प्रेरित 7

स्तिफनुस रा भाषण

1तैबै महापुरोहित बोलू, “कि ऐ दोष सच़ सा?”

2तेइयै बोलू, हे भाइयो बैहणियो, होर बजुर्गो शुणा, आसरा बुज़ुर्ग अब्राहम हाराना नगरा न रौहणै न पैहलै ज़ैबै मैसोपोटामिआ प्रदेशा न ती ता महिमामय परमेश्वरै तेइबै दर्शन धिना, 3होर तेइबै बोलू कि तू आपणै देश होर परिवारा न निकल़िया तेई देशा बै ज़ा ज़ो मूँ तौभै रिहाणा।

4तैबै सौ कसदी रै देशा न निकल़िया हारान नगरा न रौहू होर तेइरै बापू री मौऊत न बाद परमेश्वरै सौ तौखै न आंणिआ ऐई देशा न बसाऊ ज़ौखै तुसै रौहा सी, 5होर तेई बौगतै परमेश्वरै अब्राहमा बै औखै कोई ज़मीन नी धिनी, औखै तक कि ज़मीना रा थोड़ा ज़ेही टुकड़ा बी नी धिना, ज़ो तेई रा होंदा; फिरी तेइयै ऐ वायदा केरु कि मूँ ऐ देश तेरै बाद तेरै खानदाना बै देणा; बल्कि तेई बौगत तेइरी कोई औलाद नी ती ऑथि। 6परमेश्वरै ऐ बी बोलू, तेरी औलादै रै लोका पराऐ देशा न परदेशी होंणै होर तिन्हां ते गुलाम बणाणै होर च़ार शौऊ बौर्षा ढौई दु:ख देणा। 7तैबै परमेश्वरै बोलू, ज़ुणी ज़ाति रै तिन्हां गुलाम होंणा मूँ तेसा ज़ाति बै सज़ा देणी होर तिन्हां तेई देशा न निकल़िया ऐई देशा न एज़िया मेरी आराधना केरनी। 8परमेश्वरै अब्राहमा सैंघै खतना केरनै रा वायदा केरू; होर एसा दशा न तेइरै इसहाक पैदा हुआ। होर औठुऐ रोज़ै तेइरा खतना केरू, होर इसहाका न याकूब होर याकूबा न बारा गोत्र पैदा हुऐ।

9होर तिन्हैं यूसुफा सैंघै जलन केरिआ सौ मिस्र देशा बै ज़ाणू आल़ै लोका बै बैच़ू पर परमेश्वर तेई सैंघै ती। 10परमेश्वरै यूसुफा बै सैभी दु:खा न छुड़ाईआ तेइबै मिस्रै रै राज़ै फिरौना सामनै अनुग्रह होर बुद्धि धिनी, फिरौन राज़ै यूसुफा बै मिस्र होर आपणै पूरै घरानै रा राज़पाल ठहराऊ।

11ज़ैबै यूसुफ राज़पाल ती, तैबै सारै मिस्र होर कनान देशा न अकाल पौऊ; ज़ुणी सैंघै बड़ा भारी दु:ख हुआ होर आसरै बुज़ुर्गा बै रोटी खाँणै बै नी ती मिलदी। 12पर याकूबै ऐ शुणिआ कि मिस्र देशा न नाज़ सा आसरै बापदादै पहली बार भेज़ै, 13होर दुज़ी बार ज़ैबै ते नाज़ आंणदै नौठै, ता यूसुफ आपणै भाई सामनै प्रगट हुए, होर यूसुफै री ज़ाति फिरौन राज़ै बै पैता च़ली। 14तैबै यूसुफै आपणा बापू याकूब होर पूरा परिवार ज़ो कि पझतर मांहणु ती ते मिस्र देशा बै शाधै। 15तैबै याकूब मिस्रा बै नौठा होर तौखै आसरै ते बुज़ुर्ग मूँऐ, 16होर ते शिकिम नाँ री ज़ैगा न पजाइआ तेसा कब्रा न रैखै ज़ो अब्राहमै च़ाँदी देइआ हमोरै री औलादा न खरीदू ती।

17पर ज़ैबै तेई वायदै रै पूरै होंणै रा बौगत नेड़ आऊ ज़ो परमेश्वरै अब्राहमा सैंघै केरू ती तैबै तैंईंयैं मिस्रा न ते लोका बढ़दै रौहै होर बोहू हुऐ, 18ज़ैबै तैंईंयैं कि मिस्रा न दुज़ा राज़ा नी हुआ ज़ो यूसुफा बै नी ती ज़ाणदा। 19तेइयै आसरी ज़ाति सैंघै चतुराई केरिआ आसरै बुज़ुर्गा सैंघै ऐतरा बुरा बर्ताव केरू कि तिन्हां आपणै पैदा होंदै शोहरू शेटणै पौऐ कि ते ज़िन्दै नी लोड़ी रौहै।

20तेई बौगतै मूसा पैदा हुआ होर सौ परमेश्वरै री नज़री न बोहू बाँका ती होर त्रा म्हीनै तैंईंयैं आपणै बापू रै घौरा न चुपचाप धाचुआ। 21पर ज़ैबै सौ पाणी न शेटुआ ता फिरौन राज़ै री बेटीयै सौ च़कू होर आपणै बेटै बणाइआ धाचू, 22होर मूसा बै मिस्री री सारी विद्या पढ़ाई। मूसा सैभी गैला होर कोमा न सामर्थी ती।

23ज़ैबै मूसा च़ाल़ी बौर्षा रा हुआ ता तेइरै मना आपणै इस्राएली भाई सैंघै मिलणै रा विच़ार आऊ, 24होर तौखै तेइयै एकी इस्राएली मांहणु पैंधै ज़ुल्म होंदै हेरिआ सौ बच़ाऊ होर तेई मिस्री मारिआ तेथा रा बदला लेऊ। 25तेइयै सोच़ू कि मेरै भाई समझ़णा कि परमेश्वरा मेरै हौथै तिन्हरा उद्धार केरना पर तिन्हैं नी समझ़ू। 26दुज़ै ध्याड़ी ज़ैबै ते आपु न लड़दै लागै ती ता सौ तौखै आऊ होर समझ़ाऐ कि तुसै ता भाई-भाई सी तुसै एकी होरी सैंघै किबै लड़ा सी?

27पर ज़ो आपणै पड़ेशी सैंघै अन्याय केरदा लागा ती तेइयै सौ ऐण्ढै बोलिआ हटाऊ कि तू कुणिऐ आसा पैंधै हाकिम होर फैसलै केरनु आल़ा ठहराऊ? 28ज़ुणी रीतियै तैं काल मिस्री मारू तू कि तेसा रीतियै मुँभै बी मारना चाहा सा? 29ऐसा गैल शुणिआ मूसा डौरू होर तौखै न भैगू होर मिद्दान देशा न परदेशी होईया रौंहदा लागा होर तौखै तेइरै दुई बेटै पैदा हुऐ।

30ज़ैबै पूरै चाल़ी बौर्षा बीती ता परमेश्वरा रै एकी स्वर्गदूतै सीनै नाँ रै ढौगै रै सुनसान ज़ैगा न भौकदै झ़ौकड़ै रै ज़रियै दर्शन धिना। 31ज़ैबै मूसै भौकदै झ़ौकड़ हेरे कि सौ निसी फूकिदै लागै, ऐ हेरिआ सौ हैरान हुआ होर ज़ैबै सौ हेरनै री तैंईंयैं भेटी नौठा ता प्रभुऐ तेइबै ऐ बोलू, 32हांऊँ तेरै बुज़ुर्ग, अब्राहम, इसहाक होर याकूबा रा परमेश्वर सा। तैबै मूसा डौरै लाईया कोमदा लागा होर तेइबै हेरनै री हिम्मत नी रौही।

33तैबै प्रभुऐ तेइबै बोलू, “मेरा आदर केरनै री तैंईंयैं आपणी ज़ोंघा न बूट खोल किबैकि ज़ौस ज़ैगा न तू खड़ा सा सौ पवित्र ज़ैगा सा। 34मैं सच़िऐ आपणै लोक ज़ो मिस्र देशा न सी तिन्हरी बुरी दशा हेरी सा। मैं तिन्हरा चोंणना होर रोणां शुणू सा। मूँ ते ऐबै छुड़ाणै। ऐबै एज़ मूँ तू मिस्र देशा बै भेज़णा।

35“ज़ुणी मूसा बै तिन्हैं नकारा बोलू ती सौहै परमेश्वरै भौकदै झ़ौकड़ा न दर्शन देइआ स्वर्गदूतै रै ज़रियै तिन्हां पैंधै हाकिम होर छड़ाणू आल़ा ठहराऊ होर मिस्र देशा बै भेज़ू। 36ऐई मांहणुऐ ते मिस्र देश, लाल समुन्द्र होर बौणा न चाली बौर्षा तैंईंयैं नौखै कोम होर चिन्ह च़मत्कार रिहाई-रिहाइआ कौढिआ आंणै।

37“ऐ सौहै मूसा ज़ुणियै इस्राएली लोका बै बोलू कि परमेश्वरा तुसरै भाई मौंझ़ै न मूँ सांही एक भविष्यवाणी केरनु आल़ा च़कणा। 38ऐ सौहै मूसा सा ज़ुणियै बौणा न कलीसिऐ रै बीच़ा न तेई स्वर्गदूता सैंघै सीनै नाँ रै ढौगा पैंधै तेई सैंघै गैला केरी होर आसरै बुज़ुर्गा सैंघै ती। तेइबै परमेश्वरै रै ज़िन्दै वचन मिलै कि सौ आसा तैंईंयैं पजाला।

39“पर आसरै बुज़ुर्गै तेइरी नी मैनी बल्कि तेइबै हटाइआ आपणै मन मिस्र देशा धिराबै फेरै, 40होर तेइरै भाई हारूना बै बोलू, आसरै तैंईंयैं ऐण्ढा देऊ बणा ज़ो आसा आगै-आगै च़लला किबैकि ज़ुणी मूसै आसै मिस्रा न कौढै सी आसै नी ज़ाणदै कि तेइबै कि हुआ? 41तिन्हां ध्याड़ै न तिन्हैं बौछ़ू री एक मूरत बणाई होर तेसा मूर्ति हागै बलि धिनी होर ते आपणै हौथै रै कोमा न मगन होंदै लागै। 42ऐथा बजहा न परमेश्वरै तिन्हां न मुँह मोड़ू होर ते छ़ौड़ी धिनै कि ते सर्गा रै सूर्य, चाँद होर तारै बै देऊ बणाईया पूज़लै। ज़ैण्ढा कि भविष्यवाणी केरनु आल़ै री कताबा न लिखू सा,

“हे इस्राएली लोको कि तू सुनसान ज़ैगा न च़ाल़ी बौर्षा तैंईंयैं

पशु री बलि होर नाज़ै री बलि मुँभै च़ढ़ाँदा रौहू?

43होर तुसै देऊ मोलेका रै तोम्बू होर

रिफान देऊऐ रै तारै बै लेइआ फिरदै रौहा ती,

मतलब तिन्हां चीज़ा बै ज़ो तुसै आराधना केरनै री तैंईंयैं बणाई ती।

तैबै मूँ तुसै बैबीलोन देशा न पौरै नेइया बसाणै।

44“परमेश्वरा री मौज़ुदगी रा तोम्बू सुनसान ज़ैगा न आसरै बुज़ुर्र्गा रै बिच़ा न ती। ज़ैण्ढा कि परमेश्वरै मूसा बै बोलू ती कि ज़ो आकार तैं हेरू सा तेथै रै मुताबक तू ऐईबै बणा। 45बोहू बौर्षा बाद सौहै तोम्बू आसरै बुज़ुर्गै पैहलै काला न लेइआ यहोशू सैंघै औखै आंणु। ज़ौस बौगतै तिन्हैं होरी ज़ाति रै लोका पैंधै हक पाऊ, ज़ो परमेश्वरै आसरै बापदादै सामनै न कौढै ती होर सौ तोम्बू दाऊद राज़ै तैंईंयैं रौहू। 46परमेश्वरै दाऊदा पैंधै अनुग्रह केरू। तेइयै अर्ज़ केरी कि मूँ याकूबै रै परमेश्वरै री तैंईंयैं एक तोम्बू बनाणा। 47पर तेइरै बेटै सुलैमान राज़ै तेइरी तैंईंयैं एक मन्दिर बणाऊ।

48“पर परमप्रधान परमेश्वर हौथै लाइआ बणाऐदै मन्दिरा न नी रौंहदा। ज़ैण्ढा कि यशायाह भविष्यवक्तै बोलू कि,

49“परमेश्वर बोला सा, स्वर्ग मेरा सिंहासन,

होर धौरती मेरै ज़ोंघै री पौटड़ी सा,

मेरी तैंईंयैं तुसा कौस किस्मा रा मन्दिर बणाणा?

होर मेरै बशाँ री कुण ज़ेही ज़ैगा होंणी?”

50कि ऐ सारी चीज़ा मेरै हौथै री बैणी दी नी ऑथि? हे हठी, मन होर कोनै रै खतनै नी केरूऐदै लोको, तुसै हमेशा पवित्र आत्मा रा सामना केरा सी।

51“हे हठी, होर मन होर कोनै रै खतनारहित लोको, तुसै सदा पवित्र आत्मा रा बरोध केरा सी। ज़ैण्ढा तुसरै बुज़ुर्ग केरा ती, तैण्ढाऐ तुसै भी केरा सी। 52तुसरै बुज़ुर्गै कुणा ज़ेही भविष्यवाणी केरनु आल़ै नी सताऐ, होर तिन्हैं पैहलै काला न तेई धर्मी रै बारै न खबर देणु आल़ै मारै होर तुसै भी तेइबै ढौकणु आल़ै होर मारनू आल़ै हुऐ। 53तुसाबै स्वर्गदूतै ठहराई दी बिधान ता मिली पर तिन्हरा पालन नी केरू।”

स्तिफनुसा री हत्या

54इन्हां गैला शुणिआ यहूदी नेता स्तिफनुसा पैंधै झ़िकिदै लागै। 55पर तेइयै पवित्र आत्मा न भौरूइया स्वर्गा धिराबै हेरू होर परमेश्वरै री महिमा होर परमेश्वरै री दैहिणी धिरै यीशु बै खड़ै हेरिआ बोलू, 56“हेरा, हांऊँ स्वर्गा बै खुलदा होर मांहणु रै बेटै बै परमेश्वरै री दैहिणी धिरै खड़ा हुआदा हेरा सा।”

57तैबै तिन्हैं ज़ोरा सैंघै हल्लै पाईआ कोन बन्द केरै होर एक होईया तेई पैंधै झपटै, 58होर तेइबै यरूश्लेम शैहरा न बाहरै कौढिआ पात्थरै मारदै लागै होर तेइरी हत्या केरी, होर ज़ो लोका स्तिफनुसा बै दोष लाँदै लागै ती तिन्हैं आपणै झिकड़ै कौढिआ शाऊल नाँ रै मांहणु हागै रखै। 59ते स्तिफनुसा बै पात्थरै मारदै रौहै होर सौ ऐण्ढी प्रार्थना केरदा रौहू, “हे प्रभु यीशु मेरी आत्मा बै ग्रहण केर।” 60तैबै स्तिफनुस घुटनै टेकिआ ज़ोरा सैंघै पुकारू, हे प्रभु ऐई पाप तिन्हां पैंधै मत लान्दा होर ऐण्ढा बोलिआ सौ मूँआ।

Currently Selected:

प्रेरित 7: KFX-NT

Highlight

Copy