Luke 1

1Ṉova Tiopilasi:

Kubo madu ta lula ke madoe rikieko kiadama quli ko lula ko ereivako eṉe kasi ko bazu. 2Seta ke rikieke ko quli sea maba poso kuleto kekai nianiiekateni komia Uri ama Bazu ke vilu kale ke kevema quli koko tanitanila kale, ko se kekai bazubazutema eṉe kasi. 3Sokale avo inio, tanala, aṉa melai a qerukeruta ta uri tu aṉata a uria lulueko rikieko koa kiadama quli ṉokasi ako aṉata lula a uria vakakuka kiadama ko quli poso koko tanitanila keru azo sole. 4Soa rikieko a elou nio ṉota ṉoqai nianiiovou koko maba tuveano kiadama quli ko lula ko kaseivako bazubazu ṉokasi.

Jone Bapitaiso ko alilo ko pidokiko

5Koa taku so keru Herodi aikovakova o eva keru koa pado ama Izireli peuru kale, ta kala pado siama ta obeta evake sai Zekaraia o ṉi sala, vo Abaeja ko siama poqala kale o eveni. Voko reko ko ṉi ta Ilizabeti, ko melai siama ko meqora, Eroni ko vikuvikula kale ama. 6Nioqata sidopua elo qo evake Baṉara ko vilu kasa, ni qo matu uria zorikake vo Baṉara ko bazu poso ni lojolojo poso. 7Ni nioqata puliama meqora sanioqa, ako Ilizabeti ta padu ama sole, nio ko ni Zekaraia ta matu qole ama maba kidi koa taku.

8Omadeu ṉaniu inio Zekaraia ni vokale ama siama madu ta ke erekake seko siama iruruputo Baṉara ko tanama kale. Ni vota o erekake koa ṉaniu kale ama ilusato. 9Se siama madu ko kalo ko lulueko kale, vota o pitoi seko pitoekinio kale tu o siqaeko ko uria tui ama bube bube ko sara topi.#1:9 Komia koidi ta omadeu taku pala siama ko saevo kale o roveako ereko. So sole vota o olake vo Baṉara ko Jelepade kale, 10ni matu kubo maba madu ta ke vararaitake kupekupe vo o siqaeka keru koa uria tui ama bube. 11Ni vo Baṉara vo mateana ta ovai puratake vo sai ni voa mateana ta o lojoake koa bube ko sara ko palo rana. 12So keru Zekaraia o vea keru voa mateana vota ota matu ṉake. 13Melai vo mateana ta eri kiolake vokasi, “Ṉota pui ṉalo, Zekaraia! Vo Baṉara ta lula o opatika ṉoko vararaito, nio ṉoko reko Ilizabeti ta ko vovou kala lasive meqora. Ni ṉota ṉovai nokaekou voko ṉi ta Jone. 14Ṉota ṉo matu zoleilou ni aukozo ṉo elou, ni matu kubo madu ta keka zoleilou voko alilo! 15Vota raura kala maba o elou vo Baṉara ko vilu kasa, ni vota maba pui opa nozuekou ko vaini ko ju ni piza kama ju, melai Tabu ala Auvana ta ovai sukatou vo puliako vo alilo. 16Vota o vaitoemou matu kubo Izireli ama maba madu vo Baṉara sevo Lekasa kasi. 17Vota o ziovou vo Lekasa ko kuleto, Baṉara ko piza kama Auvana sala omadeuvo vo poropita Ilaija jari. Vota mata o tova odouvimou se mama poso ni se meqora poso; ni vota o lilimou se bikobikoirato ko maba poso se sidopu amu ko nianiiekato kasi, ni vota inaina kamu o imou kama qoqono vo Lekasa kaqe,” kiolake vo Baṉara vo mateana.

18Nio Zekaraia ta pui tuvevo opa ike nio eri kiolake voa mateana kasi, “Nonia nianiio nio aqai elou ta kota so ko kalou? Ako aṉata kala qole ala maba lala ni aṉako reko melai so qole ama sole,” kiolake.

19Nio vo mateana ta o vati tiorikake vo, ni eri kiolake vokasi, “Aṉata Qebireli lala. Aṉata a lojoani lala vo Baṉara ko tanama kale, vo o soroelani lala tu aqai pesio ni a qaseko komia uri ama bazu ṉokasi. 20Melai ṉota pui nio tuvevo ṉo ika aṉako bazu, melai ko quli ta kota ereilou koa korokoroti ama taku kale. Sole erisaṉa ṉota pui ṉoba roveovou pesio, ako ṉota pui nio tuvevo ṉo ika sole ṉota poka ṉo elou ti kobeta barolou koa ṉaniu aṉako leveleveo ṉokasi ama ko tuvevo puilou keru,” kiolake.

21Ni so maqa inio se maba poso ta ke tarevake vo Zekaraia nio seta aqasiele kekai evake voko matu ubaito Jelepade ko poro kale ama. 22Ni so keru vo o saqora keru sai kazo inio vota pui o roveake mati pesio se, nio seta ke paqumukake ta vota lula o keala kama pado kelokelozato kikelake. Vota pui o roveake rukueko kama pado pesio, ṉase kale pala inio o mati pesiake.

23Ni voko Jelepade kale ama nabulupute ko taku ko tova inio Zekaraia ta ota vaitake o ṉaviko pade kasi. 24Koko tova inio voko reko Ilizabeti ta epia kota evake, nio sike kaboso ta kota mutaivake ni pui ko vaekake ko pade. 25Nio kota eri kikolake, “Vo Baṉara ta lula o tauvela aṉa, ni vota lula ota la ṉamuka aṉako qurato se maba poso kasi azo a qoako!” kikolake.

Jisu ko alilo ko pidokiko

26Ni varimujala kaboso kale Ilizabeti ko epia kale, Baṉara ta o soroevake vovo mateana Qebireli kama pado Qalili ama peuru kale Nazareti ko ṉi sama. 27Vota o kati kuevake kama pado bazu kama pado sinaqu rusu kasi. Koa sinaqu rusu ta puliala maba opa tibaekema, ni kota lula korokoroti ama tu kota ko raevo kala maba, Josepa o ṉi sala, vo Aikovakova Devita ko vikuvikula kale ala, Ni koa sinaqu rusu ko ṉi ta Mere. 28Ni vo mateana ta o kuevake kokasi ni eri kiolake, “Bule ta ko elou ṉo tona! Vo Baṉara ta ṉo tona ni vota lula matu mauru o iṉa ṉo!” kiolake.

29Nio Mere ta matu upotuqu ko ikake voa mateana ko rukuruku ni niuniala kokai evake koa pesio poso kikolani avo. 30Nio vo mateana ta eri kiolake, “Pui ṉalo, Mere, ako ṉota lula ṉo qoa vo Baṉara ko baiseo sole. 31Ṉota epia ṉo elou ni ṉo alilivou kala lasive meqora, ni ṉota ṉovai nokaekou o ṉi ta Jisu. 32Vota raura o elou ni vota vo Raura kala Baṉara vo Meqora kovai nokailou. Vo Baṉara ta aikovakova o ivou vo omadeuvo vovo taite Devita jari, 33ni vota Jekopi ko vikuvukula madu ko aikovakova o elou latau ṉaniu ni ka ṉaniu; ako voko lekasa puo ta pui kopa paitou!” kiolake. 34Nio Mere ta eri kikolake voa mateana kasi, “Aṉata lasive pidea lala. Noni ko roveovou nio komi quli ta ko ereilou?” kikolake.

35Nio vo mateana ta o kati tiorikake ko ni eri kiolake kokasi, “Vo Tabu ala Auvana ta o kilou ṉo tona, ni vo Baṉara ko pizato ta ko bouluṉou ṉo. Komia kalo kale inio voa tabu ala salua ta vo Baṉara vo Meqora kovai nokailou. 36Kerukerueka ko Ilizabeti ṉoko maba. Ko padu ama ka kikevema ta erisaṉa ta kota varimuja kaboso epia kama ikio, lula matu qole ama ikio melai. 37Ako vo Baṉara ta o rovea ereko kiadama quli sole,” kiolake.

38Nio Mere ta eri kikolake, “Aṉata vo Baṉara ko nabulu lala. Vaeka tu so ṉo lula kiṉolani ta ko ereilou aṉa tona,” kikolake. Ni vo mateana ta o vaekake ko.

Mere ko soipiko ko Ilizabeti

39Koko tova inio Mere ta ko inainaike ni taukavole kota kailake sopu kale ama peuru kale, sai Jiudia rana. 40Kota ko olake Zekaraia ko pade kasi ni kota kokai kiaviake ko Ilizabeti ni ko kasekake koko zoleilo kokasi. 41Ni so keru Ilizabeti ko viqa keru Mere ko zoleilo sama pesio, vo meqora ta o matu bokilikake koko siapa. Ni Tabu ala Auvana ta okai sukatake ko Ilizabeti, 42ni ko velavelaoke matuma kora kale ni eri kikolake, “Ṉota matu maurumauru ama rekoreko ṉa kiadama rekoreko poso azo, ni voa meqora ṉoṉo vovo ala ta maurumauru ala! 43Matu aqasiele avo inio komia matuma quli ta ko ereiva aṉa kasi, nio aṉavo Pakio ko niania ṉa ta ṉo queva soipilole aṉa! 44Ako eria viqo a evala ṉoko zoleilo sama pesio ti obe tala matu bokilika inio zoleilole vo meqora aṉako siapa. 45Maurumaurua laṉa, ako ṉota ṉo duvevo pueka sole vo Baṉara ko bazu ṉokasi ko kuevako ta tuvevo kota elou sole,” kikolake.

Mere ko ilusato ko kera

46Nio Mere ta eri kikolake,

“Aṉata a ilusiva vo Baṉara a bulo kale;

47aṉako auvana ta ko zoleiva ako vo Baṉara ta aṉavo Pakio sole,

48ako vota o kerukeruela aṉa sole, voko zara kama nabulu lala!

Erisaṉa azo kiadama maba ta kelai nokaekou aṉa maurumaurua lala,

49ako vo kiadavo piza kala Baṉara ta o ereka aqasiele ama quli aṉa kaqe sole.

Voko ṉi ta Tabu ama,

50vota kasa oma ika ko tauvezato sama roquano

se kevai oquani kasi, kiadama vikuvikula poso kale amu kasi.

51Vota o ereka matuma quli voko pizato kale;

vota o birebirema seke aikaivani seko nakanakati poso kale.

52Vota o saqorima se piza kama aikovakova madu seko papupapu topi azo

ni o zolaema se zara kamu.

53Vota o maqikima seke luapani uri ama quli kale,#1:53 uri ama quli: Komi ta esa tupu ko saevo ni mata auvana ko saevo ko korotikako quli.

ni o viuruema se batiro amu pulia quli sate.

54Vota o ereka ko quli vo o kasekema voko leveleveo kale, ko animeko taite poso kasi o erekema,

ni o kueva tu tauvevole vovo nabulu Izireli.

55Vota pui ukaka o eva kasa iko ko tauvezato sama roquano Ebarahami kasi

ni kiadama voko vikuvikula madu kasi rineo rane!” kikolake ko Mere.

56Nio Mere ta zouke kaboso tiniavo ko evake Ilizabeti kasi, saita inio ko vaitake koko pade kasi.

Jone Bapitaiso ko alilo

57Ni taku ta kota baroake Ilizabeti ko meqora ko kovo ko, ni kota ko alilivake kala lasive meqora. 58Ni koko peuru kale ke evani ni koko saidi kale amu ta ke viqake vo Baṉara ko tauvezato sama roquano kokasi ama, ni seta ke kati zomanake zoleilo ko.

59Ni siotolu ama ṉaniu kale voa salua ko alilo ko tova inio seta ke olake movevole vo, ni seta kevai nokaekou Zekaraia ṉi, o mama ko ṉi, kikelake. 60Melai voko niania ta eri kikolake, “Pui! Vota Jone ikio voko ṉi ko elou,” kikolake.

61Nio sai nio eri kikelake, “Puliala ṉoko saidi kale ala inio koa ṉi sala!” kikelake. 62So sole seta ke siqailivake vovo mama, ni kevai kuimaekake ta loma ṉi kio oka zariako tu voa salua ta o kovo, kikelake.

63Nio Zekaraia ta oma pasekake kama pado rikito pepa, ni vota o rikiekake, “Jone ikio voko ṉi kio.” Nio seta keta matu vuzeike. 64Ni maba koa taku kale inio Zekaraia ta o roveake mata pesio, ni vota o taniekake ilusivo vo Baṉara. 65Nio kiadama nioqako sipole ke evani ta keta matu ṉake, ni ko quli poso ko bazu ta ko aerake Jiudia ma sopu kale ama peuru poso kale. 66Ni kiadamu seke viqeni ko ta aqasiele ko imake so sole seta ke kuimanaoke, ni eri kikelake, “Loma matuma iruruputo nio nea meqora o elo avo?” kikelake. Ako vo Baṉara ko pizato vo tona ko evako ta keta va keake sole.

Zekaraia ko pidokato

67Nio Jone vo mama Zekaraia ta ovai sukatake vo Tabu ala Auvana ni o pidokatake, ni eri kiolake,

68“Animeta me ilusivo vo Baṉara, se Izireli amu vo Lekasa!

Ako vota o kueva tu o tauvemo voko maba poso ni vota o rupasimo se.

69Vota o puariva kala piza kala Pakio tu anime kaqe,

vovo nabulu Devita ko toutou kale ala.

70Matu lulavo vota o kaseke komi quli voko tabu ama poropita madu kale,

71vota o kaseke ko vota o pakiemelou animeko kana poso kasi azo,

sea kiadamu ko pizato kale azo seke melai kideipani anime.

72Vota so kiolake vota kasa o ikou ko tauvezato sama roquano animeko taite poso kasi,

ni vota o erekou ko quli voko tabu ama leveleveo kale Ebarahami kasi o kasekema quli.

73-74Vota leveleveo o erekake vo animevo taite Ebarahami kasi

tu o pakiemelo animeko kana poso kasi azo,

ni o zariemele anime tu meva nabulupute vo ṉalo pidea mela;

75tu tabu me elo ni sidopu me elo voko tanama kale, kiadama ṉaniu animeko saevo kale.

76“Ni ṉo aṉavo meqora ṉa, ta vo Matu Raura kala Baṉara vo poropita keṉai nokaekou.

Ṉota ṉo elou puliako vo Baṉara ko pakiezato elo

ni ṉota ṉova inainaekou voko keve,

77tu bazuemo voko maba poso ta ke pakiovou,

seko sarueko poso tama akoilo kale.

78Ako animevo Baṉara ta matuma tauvezato ko roquano sala sole.

Koa voko roquano kale ta o melai barolou aukale azo animevo Pakio, omadeuvo vo o peatani ṉaniu ko zakaremu jari,

79ni vota omai talou kiadamu seke evani vou ko kutumana kale ni vou ko ṉalo kale tu vota o odiemelo kiadama animeko tamuto poso kale bule ama keve tona,” kiolake vo Zekaraia.

80Nio voa meqora Jone ta o rapukake ni o pizatake voko tupu ni auvana kale. Ni vota o evake lealea kama zaekale ti kobeta baroi so keru vo kasa o eve keru se Izireli ama maba poso kasi.

Currently Selected:

Luke 1: BLBNT

Highlight

Copy