ŴaRoma 9

Chiuta ndi ŵanthu ŵake

1Ndineneska mwaku Kristu (kuti ndipusika cha; njuŵi zangu zisimikizgiya pamoza nane mu Mzimu Wakupaturika), 2kuti nde nacho chitima chikuru ndi urwirwi wambura kulekezga mu mtima wangu. 3Chifukwa ndingakhumba mphanyi kuti ine ndamweni ndiŵe wakutembeka kwaku Kristu pa chifukwa cha ŵabali ŵangu, ŵachikazi ŵanyangu kuchiri ku liŵavu: 4ŵeniwo mbaYisraele; kwaku ŵeniwo kwe ulezi wo, ndi unkhankhu wo, ndi marayizganu, ndi kapaskidu ka dangu, ndi uteŵeti waku Chiuta, ndi mapanganu; 5ŵeniwo mbaseku, ndi mwaku ŵeniwo uli nkhu liŵavu wanguziya Kristu, yo we pachanya paku wose, Chiuta wakutumbikika muyaya. Ameni.

6Kweni kuti kwe nge nkhuti mazu ghaku Chiuta ghatondeka cha. Chifukwa kuti wose mbaYisraele cha, ŵeniwo mbaku Yisraele, 7ndipo kuti ndi wose cha wo mbana ŵaku Abrahamu pa chifukwa chakuti ndi mphapu yaku Abrahamu; kweni, “Muwaku Yisaki mphapu yaku, yikadanikanga.” 8Uku ndiku kuti wo ŵakupapika ku liŵavu pe kuti mbana ŵaku Chiuta cha; kweni wo ŵakupapika chifukwa cha chipanganu chaku Chiuta ndiwo mbeu yake yeneko. 9Chifukwa mazu gha chipanganu ngenagha, “Uli mpha nyengo yino ndiziyenge, ndipo Sara waŵenge ndi mwana.” 10Ndipo viyo pe cha; kweni Rabeka nayo, wati wazuwuka ndi yumoza, ndiyo auskefwe Yisaki, 11chifukwa ŵana wo ŵecheŵandapapike, chingana nkhuchitapo so kanthu kamampha pamwenga kaheni, alinga kuti chitema chaku Chiuta kwakuyana ndi kasankhidu chijaririye, kutuwa ku zinchitu cha, kweni kwaku yo wadana, 12kungumneneke, “Mura yo wamteŵetiyenge mumana.” 13Uli ndimo kwalembeke, “Yakobe ndamwanja, kweni Esau ndamtinkha.”

14Viyo tikatingenji na? Kumbi kwe uwura urunji kwaku Chiuta? 15Kungaŵanga viyo cha! Chifukwa kwaku Mosese watiti, “Ndimchitiyenge lisungu, yo yose ndimchitiya lisungu, ndipo ndenjerwiyenge yo yose nditenjerwa.” 16Viyo na, kuti nchaku yo wakhumba cha, chingana nchaku yo wachimbiya cha, kweni nchaku Chiuta yo wachitiya lisungu. 17Chifukwa lembo lo lititi kwaku Farao, “Kwaku chenichi ndicho ndingukuyuskiya, chakuti ndirongolenge mwako nthazi yangu, ndipo chakuti zina langu liwandiyenge mu charu chose chapasi.” 18Viyo na, mweniyo wakhumba wamchitiya lisungu, ndipo mweniyo wakhumba wangangamiska.

Ukali waku Chiuta ndi lisungu lake

19Viyo unenenge nane, chifukwa chine weche kususka? “Pakuti kumbi njani wakumikana ndi khumbu lake?” 20Awa na, wamunthu we, ndiwe yani wakuŵiringuliya Chiuta? Kumbi chakuwumbika cho chinenenge ku muumbi wake, “Chifukwa chine wandiumba viyo?” 21Pamwenga, kumbi muumbi walive mtufu pa dongu, kuchita ndi burunga lenilo pe chiyaŵi chimoza ku rumbu, ndi chiyaŵi chinyake ku myuyu? 22Kweni na kwati asani Chiuta, chingana wakhumba kurongo kandundu kake ndi kusimikizga nthazi yake, mu kuzuzipizga kukuru wangulekerezga ŵanthu wo wangukaripa nawo ndi kuŵarongosole ku wanangiku; 23ndipo alinga kuti waziŵiske usambasi wa unkhankhu wake pa ŵanthu wo ŵanguronde lisungu lake, ŵeniwo wangurongosole limu ku unkhankhu, 24kwaku ifwe kwari, taŵenifwe wangudana taŵamu ŵaYuda pe cha, kweni ŵamu Mitundu nawo so! 25Uli ndimo wanene so mwaku Hoseya,

“Ndilitamurenge khamu, langu lo kuti lenga khamu langu cha;

ndi yo wengavi kwanjiwa, nyankhwanjiwa.

26Ndipo kuŵenge kuti, mu malo mwenimo kunguŵaneneke,

kuti mwe khamu langu cha,

kweniko ŵatamulikenge ŵana ŵaku Chiuta Wamoyo.”

27Kweni Yesaya wakutiya paku Yisraele: “Chingana unandi wa ŵana ŵaku Yisraele we nge ndi mchenga wapa nyanja, ŵakusiyika ndiwo ŵataskikenge. 28Chifukwa Ambuya amchita cheruzgu panupasi, kwachiduli ndi kwaruŵi.” 29Ndipo, nge ndimo Yesaya wangukambiya kali,

“Kwambura kuti Mbuya wa Maŵanja watisiyiya mbeu,

mphanyi taŵa nge ndi Sodomu, ndi talinganizgika ndi Gomora.”

30Viyo tikambengenji? Ndi chenichi, chakuti ŵaMitundu wo ŵambura kundondoloska urunji, ŵangufikapo pa urunji, urunji nawo wakutuwa ku chivwanu: 31kweni ŵaYisraele ŵakundondoloska langula la urunji, ŵengavi kufikapo pa langulu lo. 32Chifukwa chine? Pakuti, pakundondoloska, kwachivwanu cha, kweni nge nkhu zinchitu ŵanguguŵa pa mwa wo wa chiguŵisku, 33uli ndimo kwalembeke,

“Awonani, ndiŵika mu Zioni mwa wachiguŵisku

ndi jarawe la chiwiska:

ndipo yo ngwakuvwana paku iyo kuti walengeskekenge cha.”

Currently Selected:

ŴaRoma 9: TongaMw

Highlight

Copy