1 Korint 15
15
Kraist pruan wina kli buan tânka ba
1Bara nanara, muihki nani, yang want sna swaki sakan sturka man nani ra mai smalkri ba, kupiam krauki kama. Baha smalkanka sika brisatma ba bara bahara bapi buisma. 2Naha sim smalkanka mita sika swaki mai sakan sa, man nani ba dîa mai smalkri ba kat daukaia lukisma kaka; bahki pali lika kasak luki banhras sma kaka.
3Pas tâura lika yang pali ra ai smalkan sturka ba sika man nani ra laki maikri ba. Mai smalkri sa Kraist ba wan saurka nani tâwan pruan, Ulbanka nani ra aisi ba baku;#Ais 53.5-12. 4bara witin ba bikan bara yu yumhpa ra kli buan baha sin Ulbanka nani ra aisi ba baku;#Law 16.8-10; Mt 12.40; Ap St 2.24-32. 5bara Pita ra latan takan,#Lk 24.34. bara baha ningkara apastil wala nani ra sin.#Mt 28.16-17; Mk 16.14; Lk 24.36; Jn 20.19. 6Baha ningkara wan muihni 500 pura witin ba sim piua ra kaikan, bara baha tila wina aihkika ba kau raya sa, bara tila nani lika pat pruan sa. 7Baha ningkara Jems ra latan takan, baha wina apastil sut ra.
8Sut ra latan takan ningkara, yang pali ra sin ai takan,#Ap St 9.3-6. yang na tuktan kum kau ai piua aimakras kan aisubi takan baku kapri sakuna. 9Kan yang na apastil sut tilara kau mâyara sna, bara apastil ai mâkaia sin aitani apia sni, yang pali sika Gâd sertska rausauhkri ba.#Ap St 8.3. 10Sakuna yang dîa sna ba lika, Gâd bui yang wal ai kupia pihni brin ba mita; bara yang wal ai kupia yamni lâka brin ba bahki ra tawras sa. Sakuna, yang sika apastil nani sut purkara kau wark takri ba; baha ba yang pali lika apia, sakuna Gâd sika ai kupia yamni lâka ni yang wal ba. 11Sakuna yang katna sapa, witin nani kan sapa lika diara apia; naha sika yang nani sut aisi smalkisna ba, bara naha kat sika man nani kasak lukram ba.
Pruan wina kli buaia tânka ba
12Sakuna yang nani smalkanki ba, Kraist pruan wina kli buan tânka sa kaka, ¿dîa kan man nani tilam wina tila nani wisa, pruan wina kli upla sip buras? 13Bamna pruan wina kli buaia tânka âpu sa kaka, Kraist sin kli buras sa; 14bara Kraist ba kli buras sa kaka, yang nani smalkisna sturka ba bahki sa, bara man nani kasak lukan lâka brisma ba sin bahki. 15Bara baku sa kaka, yang nani na Gâd witniska kuninkira nani sna, kan aisi banhri sa, Gâd mita Kraist ba bukan; bamna pruan nani kli buaia ba kunin sa kaka, kasak apia sa Gâd mita Kraist ba bukaia. 16Kan pruan nani ba kli buras sa kaka, Kraist pali sin kli buras kata. 17Bara Kraist ba kli buras kan kaka, kasak lukan lâka brisma ba bahki sa; bara man nani lika kau ban saurkam nani tilara sma. 18Bara baku sa kaka, Kraist ra kasak luki pruan nani ba sin tanis tiwan sa. 19Kraist bâk wan kainara diara briaia luki ba naha tasba ra raya iwi na dukiara baman sa kaka, yawan lika upla sut tila wina kau umpirkira nani ba sika.
20Sakuna kasak pali sa Kraist ba pruan nani tila wina kli bukan kata; pruan nani kli buaia daknika tila wina witin sika mâ tawahkia ba. 21Kan upla kum tâka mita prura ba tasba ra balan ba baku, upla kum tâka mita sin pruan nani kli buaia tânka ba balan. 22Adam daukan ba mita upla sut pruan ba, baku sin Kraist daukan ba mita upla sut raya kabia.#Ro 5.12-18. 23Sakuna kumi bani ai pliska mangkan ba kat: Kraist ba sut tâura; baha ningkara, Kraist balbia ba ra, witin uplika nani ba. 24Baha kat lika piua ba sut aimakbia; bara Kraist mita pura aimaki nani bani ba, pura karnika alki bani ba bara karnika sât wala alki nani ba sut pura lubia, king lâka ba Gâd Aisa mihta ra mangkbia. 25Kan Kraist ba king kaia sa, Gâd mita ai waihla nani sut ai mina nani munhtara mangkbia ba kat.#Law 110.1. 26Bara waihla lâs saura ba sauhki tikan kabia ba lika prura. 27Kan Gâd diara sut ba, Kraist mina nani mununhtara mangki swin sa.#Law 8.6. Sakuna Ulbanka ra wisa “diara sut” ba witin karnika mununhtara mangkan sa, bara latan sa Gâd lika baha tilara dimras, kan witin sika diara sut ai mina nani munhtara mangkan bamna. 28Bara diara sut Kraist munhtara yan bawan kabia ba ra, Kraist pali Gâd Luhpia ba sin, Gâd munhtara bawbia, witinka diara sut ai mina munhtara yan bawan ba, baku Gâd ba aiska pali king aimakbia upla nani sut purara.
29Bara tila nani sin bâra sa, pruan nani tâwan tahbi daukisa. ¿Dîa muni naha daukisa? Pruan nani ba kli buras sa kaka, ¿dîa kan baha nani tâwan tahbi daukisa? 30¿Bara dîa kan yang nani na, piua bani trabil ra sna? 31Yang na yu bani prura trabilka ra sna. Muihki nani, naha na kasak pali sa, sim man nani wan Dawan Jisas Kraist ra lalukra nani kapram, lilia sna ba wal baku. 32Upla lâka natka ra, Epesus ra yang daiwan kraskira nani aikuki aiklabri; ¿sakuna baha wal dîa win takri ki? Pruan nani kli buaia apia ba kasak kaka, yawan sip sa aisanka kum aisi ba baku wiaia: “Yawan plun pibia bara dibia, kan yauhka titan yawan prubia bamna.”#Ais 22.13.
33Man nani mamwahkpara. Aisanka kum aisi ba baku: “Wan pânika saura nani mita wan lâka pain nani ba sauhkisa.” 34Rayaka wapni bara kasak ba ra kli taws, bara kli sin saura daukpara, kan man nani tilam wina upla tila Gâd ra kakaira apia sa. Naha na aisisni, swiram daukaia dukiara.
Pruan nani nahki bubia ba
35Sakuna ban kra upla kum makabi walbia: “¿Pruan nani ba nahki buisa? ¿Wîna tara ba dîa sât kabia ki?” 36¡Sinskas! Man tasba ra saumuk mangkuma ba ra, baha ba pruisa dusa ba raya kaia mata. 37Mangkisma ba lika dusa pâwi takbia ba dukiara, plawar mâ kabia kra, apia kaka dus mâ sât wala sin pâwbia. 38Baha ningkara Gâd mita baha mâ ba, witin dîa sât wîna tara want ba kat yan pâwisa; mâ bani ra dîa wîna tara yabaia ba kat yabisa. 39Wîna tara sut ba sim sâtka apia sa; upla nani wîna tara ba sât aihka, daiwan nani wîna ba aihka, tnawira nani wîna ba aihka, inska nani wîna ba aihka. 40Baku sin kasbrika purara diara tara nani bâra sa, bara tasba dukia tara nani sin; sakuna kasbrika purara dukia nani ba prana aihka sa tasba ra nani ba wal. 41Lapta ingnika ba, kati ingnika wal sât aihka, bara slilma nani ingnika wal sim sât aihka; bara slilma nani tilara sin ingnika sât sât bâra sa.
42Pruan nani kli buaia ba sin baku sa. Sukwi dukia kum tasba ra bikisa, bara kli pruras dukia kum buisa. 43Upla mita saura kulki diara kum bikisa, bara pranakira dukia kum buisa. Diara kum swapni kan bikisa, bara diara karnakira kum buisa. 44Spirit âpu wîna tara kum bikisa, bara spirit bri wîna tara kum buisa. Spirit âpu wîna tara bâra sa kaka, spirit bri wîna tara sin bâra sa.
45Baku bamna, Ulbanka ra wisa: “Pas upla Adam ba, rayaka bri uplika kum kata”; sakuna Adam wala ba lika rayaka yabi spiritka sa. 46Sakuna spirit dukia ba tâura apia sa, spirit âpu ba mika; baha ningkara spirit dukia ba aula. 47Pas upla tasba yuya ni paskan kan ba tasba wina kan; waitna wala witinka ba kasbrika pura wina sa. 48Tasba uplika nani ba lika baha uplika tasba ni paskan kata ba baku sa;#Bla St 2.7. bara kasbrika pura uplika nani ba lika witinka kasbrika purara wina ba wal baku. 49Yawan nanara baha uplika tasba ni paskan kata wal wan talia ba baku, naika piua sin witinka kasbrika purara ba wina wal sin wan talia kabia. 50Muihki nani, naha tânka na mai win ai daukisa: wîna bara tala ni paskan ba, sip Gâd King aimaki ba lâka ra ai dukia briras; kan ani dukia aisawi ba sip ban kaia dukiara ai dukia briras sa.
51Sakuna dahra prakan kum na wals: Yawan sut lika prubia apia; sakuna sut aihka wan lakan kabia, 52wan nakra klipan kumi ra, trumpit binka ba walbia. Trumpit ba inbia, bara pruan nani ba bukan kabia, bara kli prubia apia; bamna yawan na aihka wan lakan kabia.#1 Tes 4.15-17. 53Kan yawan ra prui dukia ba, ban kaia pruras dukia ba ni ai kwalka baku dimaia sa; bara wan wîna tara prui na ban kaia ra pruras dukia ba ni ai kwalka baku dimaia sa. 54Bara yawan wan iwanka ra saurakira tânka ba, sip kli saura daukras lâka ba bribia, yawan wan wîna pruaia lâka bri ba sip kli pruras ra tawbia kaka, baku mita aimakan kabia Ulbanka ra dîa ulbi swin ba: “Prura ba sauhki tikan sa pura luanka ba mita.#Ais 25.8. 55Prura, ¿pura luaia karnika bri katma ba anira sa? Prura, ¿yang nani sairka paskaia karnika anira sa ki?”#Os 13.14. 56Saurka mita sika prura yawan ra wan sarka paskaia ai karnika yabi ba, bara lâ almuk mita saurka ra baha karnika yabisa. 57¡Sakuna Gâd ra tingki pali, witinka mita wan Dawan Jisas Kraist bâk pura luaia lâka wanki ba!
58Baku bamna, muihki laitwankira nani, ban bapi bara pirwras kira banhwi bas, piua bani Dawan warkka ba kau ban dauki bas; kan man nani kaikisma Dawan wal asla wark daukisma ba lika, bahki apia sa.
Currently Selected:
1 Korint 15: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua