E'yo Eceza 7

’Ba alifu toru alu drini kali su drini su eceta be yi ruaa ’diyi

1 # Yer 49:36; Dan 7:2; Zek 6:5; Eze 7:2; 37:9; Mat 24:31 ’Di ma vutia ma ndre malaika su ’diyini pa soria nyaku ma kalati su ’diyia, yi bi oli nyakua su ’diyi ci, oli kazu lizu nyakua, kani miria, kani pati azini ma ruaa dria ku. 2Te ma mire malaika azinini eturia engazu kala etuni efurialeruria, eri eceta afa ti opizu Mungu idriruriniri be; eri oyu uru o’duko urusi malaika su yini okpo fele yi dri nyaku pi ezazu miri be ’diyi ma tia, 3#Eze 9:4, 6kini, Emi eza nyaku pi, miri pie, pati ’diyi pie dria ku, cazu amani eceta o’bazu ati’ba Mungu amanirini ma andretiaria. 4#Eceza 14:1, 3Ma eri ’ba yini eceta o’bale yi ma dria ’diyi ma kalafe, eri alifu turu alu drini kali su drini su, yi ’ba eceta a’ipi engazu suruti ndu ndu anzi Israelini ’diyini ma eselia dria ’diyi: 5engazu suru Yudani ma eselia yi o’ba eceta ’ba alifu mudri drini iri ’diyi ma dria, engazu suru Reubenini ma eselia ’ba alifu mudri drini iri, engazu suru Gadini ma eselia ’ba alifu mudri drini iri, 6engazu suru Aserini ma eselia ’ba alifu mudri drini iri, engazu suru Nafutalini ma eselia ’ba alifu mudri drini iri, engazu suru Manaseni ma eselia ’ba alifu mudri drini iri, 7engazu suru Simeonini Ina eselia ’ba alifu mudri drini iri, engazu suru Levini ma eselia ’ba alifu mudri drini iri, engazu suru Isakarini ma eselia ’ba alifu mudri drini iri, 8engazu suru Zebulunini ma eselia ’ba alifu mudri drini iri, engazu suru Yusufuni ma eselia ’ba alifu mudri drini iri, engazu suru Benyaminini ma eselia yi o’ba eceta ’ba alifu mudri drini iri ’diyi ma dria.

’Ba ongulumuru suza emveru supi’diyi

9 # Eceza 6:11 E’yo ’diyi ma vutia ma ndre ra, te mi ne, ’ba ongulumuru amboru ’ba alunini ecole lale ku, engapi suruti, dria pi ma eselia, suru dria pie, ’ba pie, ti ’yoza pie dria ’diyini pa soria oguna ma drilia azini Kabilomva ma drilia, suzaru afa suza izuru emverosi, azini ndende be yi dria; 10#Eceza 12:10yi oyu uru o’duko urusi kini, Pata eri Mungu amani ripi oguna driarini azini Kabilomvani! 11#Eceza 5:11; 11:16Malaika dria oso pa kuru oguna ma ageia, ’ba wara pie, anyapa idriru su ’diyi pie; nga di yi eco o’bukuru va oguna ma drilia Mungu inzizu, 12kini, Amena! Asi ndriza pi, diza pie, ondua pie, awa’difo pie, inzita pie, okpo pie, okpo e’yo ’yezuri pie, ma ovu Mungu amani vu kpere ’dani ’dani! Amena.

13’Ba ’wara ma azi alu omvi e’yo ma tia, kini, ’Ba osule afa suza izuru emverusi ’diyi a’di piyi ya, yi ibi enga ngole ya? 14#Dan 12:1; Mat 24:21; Mar 13:19; E’do 49:11; Ebra 9:14Ma ’yo eri tia, Opi mani la, mi ni yi mi’i. Eri nga di ’yo ma tia, ’Ba ’diyi ’ba efupi inzata amboruri ma alia, yi ma bongo ojipi ’bazu emveru Kabilomva ma arisi ’diyi.

15 # Eceza 21:3, 22 E’yo ’disi yi ovu oguna Munguni ma drilia, azi ngazu eri dri hekalu erini ma alia etu zu ini be rra; ’ba ripi oguna driari nga hema ini aso yi ma dria.

16 # Isa 49:10 Yi ngani ovu abiri be dika ku, yi avijo ngani yi fu dika ku; etu ngani ’de yi ma ruaa onzi ku, driza be dria.

17 # Zab 23:1; Eze 34:23; Zab 23:2; Isa 49:10; 25:8; Eceza 5:6; Yer 2:13; 31:16 A’disiku Kabilomva ovupi oguna ma eseliari nga yi oceni, eri nga vini yi dri ce yi a’di idrini ’diyi vu; te Munguni nga mindre yi ma milia ’diyi ini dria.

Currently Selected:

E'yo Eceza 7: LB66

Highlight

Copy