Yohane 17

Yesu warombe ŵasambizi ŵake

1Yesu wanguti wamara kurongoro; wangwinuskiya maso ghake kuchanya, ndi wanguti, “Ada, ora lo laza: kankhuskani Mwana winu, alinga kuti Mwana wakankhuske imwe. 2Pakuti mwampaska mtufu wapa munthu yose, alinga kuti wapaske umoyo wamuyaya kwaku wose wo mwampaska. 3Ndipo chenichi mbumoyo wamuyaya, kuti ŵanthu ŵakuziŵeni imwe, Chiuta yija muneneska ndi so Yesu Kristu mweniyo mungutuma. 4Ine ndarongo unkhankhu winu panupasi; mwakuti ndafiska nchitu yo mungundipaska kwachichita. 5Ada! Ndipaskeni unkhankhu mu maso ghinu sono, nge mbunkhankhu wo ndaŵanga nawo kwinu, chenga chindaŵepo charu.

6“Zina linu ndalivumbuwa ku ŵanthu wo mwandipaska; ndipo ŵasunga mazu ghinu. 7Sono ŵaziŵa kuti vyose vyenivyo mwandipaska, vituwa kwinu. 8Pakuti mazu gho mungupaska ine, ndaŵapaska iwo; ndipo iwo ŵagharonde; ŵaziŵadi kuti mbuneneska kuti ndingutuliya kwaku imwe, ndipo ŵavwana kuti imwe mungundituma. 9Ine ndarombe iwo; kuti ndirombe charu cha, kweni ŵeniwo mwandipaska; pakuti mbinu, 10ndipo vyose vyangu vinu, ndi vinu vyangu; ndipo ndikankhuskikiya mwaku wo. 11Ndipo sono kuti nde mu charu cha, kweni iwo ŵemu charu, ine ndituza kwaku imwe, Ada Wakupaturika, wasungiyeni mu zina linu wo imwe mwandipaska, alinga kuti ŵaŵe ŵamoza, nge ndifwe 12Penipo ndenge pamoza nawo, ndaŵasungiyanga ine mu zina linu wo mwandipaska; ndipo ndinguŵasungirizga, kwauravi yumoza waku wo watayika, kweni mwana wo chitayiku pe ndiyo; mwakuti lifiskike lembo lo; 13kweni sono ndituza kwaku imwe; ndipo vyenivi ndirongoro mu charu, kuti ŵaŵe ndi chimwemwe changu chakufiskika mwaku iwo ŵija. 14Ine ndaŵapaska mazu ghinu; ndipo charu cho chaŵatinkha, pakuti kuti mba charu cha, nge ndimo ine ndiriri wa charu cha. 15Kuti ndiromba cha kuti muŵatuzge mu charu, kweni kuti muŵasunge ku mheni yo. 16Kuti mba charu cha, uli ndimo ine kuti ndiriri wa charu cha. 17Wapatuliyeni mu uneneska wo: mazu ghinu mbuneneska. 18Mo mungutumiya ine mu charu, ine nane ndaŵatuma iwo mu charu. 19Pa chifwa chaku wo ndijipatuliya, alinga kuti nawo so ŵaŵe ŵakupatulikiya mu uneneska.

20“Ndipo kuti ndirombe iwo pe cha, kweni ŵeniwo so ŵavwaniya mwangu chifukwa cha mazu ghawo; 21kuti wose ŵaŵe ŵamoza uli ndimo imwe, Ada, muliri mwaku ine, ndi ine mwaku imwe, kuti nawo so ŵaŵe mwaku ifwe; alinga kuti charu chivwane kuti imwe mungundituma. 22Ndipo unkhankhu wo mwandipaska ine ndapaska iwo; alinga kuti ŵaŵe ŵamoza, uli ndimo ifwe tiriri ŵamoza; 23ine mwaku iwo, ndi imwe mwaku ine, alinga ŵaŵe ŵakufiskikiya mu umoza; kuti charu chiziŵe kuti imwe mungundituma, ndipo kuti mwaŵanja iwo, uli ndimo mwandanjiya ine. 24Ada, wo mwandipaska, ndikhumba kuti ko nde ine, iwo nawo ŵaŵe pamoza nane; mwakuti ŵawone unkhankhu wangu, weniwo mukundipaska; pakuti mungundanja, chenga chindajarikike charu. 25Ada ŵarunji, charu kuti chakuziŵani imwe cha, kweni ine ndakuziŵani; ndipo ŵenaŵa ŵaziŵa kuti imwe mwandituma. 26Ndaŵaziŵiska zina linu, ndipo ndikaliziŵiskanga; alinga kuti cho chanju chenicho mwandanja nacho, chiŵe mwaku iwo, ndi ine mwaku iwo.”

Currently Selected:

Yohane 17: TongaMw

Highlight

Copy