ŴaRoma 10
10
Yuda ŵataya urunji waku Chiuta
1Mwa ŵabali, linkweka la mtima wangu ndi niniziku langu lakwaku Chiuta pa chifukwa chaku wo, ndikhumba kuti ŵataskike. 2Chifukwa ndituŵasimikizgiya kuti phamphu la kuchiri kwaku Chiuta ŵe nalo, kweni uli ndi mziŵiru cha. 3Chifukwa pakureka kuwamo mu urunji waku Chiuta, ndi pakulembe kumiska urunji waku ŵija, ŵengavi kujithereske ku urunji waku Chiuta. 4Chifukwa kwaku yose wakuvwana Kristu mbumari wa langulu laku urunji.
Kutaskika kukunozgeke ŵanthu wose
5Chifukwa Mosese walemba kuti munthu yo wauchitaurunji wamu langulu wajariyenge wamoyo mwenimo. 6Kweni urunji wamu chivwanu ukamba viyo, Unganenanga cha mu mtima wako, “Njani wakweriyengeko kuchanya?” (ndiku, kusiska Kristu); 7pamwenga, “Njani wasikiyengemo mu munthondwe wo?” (ndiku, kukwezga Kristu ku ŵakufwa). 8Kweni ghatitinji? Mazu nge pafupi pako mu mlomo wako, ndi mu mtima wako: ndigho mazu gha chivwanu, ghenigho timemeza: ghakuti, 9asani ungamzomera ndi mlomo wako Yesu nge ndi Mbuya, ndipo ungavwana mu mtima wako kuti Chiuta wangumyuska kuŵakufwa, ukataskikanga: 10pakuti ndi mtima munthu wavwaniya ku urunji; ndipo ndi mlomo wazomera ku utaski. 11Pakuti lembo lo lititi, “Yose wakuvwana mwake kuti walengeskekenge cha.” 12Chifukwa mphambanu palive pakati pa muYuda ndi muGriki chifukwa yumoza iyo ndi Mbuya waku wose, msambasi kwaku wose ŵakudaniya paku iyo: 13pakuti, “Mweniyo yose wadanenge pa zina la Ambuya, wakataskikanga.”
14Kweni ŵadanenge uli paku mweniyo ŵalive kuvwana mwake? Ndipo ŵavwanenge uli mwaku yo ŵalive kumuvwa? Ndipo ŵavwenge uli kwambura ŵakutaula? 15Ndipo ŵataulenge uli, kwambura kuti ŵatumika? Uli ndimo kwalembeke, “Nkhutowa nako marundi gha ŵakugozga vyamampha!” 16Kweni kuti wose ŵavwiya evangeli cha. Chifukwa Yesaya watiti, “Ambuya, njani wavwaniya mukutaula kwidu?” 17Viyo chivwanu chituliya mu kuvwa, ndi kuvwa ko mu mazu ghaku Kristu.
18Kweni ndititi, asi ŵanguvwa? Inyadi,
“Mazu ghawo ghanguwanda mu charu chose,
ndi manenedu ghawo ku vigoti vya panupasi.”
19Kweni ndititi, asi ŵanguziŵa Yisraele? Wadanga wakamba Mosese,
“Ine ndikusosomoliyenge ku sanji ndi ŵambura mtundu,
ndi kumkaraliskiyani ndi mtundu wambura kuwamo.”
20Kweni Yesaya wagangiya ukongwa, ndipo watiti,
“Ndasanirika ndi wo ŵengavi kundipenja.
Ndaŵa wakuwoneka kwaku ŵeniwo ŵalive kundilembe.”
21Kweni kuchiri kwaku Yisraele watiti, “Zuŵa lose ndatambasuliya manja ghanguku khamu lamtafu ndi lamapiku-mapiku.”
Currently Selected:
ŴaRoma 10: TongaMw
Highlight
Share
Copy
Want to have your highlights saved across all your devices? Sign up or sign in
Bible Society of Malawi
