalkri Spiritka sât apia ba, man nani pain brisma, bara swaki sakan sturka yamni pat mai smalkri ba sâtka apia smalkanka sin alki bri banhwisma. 5Bamna yang na baha apastilka tara nani wi ba wal kau mâyara sna lika daira walras sna. 6Bamna yang na aisaia mapa ra bîlas kum baku sna kuna, yang sinski tânka ba lika baku apia sa; bara naha na yang nani mita man nani ra latan mamrikri piua bani diara sut ra.

7¿Yang na saura smalkri ki, swaki sakan lâka mana âpu kira man nani ra mai smalkri bamna, bara yang baku mâyara bawri ba man nani purara mai bukaia dukiara? 8Serts wala nani wina lalah dakbri bara yang ra aibapaia kan ba ban briri, baha ni man nani dukiam daukaia. 9Yang na man nani wal kapri piua diara luha pali katna; sakuna yang wirhiki upla ra yaras katna; kan Macedonia wina wan muihni nani balan ba mita dîa luha katna ba sut aikan.#Pil 4.15-18. Baku sika yang trai munri, man nani mampara karban wirha kum baku mai taibaia apia, bara ban sin baku daukaia trai muni kamna. 10Kasak daira walisna, Kraist kasakka tânka ba yang ra sa, bamna baha âuyapah lâka yang brisna ba Acaya tasbaya aiska ra upla âpu sa ai dakbaia. 11¿Dîa muni aisisna ki? ¿Dîa man nani ra want apia sna ba mita? ¡Man nani ra nahki prais want sna ba, Gâd lika pain kaikisa!

12Ban sakuna dîa daukisna ba lika ban dauki kamna, bara baku lika sip kamna, yang nani wal baku kaia pliki nani ba, kaina dakbaia bara witin nani aimayunra briaia apia. 13Kan baha nani ba apastil kuninkira nani, kunin mamunra nani sa, bara Kraist apastilka nani baku talia takisa. 14Naha na lika diara aihkakira apia sa, kan Sitan pali sin ingni insal baku takisa, 15bara baha mita Sitan dukia dadaukra nani ba sin diara pain dauki uplika talia takisa. Sakuna baha nani yua tnata ba alkbia ai warkka nani ba kat.

Pal apastil baku pât wahwanka ba

16Bamna kli wisna: upla kumi sin lukbiara, yang na tanis takisna; kuna baku ban lukbia kaka, ban ai swis tanis baku ban aisi kamna, bara baku mika yang sin sip kamna wiria pan aimayunaia. 17Naha yang mai wisna na lika Dawan adarka baku lika apia, sakuna tanis kumi baku praiska ra yang aimayunaia ba mapara. 18Bamna upla ailal bâra sa naha tasba tânka nani ba briaia luki aimayunisa, baku ba mita yang sin aimayunaia sna. 19Kan man nani lika sinskira pali sma ba mita, sinskas nani ra ban kupiam alki takaski banhwisma. 20Bamna man nani lika kupiam alki takaskisma ai dukia daukaia adar maiki nani ba mapara, aiska mai langki pi nani ba mapara, man nani dawankam taki nani ba, swiram paski nani ba mapara, mamwanra mai pruki nani ba mapara sin. 21Swiri uya brisni naha mai wiaia kuna, ¡kau yang nani uya pali swapni nani katna baha daukaia!

Sakuna upla bisniska dadimra nani ba baku, yang sin tilamku dimuna, upla tanis aisi baku sna kuna. 22¿Witin nani ba Hibru nani sa ki? Yang sin. ¿Witin nani ba Ebraham kiamka sa ki? Yang sin. 23¿Bara witin nani ba Kraist dukia dadaukra sa ki? Yang lika witin nani purkara sna, aisisna ba sin tanis baku aisisna kuna. Bamna yang lika kau wark takri witin nani ba wal,#Ap St 16.23. witin nani wal yang ra kau ai wipan, silak ra sin kau ai mangkan, bara prura pâtka sin manis wauhri. 24Ju nani mita aima matsip ai alkan; ai alkan bani ba 39 taim ai wipan.#Kli S 25.3. 25Rom nani mita aima yumhpa ai wipan,#Ap St 16.22. bara aima kum walpa ni ai saban,#Ap St 14.19. aima yumhpa ba duri tara ba rungwan, yang impaki katna, bara yu kum kwapi pruna kan, kakna kum bara tihmia kum kabu lalma ra katna. 26Yang impakanka ailal briri bara baha piua nani ra trabil manis wal sin prawri, awala nani ra, âimplikra nani wal#Ap St 9.23. trabil briri bara kuntrika uplika nani tilara,#Ap St 14.5. bara Ju apia nani tilara sin. Baku sin trabil nani wal prawri tawan nani ra, twi ra, kabu ra, bara ban sin muihki kuninkira nani tilara. 27Wark manis bri kapri bara trabil nani sin; aima ailal pain yapras kapri; plun kasak wauhri bara lî din sin ai dauki kan; aima ailal plun piras kapri; kauhla kasak wauhri, kwala âpu pâtka sin briri.

28Naha diara na purkara bara diara wala nani dukiara sin, yu bani yang purira trabil taki lukaia wirhika kum brisna, serts nani sut ba mata. 29Upla kum siknis takisa kaka, baha lika yang pali siknis takisna baku lukisna. Upla kum batakisa kaka, yang uya swiri ai daukisa bara kupi sin sauhkisna. 30Aimayunan lâka briaia sna kaka, swapniki wina diara nani taki ba dukiara lika maiyunamna. 31Gâd wan Dawan Jisas Kraist Aisika ba, witinka mayunan lâka ban kaia ra briaia aitani ba mita kaikisa, yang lika kunin aisaras sna. 32Damaskus ra kapri ba ra, baha wihtka kaia wisi king Aretas mita mangki swin ba mita, tawan getka nani bani ra suldiar nani mangki swin yang ra ai priskaia dukiara; 33kuna baha tawanka kutbanka windarka bâk upla mita baskit kum bilara ai mangki ai lahban, bara baku yang baha nani mihta wina swakri.#Ap St 9.23-25.

Currently Selected:

2 Korint 11: MSKTU

Highlight

Copy