Luke 2

Jisu ko alilo

(Matiu 1:18-25)

1Koa taku keru inio vo Romu ala Matu Aikovakova Auqasitasi ta o soroekake kama pado bazu koa Romu ko vailo kale ama peuru ma peuru kale amu kasi, tu seta ke zio tu kepa ataito kiolake. 2Komi ta kuleto ama ataito, koko ereima Kuiriniasi Qavuna o eve keru Siria. 3Nio kiadamu ta ke olake tu kepa ataito ke navinavi seko ṉisa peuru poso kale.#2:3 Se kebeta eveni seko nisa peuru kale ta sai pado ke atai, se edolokoi ke vatuteni inio ke taliovi tu kepa ataito.

4Nio Josepa ta o olake Nazareti peuru kale azo, sai Qalili azo, Betelihema peuru kale, sai Jiudia, vo Aikovakova Devita o alile ni o rapukekoi. Josepa ta o olake sai ako vota kala pado vo Devita ko toutou kale ala sole. 5Vota o olake atailole sai Mere sate, ko lula keva korotikema tu kota ko raevou vo. Kota epia kama, 6nio so keru nioqa sai Betelihema qopeta eva keru inio kota baroake koko taku tu kota ko vovo kovo salua. 7Nio kota ko alilivake kovo ito ala lasive meqora, ni kota ko sudevake rosi ama suma kale ni ko tekuevake bianabiana poso ko vuatakoi—koa mamazo ko pade ko poro kale ta puliama nioqako zae tu qo amaqeo ni qokai elo sole.

Se sipi ke kati vailani ni se mateana madu

8Ni kake sipi ke kati vailani ta kebeta evake koa kobu zaekale siqo kale, seke iruruputani ipu kale seko kati vailo kale seko rovana poso. 9Ni vo Baṉara vo mateana ta omai puratake se, ni vo Baṉara ko ṉaṉaidara ta komai laqatake se. Nio seta keta matu ṉake. 10Melai voa mateana ta eri kiolake sekasi, “Pui ṉalo! Aṉata meko uri ama bazu salala, koko kati kilo ama ko matuma zoleilo kiadama maba kasi. 11Vairutu komia ipu kale mevo Pakio ta lula o alilala vo Devita ko peuru kale; vo inio vo Lekasa ni vo Baṉara o soroevani Pakio! 12Ko quli me tuvevo ko mela iko ama quli komi ta, meta me velou voa suma sudesude ala salua ta obeta tekua biaṉabiaṉa poso ko vuatakoi,” kiolake vo mateana.

13Ni ota podoloa koi inio matuma vaki au kalea mateana madu ta ke puratake voa mateana sate ni ke ilusivake vo Baṉara, ni eri kikelake,

14“Naṉaidara vo Baṉara kasi ko matu okate ama aukale,

ni bule maba poso kasi vo omai zoleivani miduku kale!” kikelake.

15Nio sea mateana madu lula ke vaemake se ni keta vaitake aukale saita inio sipi ke kati vailani ta eri kikelake ke ṉavio kude, “Aria tu me zio Betelihema peuru kale tu meba kelo ko quli lula ko ereivako sai, vo Baṉara vo mateana o melai bazuekako anime,” kikelake.

16So sole seta ke olake taukavole ni kepa keake Mere ni Josepa, ni ke veake voa salua obeta tekuani biaṉabiaṉa poso ko vuatakoi. 17Ni so keru se sipi ke kati vailani ke vea keru vo, inio seta kekai bazutake kiadama vo mateana ma kiovevo se voa meqora kale avo. 18Ni kiadamu seke viqeni se sipi ke kati vailani ke kasekema quli sekasi ta keta matu vuzeike. 19Nio Mere ta ko tukiekake kiadama ko quli ko ereivako quli ni kota ko matu kerukeruekake koko bulo kale. 20Ni se sipi ke kati vailani ta keta vaitake ke sipi poso kasi, ni kera kale ke ilusivake vo Baṉara kiadama quli seke viqema ni ke kevema quli kale avo, vo mateana omai bazuekema quli.

Jisu ṉi vai nokaeko

21Ni siotolu ama ṉaniu kale inio voa salua ta ke movevake ni seta kevai nokaekake voko ṉi ta Jisu, koa ṉi vo mateana o kativema vo puliako vo siapa kale elo.

Jisu vati zio Jelepade kale

22Ni kota baroake ko taku Josepa ni Mere ko tu nioqata qo ereko ko Mosese ko Bazu kale ko kaseivako bulebuleilo ko siqasiqa.#2:22 Komi ta 40 ṉaniu meqora ko alilivo ko tovama iruruputo. Nio nioqata qo vati olake voa salua Jerusalema tu tabu qopa ivo tu vota Baṉara vo o elou kiqolake, 23omadeuvo vo Baṉara ko Bazu ko rikiziovima kikovevo ko lulueko kale, ko eri kikovema, “Kiadama kaka kama lasive meqora poso ta tabu me imou tu seta vo Baṉara ko ke elou,” kikovema. 24Ni nioqata qo erekake koa bulebuleilo ko siqato “omuqa ova kurou kale ma omuqa vairu ama kurou,” omadeuvo vo Baṉara ko Bazu kikovevo jari.

25Ni inovoana kala pado maba vo obeta evani sai Jerusalema o ṉi ta Simeoni. Vota kala sidopu ala maba ni ovai oquani vo Baṉara, ni o tarevani Izireli vo Pakio. Vo Tabu ala Auvana ta ovai evake vo, 26ni vo Tabu ala Auvana ta ovai puratikake vo ta vota pui opa vouvou melai vota o velou kuleto vo Baṉara o soroevo ala Pakio. 27Ni vo Tabu ala Auvana ta o aveavevake vo nio vota o olake Jelepade ko zaekale. Ni so keru voa molele Jisu ko mama ni niania qo vati keve keru Jelepade ko zae ko poro kale tu vati luluekole vo Baṉara ko Bazu kikolani jari, 28nio Simeoni ta o borivake voa molele voko boribori kale, ni o ilusivake vo Baṉara, ni eri kiolake,

29“Erisana, Baṉara, ṉota ṉo rovea zarielo aṉa ṉovo nabulu lala

tu a vou bule sate ṉo ṉavi kiṉovevo jari.

30Ako aṉata a vea ṉovo Pakiezato a ṉaviko vilu kale sole,

31vo ṉo lula ṉo inainaeveni kiadama peuru ma peuru kale ama qoqono poso ko tanama kale:

32Vota kala zakaremu tu kasa o ikou ṉoko vatolo kiadama peuru ma peuru kale ama qoqono poso kasi

ni vota o kati kilou ko ṉaṉaidara ṉoko mabamu Izireli mu kasi!” kiolake.

33Nio voa meqora ko mama ni niania kidi ta aqasiele qokai evake vo Simeoni kiolani voa salua kale avo. 34Ni Simeoni ta mauru o imake se ni eri kiolake Mere kasi, voa molele ko niania, “Nea meqora ta lula o pitoeve vo Baṉara tu kubo Izireli amu ta kevai tupariovou ni ke pialou melai kubo madu ta ke pakiovou vokale. Vota kala mamola o elou Baṉara kasi azo ala kubo maba madu kevai keduvo ala, 35ni so inio ke puratikou seko mutamuta kama kerukeru poso. Ni ivo ama benisi jari ama upotuqu ta mata kota ṉa jataekou ṉoko bulo,” kiolake.

36Ni kama pado matu qole ama poropita ta kobeta evake sai koko ṉi ta Ana, vo Peniolo ko meqora, Asera ko toutou kale ama. 37Kota roroto ama ko eve sikeura sabere ni kovo lasive ta o vouvake ni naboko ko evake, ni koa taku ta kota siotolu toni ariku sabere ama. Kota kiada keru ko olake Jelepade kale, ipu ni ṉaniu ni ko ilusivake vo Baṉara, ni ko tabutabuake ni ko vararaitake. 38Ni maba koa taku kale inio kota ko baroake sai Jisu saidi ke evakoi ni kota ko ilusivake vo Baṉara, ni kota kovai bazubazutake voa meqora kiadamu kasi seke tarekani vo Baṉara ko pakieko Jerusalema#2:38 Jerusalema: Jerusalema ta ko kaseka mata pado ama Izireli qoqono., lula leveleveo kale o kasekema.

Seko vaito Nazareti peuru kale

39Ni so keru nioqa lula qo paika keru ereko koa kiadama quli koko kaseima tu qo ereko meqora ko kovo ko tova vo Baṉara ko Bazu kale, nioqata qota vaitake Qalili, nioqako ṉisa peuru kale Nazareti. 40Ni voa meqora ta ota rapukake ni ota pizatake; ni vota kovai sukatake ko uri ama kerukeru, ni Baṉara ko mauruto ta vo tona.

Jisu ko rusu keru Jelepade kale

41Kiadama sabere poso kale Jisu ko mama ni niania kidi ta qo olake mati Jerusalema kai zomanole ko Alokato ko Ṉojola. 42Nio so keru Jisu toni omuqa sabere ala keru, seta ke olake ṉojola kai zomanole se Jiu amu kebe kavani kiada keru jari. 43Ni koa ṉojola ko ṉaniu poso ta ko paloasako, nio seta keta tanitake vaitavaitaito ke peuru poso kale, melai voa rusu Jisu ta ota loivake Jerusalema. Voko mama ni niania kidi ta pui qokai nianiiake ta vota ota loiva kio, 44nioqako kerukeru kale ta vota esa kama poqala maba madu sate inio obeta talia kiqolake, so sole nioqata qo taliake pado ama ṉaniu, ni sai nio nioqata qo taniekake vailivo vo nioqako mabamu ni baerebaere poso seke mati taliani ko valuvalu. 45Melai nioqata pui qo veake vo sai, so sole qota vaitake Jerusalema vailivole vo. 46Ni zouke ama ṉaniu kale nioqako vaeko Jerusalema ko tova inio nioqata qo veake vo Jelepade ko ko poro kale, obeta papuake se nianiiomu sase, o viqaviqazatake ni o kuimakuimaemake se. 47Ni seke tava viqani vo ta matu aqasiele kekai evake voko uri ama kerukeru sama opato poso. 48Ni voko mama ni niania ta qota matu polosake so keru nioqa qo veve keru vo, nio voko niania ta eri kikolake vokasi, “Meqora, noi sole inio ṉota ṉo erekala eri ama quli eqe kasi? Ṉovo mama ni aṉa ta matu tiṉoliṉoli qeta eva vailiṉole ṉo,” kikolake.

49Nio vota o kati tiorikake nioqa ni eri ka kiolake, “Noi sole inio qeta qe vaililala aṉa? Qeta pui qekai nianiia ta ko male tu aṉata koi a Mama ko pade kale abeta eva kio?” kiolake. 50Melai nioqata pui qo paqumukake vo kiolani nioqa kasi. 51So sole Jisu ta ota vaitake Nazareti nioqa sate, sai vo o zorikekoi nioqa. Ni voko niania ta ko tukiekake kiadama quli koko bulo kale. 52Ni vota o rapukake voko tupu ni uri ama kerukeru kale, ni vo Baṉara ni se maba poso ta uria kerukeruevo ke evake.

Currently Selected:

Luke 2: BLBNT

Highlight

Copy