1 Korint 14
14
Bîla nani ra aisaia ba
1Bamna man nani trai kaiki bas latwan lâka ba bri kaia, bara Gâd mita spirit sinska lâka nani maikbia dukiara sin karna pali pliki banhwi bas, kau pali witin wina sturi nani brih aisaia ba. 2Baha uplika bîla sât aihka aisi ba, upla ra lika aisaras kuna Gâd ra mika, kan upla kumi sin witin dîa aisi ba tânka briras. Witin aisi ba Spirit tânka ra, sakuna upla kumi sin baha tânka briras. 3Sakuna Gâd wina sturi nani brih aisi uplika ba, upla wala nani ra aisisa, witin nani ba spirit tânka mapa ra yaka pâwaia dukiara, tâ baikaia, bara maisa nihkaia sin. 4Bîla sât aihka aisi uplika ba, witin spirit tânka ra pâwisa, sakuna Gâd wina sturi nani brih aisi ba lika serts uplika nani ra spirit tânka yan pâwisa.
5Yang brin ai dauki kabia, man nani sut ba bîla sât aihka aisaia sinska nani bri kama; sakuna kau pali brin ai dauki kabia Gâd wina sturi nani brih aisaia sip katma kaka. Kan Gâd wina sturi nani brih aisaia ba kau pain sa, bîla sât aihka aisaia ba wal, ban kra bîla sât aihka nani ra aisi dukia nani ba, tânka param saki aisabia kaka lika, serts uplika nani ba spirit tânka mapa ra pâwbia dukiara. 6Baha mita, muihki nani, yang na man nani ra bal bîla sât aihka nani ra mai aisamna kaka, ¿dîa hilpka man nani brima ki? Hilp nani brima apia, ban kra Gâd mita diara kum yawan kaikbia dukiara mai aisuna kaka lika, diara tânka kaikan dahra kum mai wisna kaka, Gâd wina sturi kum brih aisuna kaka, wan kanra bîla kaikan lâka kum kabia.
7Miusik pulaia dukia nani, plut, apia kaka arp, binka sât nani daukisa kaka, binka aihka nani baku bamna, tânka briras sa, dîa tiunka kangbisa sapa. 8Bara war aiklabuya ba ra, sim trumpit binka ba latan kangbras sa kaka, suldiar kumi sin aiklabaia ridi takbia apia. 9Man nani ra sin baku takisa: twisam ni tânka briaia sip ba bîla nani aisaras sma kaka, ¿nahki upla walbia dîa aisisma sapa? ¡Man nani lika pâsa ra ni aisi kama! 10Latan sa naha tasba ra bîla sât ailal nâra sa, bara kasak pali sut ba ai tânka brisa. 11Sakuna upla kum ai bîla aisi ba yang tânka briras sna kaka, uplika ba mapa ra tringsar kum baku kamna, bara pana sin uplika ba, yang maipara witin tringsar baku kabia. 12Baha mita, man nani spirit tânka mapa ra sins nani brin pali mai dauki ba, kau pali trai kaiki briaia sma, baha nani serts uplika nani ra yan pâwi ba.
13Baku bamna, ani uplika bîla sât aihka aisi ba, Gâd ra makabaia sa baha bîla ra aisi ba tânka param sakaia karnika yabia. 14Kan yang bîla sât aihka kum ra puri sunisna kaka, kasak pali spiritki ba lika ai pura sunisa, sakuna kupi lukra ni lika baha wina hilp kumi sin briras. 15Ban kaka, ¿yang dîa daukaia sna ki? Spiritki ni puri sunaia sna, bara baha ni baman apia, sakuna kupi lukra ni sin. Spiritki ni lawana nani aiwanaia sna, bara baha ni baman apia, sakuna kupi lukra ni sin. 16Kan man ba spiritkam ni baman Gâd ra mayunra yabisma kaka, upla kum baha wali ba sip tingkikam pura sunra bara man wal asla takras, kan dîa aisisma ba witin tânka briras sa. 17Tingkikam pura sunra ba uya pain kaia sip sa, sakuna uplika wala ba spirit mapa ra sip pâwras. 18Yang bui Gâd ra tingki wisna, man nani sut purkamra bîla sât aihka aisaia sip sna ba dukiara; 19sakuna prias dauki ba ra kau want sna, upla tânka briaia sip kaka bîla matsip aisaia, upla wala nani ra sin smalkaia dukiara, bîla sât aihka ni bîla 10,000 aisaia watlika ra.
20Muihki nani, tuktan sirpi nani baku luki kapara. Saura daukaia mapa ra lika tuktan nani baku bas, sakuna lukankam mapa ra lika upla almuk nani baku bas. 21Lâ wauhkataya ra naku ulban sa: “Naha nisanka ra bîla aihka nani upla tringsar nani bîla bâk sin aisamna, sakuna baku kabia sin bîli walbia apia, Dawan baku wisa.”#Ais 28.11-12. 22Baku bamna, bîla sât aihka nani aisaia sinska ba lalukra apia nani mapa ra sain kum sa, lalukra nani mapa ra lika apia. Sakuna Gâd wina sturi nani brih aisaia sinska ba lalukra nani mapa ra sain kum sa, lukras nani ra lika apia. 23Bamna, serts uplika aiska ba asla takan ba ra, kumi bani bîla sât aihka aisisa kaka, bara lan âpu uplika tila nani lalukra apia nani bal dimuya kaka, ¿aisi banhbia apia ki man nani ba lamla saura takan sa? 24Sakuna sut Gâd wina sturi nani brih aisisma kaka, bara lalukra apia kum, apia kaka lan âpu uplika kum bal dimbia kaka, baha wina ai saurka ra witin kasak lukbia bara witin sin bapi bûi luki kaikbia, uplika sut dîa aisi ba walbia ba ra. 25Baku ai kupia dahra prakanka nani ba latan takbia, bara ai lula kriki Gâd ra ai pura suni mayunbia, bara aisabia kasak pali Gâd ba man nani tilamra sa.
Serts ra diara bani ba wapni lâka kat daukaia ba
26Bamna, muihki nani, tânka na naku sa: Asla takisma ba ra upla kum ba Lawana Nani Pura Sunra nani ba brisa, wala ba smalkanka nani, wala ba Gâd wina diara kum param saki marikan ba, wala ba bîla tringsar nani ra sturi yamni kum, bara wala lika aisi smalkan nani na tânka param aisaia. Âu, diara bani ra serts uplika nani ba, spirit mapa ra yaka pâwaia dukiara kaia sa. 27Upla kum bîla sât aihka nani ra aisisa kaka, upla wâl, apia kaka yumhpa baman aisaia sip sa, bara ba kat sin kumi kumi ra; bara aisi nani ba upla wala kum mita tânka param aisaia sa. 28Sakuna bahara upla kumi sin tânka ba param aisaia âpu sa kaka, kau pain kabia asla takanka ba ra upla kumi sin diara aisabia apia, kuna kumi bani ai kupia wal aisabia bara Gâd ra sin. 29Baku sin, Gâd wina sturi nani brih aisaia dukia kaka, upla wâl, apia kaka yumhpa aisabia, bara walka nani lika dîa aisi ba tânka luki pliki kabia. 30Sakuna Gâd mita upla wala kum iwi ba ra diara kum saki marikuya kaka, pas kata ba mahka ai bîla prakbia. 31Bamna baku man nani sut Gâd wina sturi nani brisma ba, sip sma kumi kumi ra aisaia, bara baku mika sut lan takbia bara ai tâ baiki banhbia. 32Gâd wina sturi nani brih aisi nani ba, ai spiritka nani ba yaka bawaia sa, 33kan Gâd ba kupia kumi lâka Gâdka sa, tanis turban lâka Gâdka lika apia.
Gâd uplika nani asla takanka sut ra dauki natka ba baku, 34mairin nani ba serts ra sâp kaia sa, naku daukaia lâ apia sa bamna. Kiama lihni nani kaia sa, Moses lâka wi ba kat. 35Witin nani diara kum kaikan daukisa kaka, utla ra ni ai maya waitna nani ra makabi walaia sa; kan mairin kum serts ra aisaia apia sa. 36Pain damra wali kaia sma Gâd bîla ba man nani wina tâ krikras, bara man nani baman sin baha ba briras sma.
37Upla kum Gâd wina sturi nani brih aisaia sinska aitani brisa lukisa, apia kaka Spirit mita ingnika yaban ai dara walisa kaka, aitani luki kulkaia sa, dîa man nani ra ulbisna na Dawan lâka bîla sa. 38Sakuna aitani luki kulkras kaka, pana sin witin ra aitani luki kulkaia apia sa.
39Baku bamna, muihki nani, trai kaiki bas Gâd wina sturi nani brih aisaia sip kaia, bara bîla sât aihka nani ra aisaia ba sin man nani takaski banhpara; 40sakuna diara sut ba painkira bara wapni kat sin dauki kama.
Currently Selected:
1 Korint 14: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua