Luke 4

Setani ko zolizolievo vo Jisu

(Matiu 4:1-11; Maka 1:12-13)

1Nio vo Jisu ta o vaitake Jodani sukuru kale azo ovai sukateni vo Tabu ala Auvana, ni voa Auvana ta o odievake vo ni o vati olake lealea kama zaekale. 2Ni sai nio vo Setani ta o zolizolievake vo ariku toni ṉaniu. Ni koa pado ama taku kale vota pulia quli o kuake, so sole vota ota matu luapake.

3Nio Setani ta eri kiolake vokasi, “Ṉota vo Baṉara vo meqora ṉa sole bazueka komia lado tu kota sailao ko elo,” kiolake.

4Nio Jisu ta o vati tiorikake vo, ni eri kiolake, “Ko Tabu ama Riki ta eri nio kikolani, ‘Maba ta pui o rovea saevo sailao kale ko kiada,’ kikola,” kiolake.

5Nio vo Setani ta o vati peatake vo kama pado okate ama sopu kale ni vota ova kasekake kiadama komia peuru ma peuru kale ama matumatuma peuru poso ni toutou poso kama simoto tiniama taku kale. 6Ni vo Setani ta eri va kiolake, “Aṉata a qatiṉou ṉo kiadama komi quli ko lekasa puo ko pizato, ni kiadama koko ṉaṉaidara. Ako koa kiadama quli ta lula aṉako ṉase topi ko katiziovi, sole aṉata a roveovou kativo ko kala maba vo aṉa a bitoevani. 7Sole ṉota ṉola loqunou ni ṉo ilusilou aṉa, nio koa kiadama quli ta ṉoko ko elou,” kiolake.

8Ni Jisu ta o vati tiorikake vo ni eri kiolake, “Ko Tabu ama Riki ta eri nio kikolani, ‘Ilusiva vo Baṉara vo ṉovo Lekasa ni va nabulupute vo o kiada!’ ” kiolake.

9Nio vo Setani ta o vati olake vo Jerusalema, ni vota o lojoevake vo Jisu Jelepade ko matu okate ama volei kale. Sai nio eri va kiolake, “Ṉota Baṉara vo Meqora ṉa sole ṉota joure koi kazo. 10Ako ko Tabu ama Riki kikolani ta, ‘Baṉara ta o bazuemou voko mateana poso tu seta ke ṉati vailou ṉo.’ 11Ni mata kota eri nio kikolani, ‘Seta ke zolaeṉou ṉo seko ṉase kale ni ṉoko kiti melai pui kopa taṉa sasa qoriziovou lado topi,’ ” kiolake vo Setani.

12Ni Jisu ta o vati tiorikake vo, ni eri kiolake, “Ko Tabu ama Riki ta eri nio kikolani, ‘Ṉota pui ṉo madoevou ṉovo Baṉara vo ṉovo Lekasa tu tava kelo voko aqasiele ama iruruputo ṉoko sarube ama kalo kale,’ ” kiolake.

13Nio Setani ta o paikake zolizolievo vo Jisu komia kiadama keve poso kale, ni vota o vaevake vo saita.

Jisu ta o taniekake voko iruruputo sai Qalili

(Matiu 4:12-17; Maka 1:14-15)

14Nio Jisu ta ota vaitake Qalili rana, ni vo Tabu ala Auvana ko pizato ta ko evake vo tona. Nio voko bazu ta kota va aerake koa pado ama Qalili. 15Nio vota o nianiiekatake sai seko ilusato ko pade poso kale ni kiadamu ta ke rauraevake vo.

Jisu vai kaikuapo Nazareti peuru kale amu

(Matiu 13:53-58; Maka 6:1-6)

16Ni Jisu ta o olake Nazareti peuru kale, sai voko rusu keru o evekoi, ni vota o olake Sabati ṉaniu kale ilusato ko pade kale kiada keru obeta kavani. Ni vota o lojoake sai tu o tiromiko ko Tabu ama Riki, 17nio seta ke kativake vo tabu ama buka poropita Aisea o rikiekema nio vota o tiromikake sai ko rikiziovima quli, ko eri kikolako,

18“Vo Baṉara vo Tabu ala Auvana ta aṉa tona,

ako vota lula o pitoele aṉa tu aṉata aqai bazubazutou ko Uri ama Bazu se ozaoza kamu kasi.

Vota lula o soroele aṉa tu aqai bazutou ko rupasio se piripiri amu kasi,

tu se leqa kamu ta ke keazatou ni ke rupasio seke niumaniumaivani,

19ni a qaseko koa taku so keru vo Baṉara o pakiemou keru voko maba poso,” kikolako.

20Ni Jisu ta o tibulikake koa buka, ni o vaitoekake vo o kati vailani kasi, ni ota papuake nianiiekimole se, Jiu amu ke kavani seke nianiiekata keru. Ni kiadamu se koa ilusato ko pade kale amu ta ke toiritoirivake vo. 21Ni vota o taniekake pesipesito sekasi, ni eri kiolake, “Komia kobu Tabu ama Riki ta tuvevo ko eva vairutu, ko lula aṉa a diromikalama ni lula me viqalama,” kiolake.

22Nio sea kiadamu ta keva matu zoleike vo ni aqasiele kekai evake koa matu ileile ama pesio poso vo o rukuekema. Nio seta eri kikelake seko vuzeilo kale, “Koe, nei ta pui vo Josepa vo meqora soikoni!” kikelake.

23Nio vota eri kiolake sekasi, “Aṉata a melai nianiia me, ta meta eri la kimevou ko aṉa koa podepodeti pesio kale, ‘Dokita ṉa ṉo elou ta, ṉota urikiovi ṉo ṉavi. Ṉota ereka koi ṉo ṉaviko ṉisa peuru kale sai Keponeami ṉo erekema aqasiele ama iruruputo jari ama, ko eṉe ṉe viqema’ la kimevou.” 24Ni Jisu ta mata eri kiolake, “Keatini, puliala poropita inio ke rovea tava paṉao o ṉaviko ṉisa peuru kale. 25Didielomo aṉa: tuvevo matu kubo naboko poso ta ke eve Izireli poropita Ilaija ko taku keru, so keru zouke sabere ni varimuja kaboso puliama nioro kopa eve keru ni matuma nioṉe ko eve keru koa pado ama Izireli. 26Melai Ilaija ta pui opa soroeve vo Baṉara kama pado sekasi, melai kama pado pui Jiu ama naboko ko kiada kasi, Zerepati pui Jiu amu ko peuru kale, Saidoni peuru ko sipole.#4:26 Zerepati ni Saidoni peuru ta se pui Jiu mu ko peuru ikio, ni so jari Siria (v 27) ta kala pui Jiu mu vo matu peuru. 27Ni kubo pokupoku amu ta inisiana Izireli poropita Ilaisa ko taku keru, melai puliala se azo inio opa urikive, melai Neamani vo Siria ala o kiada inio o urikive,” kiolake.

28Nio kiadama maba poso koa ilusato ko pade kale ke eveni ta keta matu iqaike ke viqa keru koa rukuruku. 29Nio seta ke zolaike, ni ke vati olake vo Jisu peuru kupekupe, ni ke vati peatake sopu ko ededeu kale sai seko peuru ko evekoi tu ke jouraevo tapata kale kikelake. 30Melai vota ota taliake sea padopadoilo ko tiania azo ni ota olake pala.

Ziolo kovai onobatani maba

(Maka 1:21-28)

31Ni Jisu ta o olake Keponeami, kala pado peuru Qalili ala, ni sai nio vota o nianiiekimake se maba poso Sabati ṉaniu kale. 32Nio sea kiadamu ta kekai vuzeike voko nianiiekimo se, ako voko pesio ta pizato sama sole. 33Ni kala maba ta obeta evake koa ilusato ko pade kale vo kovai onobatani ko ziolo. Ni vota ota matu upaupatake, ni eri kiolake, 34“Kei! Nazareti ala Jisu ṉa, noni ṉo iṉelo kinola inio? No queva koi tu niumaeṉelole eṉe kio? Aṉata aṉai nianiia ṉota vo Baṉara vo Tabu ala Maba ṉa vo o soroeṉeni ṉa inio!” kiolake.

35Nio vo Jisu ta o riqaekake koa ziolo ni eri ka kiolake, “Ṉota moizai, ni saqore nea maba tona azo!” kiolake. Nio koa ziolo ta ko pivake voa maba miduku kale seko vilu kasa ni kota saqorake vo tona azo, melai kota pui tabi ko ivake vo.

36Nio sea kiadama maba poso ta keta vuzeike, ni eri kikelake ke ṉavio kude, “Loma quli pesio ikio komi? Ako nea maba ta pizato sala ni okai riqaeka ko ziolo poso, ni kota ko zoriva sole!” kikelake. 37Nio Jisu ko bazu ta kota aerake kiadama koa ketaketama peuru poso kale.

Jisu ko urikimo kubo maba poso

(Matiu 8:14-17; Maka 1:29-34)

38Nio Jisu ta o vaekake se Jiu amu ko ilusato ko pade ni ota olake Saimone ko pade kasi. Ni Saimone ko ravaza, voko reko ko niania, ta kota matu verepake, ni seta kevai bazuekake vo Jisu koko verepo. 39Ni vota o olake ni o lojoake koko ketaketa ni o poqupoquike koko topi ni o riqaekake koa vere. Ni koa vere ta ko vaekake ko, ti ko lojoake ni kota koma inainaekake se kama sailao.

40Ni ṉaniu ko sulupo ko tova#4:40 Ṉaniu ko sulupo ko tova: Kota seko Jiu ama Sabati ko tova inio. Seko kerukeru kale ta kota tabu tu ke mati zio Sabati ṉaniu kale sole. inio kiadamu se azaazama vere poso samu ko lolo poso ta ke mati kuevake se Jisu kasi, ni vota omai ivikake voko ṉase se omaomadeu kale kude ni vota o urikimake sea kiadamu. 41Ziolo poso melai o rerikake kubo maba poso kale azo, ni koa ziolo poso ta kota upaupatake ni eri kikolake, “Ṉota vo Baṉara vo Meqora ṉa!” kikelake. Melai vo Jisu ta o kaqarikake koa ziolo poso tu ko moizailo, ako kota kovai nianiia ni kovai bazuta ta vo inio vo Baṉara o soroeveni Pakio.

Jisu ta o bazubazutake se Jiu mu ko ilusato ko pade poso kale

(Maka 1:35-39)

42Koko raneo kale raneto inio Jisu ta o vaekake koa peuru ni ota olake maba pide ama zaekale. Nio se maba poso ta ke tanitake vailivo vo, ni ke veve keru vo, seta ke madoevake kaitivo vo tu pui o vaemo se. 43Melai vota eri kiolake sekasi, “Aṉata aqai bazubazutou mata ko Uri ama Bazu Baṉara ko lekasa puo ko mata kama peuru poso kale, ako ko ikio vo Baṉara aṉa olai soroekema tu aṉata a ereko,” kiolake.

44So sole vota obeta olake bazubazuto se Jiu mu ko ilusato ko pade poso kale seko peuru poso kale.

Currently Selected:

Luke 4: BLBNT

Highlight

Copy