Yohane 15

Yesu ndi mphereska yeneko

1“Ine ndine mphereska yeneko, Ada mbalimi. 2Mphanda yose mwaku ine yambura kupasa, atiyipantha: ndipo yose yakupasa atiyitenguliya, mwakuti yipase vinandi. 3Imwe mwe ŵakutengulika kali chifukwa cha mazu gho ndarongoro namwe. 4Jani mwaku ine, ndi ine mwaku imwe. Mo mphanda yirive nthazi kujipasiya yija, kwambura kuti yijaririya mu mphereska yo, viyo so chingana ndimwe, kwambura kuti mujaririya mwaku ine. 5Ine ndine mphereska yo, imwe mwe mphanda zo; wakujaririya mwaku ine, ndi ine mwaku iyo, mweniyo ndiyo wapasa vinandi: chifukwa kwambura ine kuti muziŵa kuchita kanthu cha. 6Asani munthu wareka kujaririya mwaku ine, wapong'eka kubwaro nge ndi mphanda, wamira; ndipo ŵaunjika mphanda zo, watizipong'a mu moto, ndipo zitocheka. 7Asani mujaririya mwaku ine, ndi mazu ghangu ghajaririya mwaku imwe, chose cho mungakhumba pemphani, ndipo chikuŵiyeninge, 8Mwaku chenichi akankhuskika Ada, pakuti mupasa vinandi; ndipo viyo muŵenge ŵasambizi ŵangu. 9Nge ndimo wandanjiya Dada, nane so ndakwanjani: jaririyani mu chanju changu. 10Asani musunga marangu ghangu, mujariryenge mu chanju changu; ngendimo ine ndasungiya marangu gha Ada, ndipo ndijaririya mu chanju chawo. 11Vyenivi ndakukambiyani, alinga kuti chimwemwe changu chiŵe mwinu, ndi kuti chimwemwe chinu chifiskike.

12“Lenili ndi languli langu, lakuti, mwanjane, nge ndimo ine ndakwanjiyani. 13Chanju chikuru kwakuruska cho munthu wangaziŵa kuŵa nacho pa ŵabwezi ŵake, nkhupereka umoyo wake ku chifwa chaku wo. 14Imwe mwe ŵabwezi ŵangu, asani muchita vyenivyo ine ndikulanguliyani. 15Kuti ndikuzumbuwani ŵaŵanda so cha; chifukwa muŵanda walive kuziŵa cho wachita mbuyake: kweni ndakutamulani ŵabwezi; pakuti ndakuziŵiskani vyose vyo ndavwa ku Ada. 16Kuti ndimwe mungusankha ine cha, kweni ndine ndingusankha imwe, ndipo ndingukumikani, kuti mukapase vipasi, ndi kuti vipasi vinu vijaririye; alinga kuti chose cho mungapempha Dada mu zina langu, wakupaskeninge. 17Ichi ndicho nditukulanguliyani, kuti mwanjane.

Kutinkha kwa charu

18“Asani charu chitukutinkhani ziŵani kuti chadanga chitinkha ine, chenga chindatinkhe imwe. 19Asani mwenga ŵa charu ichi, mphanyi charu chamwanjani nge mbanthu ŵapa mtima wake: kweni chifukwa kuti mwe ŵa charu cha, ine ndakusankhani mu charu, chifukwa chenichi chikutinkhani charu cho. 20Kumbukani, mazu gho ndingukuneniyani, ‘Muŵanda kuti ndi muraku ku mbuyake cha.’ Asani ŵanguŵemba ine, imwe namwe ŵamkukuŵembani, asani ŵangusunga mazu ghangu, ghinu nagho ŵamsunga. 21Kweni vyose ivi ŵakakuchitiyaninga pa chifwa cha zina langu, pakuti ŵalive kumuziŵa yo wangundituma. 22Asani ndengavi kuza ndi kurongoro nawo, mphanyi ŵengavi ulakwi; kweni sono ŵalive mphandira wapa ulakwi wawo. 23Wakutinkha ine, watinkha Ada so nawo. 24Asani ndengavi kuchita mwawo nchitu zo munyake wengavi kuchita, mphanyi ŵanguuravi chilakwa: kweni sono kosekose ŵawona ndi ŵatinkha ine ndi Ada so nawo. 25Kweni nchakuti ghafiskike mazu gho ghalembeka mu langulu lawo, ‘Wangunditinkha waka.’ 26Kweni penipo Nkhoswi yo yitakuti yaza, yeniyo ine nkhatumanga kwaku imwe kutuwa ku Dada, Mzimu yo wa uneneska, yo watuwa ku Dada, iyo wamsimikizga vyapaku ine; 27ndipo imwe namwe mwe ŵakoboni, pakuti mwavwa nane pamoza ku mtendeku.

Currently Selected:

Yohane 15: TongaMw

Highlight

Copy