ŴaRoma 12

Umoyo mu uteŵete waku Chiuta

1Viyo ndikuŵeyereni, mwa ŵabali, chifukwa cha vyalisungu vyo vyaku Chiuta, kupereka maliŵavu ghinu sembe yamoyo yakupaturika, yamarondeka kwaku Chiuta, ndiyo uteŵeti winu wavinjeru. 2Ndipo mungajilinganizga ndi mgonezi uno cha: kweni mujisanduske mu kuchitika vifya vinjeru vinu, alinga kuti mwesenge imwe mo liriri khumbu lo laku Chiuta, lamampha ndi lamarondeka ndi lakufiskika.

3Chifukwa, ku wezi wakupaskika kwaku ine, ndimunene munthu yose wamwaku imwe, wareke kujipima kwakuruska po watenere kupimiya; kweni kupima kwakuziza, nge ndimo Chiuta wagaŵiya yose, yumoza ndi yumoza, chigaŵa cha chivwanu. 4Chifukwa uli ndimo tiliri navyo viŵaru vinandi mu liŵavu limoza, ndi viŵaru vyose vyo kuti vye ndi mlimu umoza pe cha. 5Viyo nanga teŵanandi te liŵavu limoza mwaku Kristu, kweni tose teviŵaru chimoza cha chinyake. 6Ndipo pakuŵa navyo vyawezi vyakupambanapambana uli ndi wezi wo wakupaskika kwaku ifwe, pamwenga utaula, titaule kwakulingana ndi mweso wa chivwanu; 7pamwenga uteŵeti, titakatakiye mu uteŵeti widu, pamwenga wakusambizga, mu usambizgi wake; 8pamwenga wakuchichizga, mu uchichizga wake; wakupaska vyawezi, mu wanangwa; wakuwusa mu phamphu; wakuchitiya lisungu, mu masangu.

9Chanju chinu chiŵe chamburafuvyu. Muŵe ŵakutinkha uheni, ndi ŵakumeremete ku umampha. 10Mu chanju chaubali mwanjani. 11Mureke kuŵa ŵakata mu machitidu ghinu, muŵe ŵamphamphu mu mzimu, teŵetiyani Ambuya. 12Ŵakukondwa muchigomezgu; ŵakukunthiyapo mu suzgu; ŵakufwiririyapo mu kuromba, 13muŵe ŵakusangana nawo mu maukavu gha ŵakupaturika; ŵakutakatakiya wezi ku ŵalendo.

14Ŵatumbikeni ŵeniwo ŵakuŵembani; tumbikani, ndi mungatemba cha. 15Kondwani pamoza ndi ŵakukondwa; tenjeni pamoza ndi ŵakutenje. 16Yanani mu mtima yumoza ndi munyake. Mungasuŵiriyanga vyathamu cha, kweni sunganani ndi ŵakuzimbwa. Mungaŵanga ŵakujirumba cha. 17Mungawerezge yumoza cha uheni pa uheni. Phwereni vyaulemu pa maso paku wose. 18Asani nkhwamachitika, ulindimo muziŵiya, muŵe mu chimangu ndi ŵanthu wose. 19Mwaŵakwanjiwa, mungajitayiya thayu cha, kweni ndereni malo ku kandundu kaku Chiuta; pakuti kwalembeka, “Thayu ndaku ine; ine ndamwerezgapo, watiti Mbuya.” 20Kweni, “Asani wamawongu wako ngwanja, muhiŵe ndi kurgha; asani ngwanyota, mumweske maji; chifukwa pakuchita viyo, urundenge pa mutu pake make gha moto.” 21Ungagodeka ndi uheni cha, kweni ugode uheni wo ndi umampha.

Currently Selected:

ŴaRoma 12: TongaMw

Highlight

Copy