Matayo 9

Yesuni ’ba acozari atizu

1 # Mar 2:1-12; Luk 5:17-26 # Mat 4:13 Eri nga fi ogurua zozu aa’dasi cazu aku ’amboru erinia. 2Mi ndre, yi nga ’ba acozaru eji vunia eri la gbolo dria;Yesuni a’ita yini ndreria,nga’yo’ba acozaruri ma tia,Mva mani,mi bi mi asi;e’yo onzi mini ovu wuzaru. 3#Mar 2:7Mi ndre, ’ba waraga sipi’diyi ma azi nga ’yo yi asia Ba ’diri eri Mungu o’da. 4#Mat 12:25; Yoh 2:25Te yesu e’yo osuza yini niria, nga yo ra, Emi osu e’yo onzi emi asia a’disi ya? 5Ewa kokoruri ngori, ’yozu, E’yo onzi mini ovu wuzaru, kani ’yozu, Mi nga, mi aci-ri’i ya? 6Te emini nizu ani Mvi ’bani ovu okpo be nyakua e’yo onzi wuzu--eri nga di ’yo ’ba acozaruri ma tia-Mi nga, mi ’du gbolo mini, mi mvi mi vile akua. 7Eri nga enga mvizu aku erinia. 8Te ’ba ongulumuru ka ndre ra yi ovu urisi, yi nga diza fe Mungu okpo fepi ’ba dri ’dopi ’doniri dri.

Yesuni Matayoni omvezu

9 # Mar 2:13-17; Luk 5:27-32 Yesuni agaria ’dasi, eri nga ’ba ndre erini riria pari ’bani musoro ’bezuria, runi Matayo’i; nga ’yo tinia, Mi bi ma vuti. Eri nga enga ra, nga eri ma vuti bi.

10 # Luk 15:1-2 Eri nga eca ’dini, erini riria joa nyaka nyaria, mi ndre, ’ba musoro sopi ’diyi ’ba e’yo ezapi ’diyi be kakau nga emu ri pari alua Yesu pi vu ’ba erini imbale ’diyi be. 11’Ba Farisaini ka ndre ra, yi nga ’yo ’ba erini imbale ’diyi ma tia kini, ’Ba emi imbapiri eri nyaka nya ’ba musoro sopi ’diyi be, ’ba e’yo ezapi ’diyi pie, a’disi ya? 12Te eri ka eri ra, eri nga ’yo, ’Ba rua be alaru leni ojou ku, te ’ba rua onzi be ’diyi leni 13#Mat 12:7; Hos 6:6; 1 Sam 15:22; 18:11Te emi mu e’yo ’diri ma e onizu, Ma le yikini, ma leni afa feza edetaruri ku. Te ma emuni ndra ’ba kililiru ’diyi omvezu ku, te ’ba ezata be’diyi.

Zita nyaka ’daza ma e’yosi

14 # Mar 2:18-22; Luk 5:33-38 # Luk 18:12 ’Ba Yohanani imbale ’diyi nga di emu eri vu, ’yozu kini, Ama’i ’ba Farisaini be, ama adri nyaka ’da, te ’ba mini imbale ’diyi ’dani nyaka ku a’disi ya? 15#Yoh 3:29Yesu nga ’yo yi tia, Anzi omu oku jezuria ’diyi, eco yini awu wuzaru de izioni yi be indi ya? O’du izioni i esele cozu yi beri nga eca ra; yi nga di nyaka ’da etu ’dasi ndo. 16#Yoh 1:17’Ba aluni ecini bongo o’diru ojile kuri afa suza okuri ma ruaa ku, a’disiku rogani nga afa suza nde ma mile oku, ceta nderi nga eca onzikanyaru aga ra. 17’Ba econi patiefi ma su o’diru tozaru enyi okuri ma alia ku; ’ba ka ’ye ’dini, enyini nga asi ra, patiefi ma suni nga i da va, enyini nga i eza teketeke indi; te ’ba yi patiefi ma su o’diru to enyi o’diru ma alia, yi nga yi ta mba iritro.

Opi zi pi oku Yesu ma bongo elopiri be

18 # Mar 5:22-43; Luk 8:41-56 Erini e’yo ’diyi ’yoria yi tia, mi ndre, ’ba amboru nga eca ra, nga eri inzi,kini Ma zi de cucuru’do; te mi emu, mi ti mi dri eri ruaa, eri nga ovu idriru. 19Yesu nga enga eri vuti bizu, ’ba erini imbale ’diyi be. 20Te mi ndre, oku arini razu ruania eli mudri drini iriri nga eca eri ma ngukualeru, nga afa suza erini ma ti elo; 21#Mat 14:36te eri ’yo i asia kini, Ma ka bongo erini elo a’dule, ma ruani nga ati ra. 22Te Yesu nga ti co ngukuleru, nga eri ndre ra, nga ’yo kini, Zaa, mi bi mi asi; a’ita mini ati mi rua ’bo. Oku ma rua ati etu ’dasi ra. 23Yesu ka eca ’ba amboru ma joa, eri nga ’ba guka vupi ’diyi ndre, ’ba ongulumuru otrepi ’diyi be, 24#Yoh 11:11, 14, 25eri nga ’yo ra, Emi da emi ’dale; te zamva drani ku, eri o’du ko. ’Ba nga eri Ogu tu. 25Te ’ba ongulumuru ka ovu drozaru amve ’bo, eri nga fi ra, nga eri ma dri bi; zamva nga enga ra. 26E’yo ’diri ku angu ’dari ma alia dria.

Ba mile kokoru iri ’diyini angu ndrezu

27Yesuni agaria ’dasi, ’ba mile draza be iri nga eri vuti bi, yi nga oyu uru, nga ’yo ra, Mi ovu yikisi ama vu, mi Mvi Daudini. 28Eri ka fi joa ’bo, ’ba mile draza be ’diyi nga emu eri vu; Yesu nga ’yo yi tia, Emi a’i ma eco e’yo ’diri ’yezaru ya? Yi nga ’yo eri tia, E, Opi. 29#Mat 8:13Eri nga di yi mile elo, kini, Ma ovu ’yezaru emi dri a’ita emini vusi. 30#Mat 8:4Yi mile nga yi zi ra. Yesu nga yi imba okposi kini, Emi ndre ’ba azini ma ni e’yo ’diri ku. 31Te yi nga fu, e’yo erini ekuzu wakaka angu ’dari ma alia dria.

Ba e’yo ’yopi kurini e’yo ’yozu

32Yini efuria, mi ndre, yi nga ’ba e’yo ’yopi ku, orindi onzi beri eji eri vu. 33Eri ka orindi onzi dro ’bo, ’ba e’yo ’yopi kuri nga e’yo ’yo; te ’ba ongulumuru nga osu tu, ’yozu kini, Drio e’dani ’dini ’ba Israelini ma eselia ku. 34#Mat 10:25; 12:24; Mar 3:22; Luk 11:15Te ’ba Farisaini nga ’yo ra, Eri orindi onzi odro opi orindi onzi ma driliarisi.

Asi ndriza Yesuni ’ba vu

35 # Mat 4:23; Mar 1:39; Luk 4:44 Yesu nga aci aku ambo ’diyi ma eselia aku nyiri ’diyi be dria, ’ba imbaria pari yini yi okuzuria, e’yo bari suruniri oluzu, azo dria atizu, dra be dria. 36#Kal 27:17; 1 Opi 22:17; 2 Sur 18:16; Eze 34:5; Mar 6:34; Mat 14:14Te erini ’ba ongulumuru ndreria, eri nga ovu asi ndrizasi yi vu, yini ovule andezaru azini yini yi erele ekile kabilo ovupi ’ba yi ocepiri kokoru ’diyilerisi. 37#Luk 10:2Eri nga ’yo ’ba erini imbale ’diyi ma tia, Afa kaza kakau ada, te ’ba azi ngapi ’diyi yi were; 38emi zi ani Opi afa kazaniri ma tia, ma pe ’ba azi ngapi ’diyi ma ti afa kaza erini ma alia.

Currently Selected:

Matayo 9: LB66

Highlight

Copy