ŴaRoma 8

Umoyo wa Mzimu

1Viyo sono palive chisusa kwaku ŵeniwo mbamwaku Kristu Yesu. 2Chifukwa langulu la Mzimu wa umoyo mwaku Kristu Yesu landifwatuwa ku dangu lo la ulakwi la nyifwa. 3Cho langulu lingutondeka kuchita chifukwa kaŵiro ka unthu kenga kakutomboroka, Chiuta wanguchita. Wanguwa-yuwa ulakwi mu kaŵiro ka unthu pakutuma Mwana wake yo wanguja mu kaŵiro, kaŵiro ka munthu wakulakwa kwazachiwayuwa ulakwi. 4Chiuta wanguchita yichi mwakuti cha urunji cha langulu chifiskike mwaku ifwe, taŵeni fweti ja kwakuyana ndi Mzimu, kwakuyana ndi kaŵiro ka unthu cha. 5Wo ŵaja kwakuyana nge ndimo kaŵiro kawo ka unthu katuŵanene, makhumbu ghawo gharongozgeka ndi vyo kakhumba. Wo ŵaja kwakuyana ngendimo Mzimu wawo utuŵanene, vinjeru vyawo virongozgeka ndi vyo Mzimu ukhumba. 6Asani vinjeru vyako virongozgeka ndi vyo kaŵiro ka unthu kakhumba, vikakurongozgiyanga ku nyifwa, kweni asani vinjero vyako virongozgeka ndi vyo Mzimu ukhumba vikakurongozgiyanga ku umoyo ndi chimangu. 7Viyo munthu watuŵa wamawongo waku Chiuta penipo vinjeru vyake virongozgeka ndi vinthu vyo kaŵiro kake ka unthu kakhumba; chifukwa kuti wavwiya langulu laku Chiuta cha, ndipo kwakuneneska kuti wangalivwiya cha. 8Wo ŵavwiya kaŵiro kawo ka unthu kuti ŵangavwiya Chiuta cha.

9Kweni kuti imwe muja kwakuyana nge ndimo kaŵiro ka unthu winu katikuneniyani cha, muja uli ndimo Mzimu watikuneniyani, pakuti nadi, Mzimu waku Chiuta uja mwaku imwe. We yose yo walive Mzimu waku Kristu, kuti ngwaku iyo cha. 10Kweni asani Kristu waja mwaku imwe, chingana liŵavu linu lingaŵa lakufwa chifukwa cha ulakwi, ndipuuli Mzimu mbumoyo kwaku imwe chifukwa mwarunjiskika ndi Chiuta. 11Asani Mzimu waku Chiuta yo wanguyuska Yesu ku nyifwa, waja mwaku imwe, viyo yo wanguyuska Yesu ku nyifwa, wakapaskanga so umoyo ku maliŵavu ghino ghachifweni pakuŵa mu Mzimu mwaku imwe.

12Viyo na, mwa ŵabali, teŵa matewo, kweni ku nyama cha, kwachijariya ŵamoyo kwakulingana ndi nyama; 13chifukwa asani mujariya ŵamoyo kwakulingana ndi nyama, mukafwanga; kweni asani ndi Mzimu mufwiska machitidu gha liŵavu lo, muŵenge wamoyo, 14chifukwa ŵeniwo wose ŵarongozgeka ndi Mzimu waku Chiuta, yiwo mbana ŵaku Chiuta. 15Chifukwa kuti munguronde cha mzimu wa uŵanda wa chofyu, kweni munguronde mzimu wa ulezi, mwaku wo tikutiya, “Aba, Ada!” 16Mzimu iyo wasimikizgana ndi mzimu widu, kuti te ŵana ŵaku Chiuta: 17kweni asani te ŵana, te ŵakuhara so; ŵakuhara ŵaku Chiuta, ndi ŵakuhara ŵamasanga ndi Kristu; asani tikomwe pamoza nayo, alinga kuti tikankhuskikiye so pamoza nayo.

Vyakulengeka vyose vilindizga ŵana ŵaku Chiuta

18Chifukwa ndipima kuti vinkhurukusweka vya nyengo yamakono kuti vi tenere cha kulinganizgika ndi unkhankhu wo ukavumbulikanga kwaku ifwe. 19Pakuti chilereze chakunweka cha ulengi chilindizga kuvumbulika kwa ŵana ŵaku Chiuta. 20Chifukwa ulengi unguthereskeke ku umbughuya, mwa khumbu lake cha, kweni nchifukwa chaku yo wanguwuthereska, 21mu chigomekezgu kuti ulengi nawo ufwatulikengeko ku uŵanda wa chivuzi kwachisere mu wanangwa wa unkhankhu wa ŵana ŵaku Chiuta. 22Chifukwa tiziŵa kuti ulengi wose utamanthiya ndi ulangiya pamoza mpaka ku sono. 23Ndi viyo pe cha, kweni taŵeni nafwe, taŵakuŵa ndi mruwuku wa Mzimu, nafwe titamanthiya mkatikati mwaku taŵeni, taŵakulindizga kuŵa ŵana, uwombozi wo wa maliŵavu ghidu. 24Chifukwa ndi chigomekezgu cho tataskika: kweni chigomekezgu chakuwoneka kuti nchigomekezgu cha: chifukwa njani wagomekezga chenicho wawona? 25Kweni asani tigomekezga chenicho tirive kuwona ndi chizizipizgu tichilereze.

26Ndipo kwakulingana viyo Mzimu nayo watovya unthomboru widu: pakuti tirive kuziŵa cho tirombenge mo kutenere, kweni Mzimu iyo watininizikiya ndi mitamanthu yambura makambika; 27ndipo yo wapenja mu mitima waziŵa maphweredu gha Mzimu, pakuti kwakuyana ndi khumbu laku Chiuta waninizikiya ŵakupaturika.

28Ndipo tiziŵa kuti vinthu vyose vichitiya pamoza ku umampha kwaku wo mbakumwanja Chiuta, kwaku ŵeniwo mbakudanikiya uli ndi chitema chake. 29Pakuti ŵeniwo wanguŵaziŵiya limu, wanguŵateme limu wo kuyana ndi chikozgu cha Mwana wake, kuti waŵe iyo muku wawo wa ŵabali ŵanandi; 30ndipo wo wanguteme limu, ŵeniwo nawo wangudana: ndipo wo wangudana, ŵeniwo nawo wangurunjiska; ndipo wo wangurunjiska, ŵeniwo nawo wangukankhuska.

Chanju chaku Chiuta mwaku Yesu Kristu

31Viyo tikatingenji kwaku vyenivi? Asani Chiuta we kuchiri kwaku ifwe, wakumikana nafwe njani? 32Mweniyo nadi wengavi kureka Mwana waku yija, kweni wangumpereke pa chifukwa chaku tose, warekenge so uli kutipaska kwawezi vinthu vyose pamoza nayo? 33Njani waŵasumuwenge ŵakusankhika ŵaku Chiuta? Chiuta ndiyo warunjiska; wakususka njani? 34Kristu Yesu ndiyo wangufwa, inya, ndiyo wanguyuskika ku ŵakufwa mweniyo we ku marghe ghaku Chiuta, mweniyo nayo waninizikiya pa chifukwa chidu. 35Njani watigauwenge ku chanju cho chaku Kristu? Suzgu kumbi, pamwenga urwirwi, pamwenga chiŵembu, pamwenga chilala, pamwenga nkhuli, pamwenga urwani, pamwenga lipanga? 36Uli ndimo kwalembeke,

“Pa chifukwa chaku imwe tibayika msana wose;

tapimika nge ndi mberere zakwachibayika.”

37Awa! Mwaku vyenivi yose tiruskiya kupunda mwaku yo wangutanja. 38Chifukwa ndoŵeka kuti chingana ndi nyifwa, chingana mbumoyo, chingana mbangelo, chingana ndi maufumu, chingana ndi vyo viripo, chingana ndi vyo vitazanga, chingana ndi vyanthazi, 39chingana ndi wima, chingana ndi mtota, chingana nchakulengeka chose chamwenga, kuti chiziŵa kutipatuwa cha kutuwa ku chanju chaku Chiuta mwaku Yesu Kristu Ambuyafwe.

Currently Selected:

ŴaRoma 8: TongaMw

Highlight

Copy