ŴaRoma 11
11
Lisungu laku Chiuta pa ŵaYisraele
1Viyo ndititi, Kumbi Chiuta walipata khamu lake? Kungaŵa viyo cha! Chifukwa ine nane nde muYisraele, waku mbeu yaku Abrahamu, wa fuku laku Benjamini. 2Chiuta walive kupata khamu lake, lenilo wanguziŵiya limu. Pamwenga mureka kuziŵa kumbi cho likamba lembo lo mwaku Eliya? Mo waŵeyere Chiuta paku Yisraele, 3“Ambuya, ŵamchimi ŵinu ŵabaya, ndi visoperu vinu ŵabwanganduwa; ndipo ndasiyika ndija, nane so ŵapenja kundibaya.” 4Kweni lititinji kwaku iyo yankhulaku Chiuta? “Ndajisungiya ŵanthurumi vikwi vinkhonde ndi viŵi, ŵeniwo ŵalive kungwadiya Bala.” 5Kwakulingana viyo mu nyengo ya sono ŵaŵapo ŵakusiyika kwakuyana ndi sankhu la wezi. 6Kweni asani sankhu lo nda wezi, kuti ndaku zinchitu so cha; ipu wezi wo kuti ndi wezi so cha.
7Na uli? Cho wachilembe Yisraele, kuti wafikapo paku chenicho cha; kweni ŵakusankhika ndiwo ŵafikapo, ndipo ŵakujapo ŵanonopeskeka: 8uli ndimo kwalembeke,
“Chiuta waŵapaska mzimu wakugompho,
maso ghakuti ŵareke kulereska,
ndi makutu ghakuti ŵareke kuvwa,
mpaka ku zuŵa lenilino.”
9Ndipo Davidi watiti,
“Gome lawo liŵenge chikwiriki, ndi chiŵana,
ndi chiwiska, ndi mbwerezga kwaku wo:
10maso ghawo ghafipiskike kuti ghareke kulereska
ndi msana wawo muwokotamiske nyengo zose.”
11Viyo ndititi, kumbi ŵanguŵa, alinga ŵawe pasi? Kungaŵa viyo cha! Kweni mu mamphuru ghawo utaski waziyaku ŵaMitundu, kwachiŵakhuŵirizgiya ku sanji. 12Ndipo asani mamphuru ghawo mbusambasi wa charu, ndi uporopotu wawo mbusambasi wa ŵaMitundu; uli ukongwako uzari wawo?
Kutaskika kwa ŵaMitundu
13Kweni ndikambiya imwe mwa ŵaMitundu. Mo ndiriri ine wakutumika ku ŵaMitundu, ndiukankhuska uteŵeti wangu. 14Mwakuti ndiŵachite ŵaYuda ŵanyango kuŵa ŵasanji, ndi kutaska ŵanyake ŵaku wo. 15Chifukwa asani kutayika kwawo kwaŵiya kwanjaniska kwa charu kwaku Chiuta, kurondeka kwaku wo kuŵiyenge chine? Kweni umoyo kutuliya ku ŵakufwa. 16Ndipo asani chigaŵa chakudanga cha chiŵande nchakupaturika, iku chiŵande chose nchakupaturika; ndipo asani nkhorozu njakupaturika mphanda nazo zipaturika.
17Kweni asani mphanda zinyake zafyolekako, ndipo iwe, pakuŵa olive lakudimba, 18ungatumbwiyanga pa mphanda zo cha: kweni asani utumbwa, kuti ndiwe upinga nkhorozu cha kweni nkhorozu zipinga iwe. 19Unenenge na, “Mphanda zingufyoleka, alinga kuti ndimererwe ine mwakucho.” 20Mbwenu; zingufyolekako mu uwura-chivwanu chawo, ndipo iwe ume nganganga mu chivwanu chako, ungajitumphuskanga cha, kweni wopanga. 21Chifukwa asani Chiuta wengavi kulekerezga mphanda zakawi, chingana ndiwe kuti wakurekerezgenge cha. 22Alereni viyo ulemu ndi ukari waku Chiuta, ukari paku wo ŵanguwa, kweni ulemu waku Chiuta we paku iwe, asani ujaririya mu ulemu wake: vinu nawe so ungadumulikako. 23Ndipo ŵaYuda, asani ŵareka uwura-chivwanu wawo, ŵaŵikikenge mu malo ghawo gha kali, chifukwa Chiuta waziŵa kuŵaŵikamo so mu malo gho ŵengamo kali, chifukwa Chiuta waziŵa kuŵaŵikamo so. 24Imwe ŵamitundu mwe nge ndi mphanda ya olive la mdondoyeniyo yapanthukako, ndipo kwambura kuyana ndi kaŵiro, yibatikika ku muti wa olive wakupandika. ŴaYuda ŵenge ndi muti uwu wakupandika, ndipo kuŵenge kupusu ukongwa kwaku Chiuta kubatika mphanda zakupanthuka izi ku chimuti chawo.
Lisungu laku Chiuta le paku wose
25Chifukwa, mwa ŵabali, kuti ndikhumba mureke kuziŵa mangari yagha cha (vinu mungaŵa ŵakujirumba), ghakuti chinononu chawiya Yisraele yo ku rwandi, 26mpaka urapasi wa ŵaMitundu ŵaseremo; ndi viyo Yisraele yose wakataskikanga: nge ndimo kwalembeke.
“Watuliyengemo mu Zioni muwombozi yo;
watuzgengeko uwura-chisopa kwaku Yakobe.”
27“Ndipo nchenichi chipanganu changu chakwaku wo,
penipo ndituzgenge vyakulakwa vyawo.”
28Kuchiri ku evangeli, mbamawongu chifukwa chaku imwe. Kweni kuchiri ku sankhu lo, mbakwanjiwa chifukwa cha ŵauskeu. 29Chifukwa vyawezi ndi mdanu vyaku Chiuta vizira mabezgeka. 30Chifukwa kwakulingana ndi mo kali imwe mungumtafuliya Chiuta, kweni sono mwachitikiya lisungu mu mtafu wawo viyo iwo nawo sono ŵatafula, 31alinga kuti mu lisungu lakuchitikiya imwe iwo nawo so ŵachitikiye lisingu sono. 32Chifukwa Chiuta waŵajariya wose ku mtafu, alinga waŵachitiye wose lisungu.
Ulemu ukuru waku Chiuta
33Ndimba nayo ya usambasi wa zeru ndi so wa mziŵiru waku Chiuta; vyeruzgu vyake vizira mapenjeka mbwenu, ndi nthowa zake zizira mateskeka!
34“Pakuti njani waziŵa chinjeru cha Mbuya?
Pamwenga ndi yani mpanga-fundu wawo?”
35“Pamwenga njani wadanga wapaska iyo,
ndipo kwaku iyo kwamwerezgeka so?”
36Chifukwa kutuwa kwaku iyo, ndi pa chifukwa chaku iyo, ndi kurata kwaku iyo, vye vyose. Kwaku mweniyo kuŵiyenge unkhankhu ku muyaya. Ameni.
Currently Selected:
ŴaRoma 11: TongaMw
Highlight
Share
Copy
Want to have your highlights saved across all your devices? Sign up or sign in
Bible Society of Malawi
