Yohane 16

1“Ndakukambiyani vyenivi alinga kuti mureke kuguŵiskika. 2Wamkukusezgani ku masinagoge: inya, lituza ora, la kuti yose wakukubayani imwe wapimenge kuti wateŵete Chiuta. 3Ndipo vyenivi ŵachitenge chifukwa kuti ŵaziŵa Dada cha, chingana ndi ine. 4Kweni ndakukambiyani ivi, alinga kuti, penipo ora lawo laza, mukumbuke kuti ine ndingukuneniyani ndi vyenivyo.

Nchitu ya Mzimu Wakupaturika

“Kweni kuti ndingukuneniyani ivi pa mtendeku cha, pakuti ndaŵanga namwe pamoza. 5Kweni sono ndiruta kwaku yo wangundituma; ndipo palivi yumoza mwaku imwe wakundifumba, ‘Muta nunkhu?’ 6Kweni sono pakuti ndakukambiyani vyenivi, chisungu chazaza mtima winu. 7Nakweni naku ndikuneniyani uneneska, nkhwamampha kwaku imwe kuti ine ndirute: chifukwa asani ndiruta nkhamutumanga kwaku imwe. 8Ndipo watakuti waza iyo, wazampanikizgiya charu pa ulakwi, ndi pa urunji, ndi pa cheruzgu: 9pa ulakwi chifukwa wareka kuvwana mwaku ine; 10pa urunji, chifukwa nditiya ku Ada, ndi kuti mundiwonenge so cha, 11ndipo pa cheruzgu, chifukwa mura yo wa charu chino weruzgika.

12“Ndeche ndi vinandi kumkambiyani, kweni kuti mungaviyirika sono cha. 13Kweni penipo waza iyo, Mzimu wa uneneska, wazamkukurongozgani mu uneneska wose; chifukwa kuti wazamrongoro vyapa mtima wake cha; kweni vyose vyo watuvwa, wazamkamba: ndipo wazamkukuvumbuliyani vinthu vyo vituza. 14Iyo wazamkankhuska ine: pakuti watongeko vyangu, ndipo wamkuvivumbiliya kwaku imwe. 15Vyose vyo Ada ŵe navyo vyangu: rekani ndinguti, watongeko vyangu, ndipo wazamkuvivumbuliya kwaku imwe.

16“Kanyengo kamanavi kuti mundiwonenge so cha; ndipo so pavuli pa kanyengo kamanavi ndipo mwazamkundiwona.” 17Viyo ŵasambizi ŵake ŵangunenerana, “Nchine cho watitinene, ‘Kanyengo kamanavi, kuti mundiwonenge cha; ndipo so kanyengo kamanavi, ndipo mwamkundiwona’: ndi ‘Chifukwa nditiya ku Ada?’ ” 18Viyo wanguti, “Nchine cho watiti, ‘Kanyengo kamanavi’? Kuti tiziŵa cha cho warongoro.” 19Yesu wanguteska kuti ŵakhumbanga kumfumba, wangunena nawo, “Kumbi mufumbiskana paku chenichi, pakuti ndinguti, ‘Kanyengo kamanavi, kuti mundiwonenge cha, ndipo so kanyengo kamanavi, ndipo mwamkundiwona pavuli?’ 20Nadidi ndikuneneskiyani, muliyenge ndi mutenjenge imwe, kweni charu chikondwenge: muchitenge chisungu imwe, kweni chisungu chinu, chisandukenge chimwemwe. 21Munthukazi wachipapa we ndi chisungu, pakuti laza ora lake; kweni watakuti wapapa mwana, kuti wakumbuka so cha suzgu yake, chifukwa cha chimwemwe chakuti munthu wapapikiya mu charu. 22Namwe so viyo mwe ndi chisungu sono: kweni ndazamkukuwonani so, ndipo mitima winu wazamkondwa, chimwemwe chinu pazamuuravi yumoza wazamtuzgapo kwaku imwe. 23Ndipo mu zuŵa liya kuti mundifumbenge kanthu cha. Nadi ndikuneneskiyani, asani mwazampempha Ada kanthu, mu zina langu wazamkukupaskani. 24Kweni mpaka sono kuti mwapempha kanthu mu zina langu cha: pemphani ndipo murondenge, mwakuti chimwemwe chinu chiŵe chakuzala.

Yesu wapunda charu

25“Ndakukambiyani ivi muzinthatika; lituza ora penipo kuti ndikambiyenge namwe mu zintharika cha, kweni pakweru ndikutauliyeninge vyapa Ada. 26Mu zuŵa liya murombeyenge mu zina langu; ndipo kuti ndikamba kuti ine ndifumbiyenge Ada paku imwe cha. 27Chifukwa Ada iwo ŵeneko atukwanjani, atukwanjani pakuti imwe mwandanja ine, ndipo mwavwana kuti ine ndikutuwa ku Ada. 28Ndikutuwa ku Ada, ndipo ndaza mu charu: ndipo so ndireka charu ichi ndiruta ku Ada.”

29Ŵasambizi ŵake ŵanguti, “Awonani, sono murongoro pakweru, ndipo kuti mukamba muntharika so cha. 30Sono tiziŵa kuti muziŵa vyose, ndipo kuti mukavuka cha kuti yumoza wakufumbeni: mwaku chenichi tivwana kuti mungutuliya kwaku Chiuta.” 31Yesu wanguŵamuka, “Kumbi sono mwavwana? 32Awonani, ora lituza, ndipo nadi lafika, lakuti mumbininikenge imwe munthu yose ku nyumba yake, ine mundisiyenge ndija: ndikweni kuti nde ndija cha, pakuti Ada we nane pamoza. 33Ndakukambiyani vyenivi, alinga kuti mwaku ine muŵe ndi chimangu, mu charu mwe ndi suzgu: kweni khwimani mtima; ine ndachipunda charu.”

Currently Selected:

Yohane 16: TongaMw

Highlight

Copy