प्रेरित 8

मण्डली पैंधै अत्याचार

1शाऊल स्तिफनुस री मौऊती सैंघै सहमत ती।

तेई ध्याड़ै न यरूश्लेम शैहरा री मण्डली न बड़ा सताव होंदा लागा होर प्रेरिता बै छ़ौड़िआ सैभै यहूदिया होर सामरिया इलाकै न तितर-बितर हुऐ। 2किछ़ भगत लोकै स्तिफनुस कब्रा न रखू होर तेइरी तैंईंयैं बड़ा शोग केरू। 3शाऊल मण्डली बै सतांदा लागा ती; होर घौर-घौर घुसिआ मर्द होर बेटड़ी बै घसीटी-घसीटिआ कैदखानै न बन्द केरा ती।

सामरिया न फिलिप्पुसा रा प्रचार

4ज़ो बिश्वासी लोका तितर-बितर हुऐ ती, ते लोका बै खुशी रा समाद दैसदै रौहै। 5फिलिप्पुस सामरिया रै एक नगरा न ज़ाइआ लोका बै मसीह रा प्रचार केरदा लागा। 6ज़ो गैला होर च़मत्कार फिलिप्पुस केरा ती तिन्हां हेरिआ लोकै एक मन केरू। 7किबैकि बोहू सारै लोका न बुरी आत्मा निकती होर बोहू सारै बीमार होर लँगड़ै मांहणु ठीक केरिआ ती। 8होर तेई नगरा न बोहू लोका बै बड़ी खुशी हुई।

जादूगर शमौन

9एथा न पैहलै ऐई शैहरा न शमौन नाँ रा एक मांहणु रौहा ती, सौ जादू-टोणै केरिआ सामरी लोका बै हैरान केरा ती, होर आपणै-आपु बै बड़ा मर्द मैना ती। 10होर सैभ होछ़ै न लेईया बड़ै तक तेइबै आदर केरिया ऐ बोला ती, “ऐ मांहणु परमेश्वरै री महान शक्ति सा।” 11तेइयै बोहू रोज़ा न ते लोका आपणै जादू टोणै रै कोमा सैंघै हैरान केरिआ रखै ती, एसा बजहा न ते तेइबै मैना ती। 12ज़ैबै लोकै परमेश्वरा रै राज्य होर यीशु मसीह रै बारै न फिलिप्पुसा रा समाद शुणिया बशाह केरू, कि मर्द कि बेटड़ी सैभ बपतिस्मा लेन्दै लागै। 13तैबै शमौनै बी विश्वास केरू होर बपतिस्मै लेइआ फिलिप्पुसा सैंघै रौंहदा लागा होर चिन्ह होर परमेश्वरै री शक्ति सैंघै बड़ै-बड़ै चमत्कारा रै कोम हेरिआ हैरान होआ ती।

सामरिया न पतरस होर यूहन्ना

14ज़ो प्रेरित यरूश्लेम शैहरा न ती ज़ैबै तिन्हैं ऐ शुणू कि सामरी लोकै परमेश्वरै रै वचना बै मैना सी ता तिन्हैं पतरस होर यूहन्ना तिन्हां हागै भेज़ै। 15होर तिन्हैं तौखै पुजिआ तिन्हरी तैंईंयैं प्रार्थना केरी कि ते पवित्र आत्मा पालै। 16किबैकि तिन्हां पैंधै हाज़ी तैंईंयैं पवित्र आत्मा नी ती उतरी, तिन्हैं ता सिर्फ़ प्रभु यीशु रै नाँ न बपतिस्मा लेऊ ती। 17तैबै पतरस होर यूहन्ना पैंधै हौथ रखिआ प्रार्थना केरी होर तिन्हां पैंधै पवित्र आत्मा उतरी।

18ज़ैबै शमौनै ऐ हेरू कि प्रेरिता रै हौथ रखणै सैंघै पवित्र आत्मा मिला सा ता तिन्हां आगै ढैबुऐ आंणिआ बोलू। 19कि मुँभै बी ऐई अधिकारा बै दैआत् कि ज़ुणी पैंधै बी हांऊँ हौथ रखनू तिन्हां बै पवित्र आत्मा मिलली।

20पतरसै तेइबै बोलू, “तेरै ढैबुऐ तौ सैंघै लोड़ी नाश हुऐ, किबैकि तैं परमेश्वरै रै दाना बै ढैबुऐ लाइआ लेणै रा वचार केरू। 21ऐसा सेवा न तेरा हिस्सा ऑथि नी बाँडा किबैकि तेरा मन परमेश्वरा सामनै सच़ा नी ऑथि 22ऐबै आपणी ऐसा बुराई न मन बदलिया प्रभु हागै प्रार्थना केर, होई सका सा तेरै मना रै बुरै विचार माफ केरिलै।

23“आपणै बुरै कोमा न दूर होआ किबैकि हांऊँ समझा सा, कि तू आसा न बोहू जलन केरा सा, होर तुसै लगातार बुराई केरनु आल़ै ईच्छा रै दास सी, पक्का परमेश्वरा तुसाबै कठोर सज़ा देणी।” 24शमौनै ज़वाब धिना, कि तुसै मेरी तैंईंयैं प्रभु आगै प्रार्थना केरा कि ज़ो गैला तुसै केरी तिन्हां न कोई बी मूँ पैंधै नी लोड़ी पौई।

फिलिप्पुस होर कुश देशा रा मुख्य

25ते गुआही देइआ होर प्रभु यीशु रा वचन शुणाइआ यरूश्लेम शैहरा बै वापस नौठै होर सामरी इलाकै रै बोहू सारै ग्राँ न खुशी रा समाद शुणादै रौहै।

कूशा देशा रै खुसरै बै फिलिप्पुसा रा उपदेश

26तैबै प्रभु रै एकी स्वर्गदूतै फिलिप्पुसा बै बोलू, उठिया दक्षिणा धिरली बौता पैंधै ज़ा, ज़ो यरूश्लेम शैहरा न गाज़ा शैहरा बै ज़ा सा होर जंगल न सा। 27सौ उठिया च़लू होर शुणा कूश देशा रा एक मांहणु ऐन्दा लागा ती ज़ो खुसरा ती होर कूश देशै री राणी कन्दाकै रा मन्त्री होर खजाँची ती होर आराधना केरदा यरूश्लेम शैहरा बै आऊ ती। 28होर सौ आपणै रौथा पैंधै बेठा ती होर यशायाह भविष्यवक्तै री कताबा बै ज़ोरा सैंघै पौढ़दै-पौढ़दै वापस आपणै देशा बै ज़ाँदा लागा ती। 29तैबै पवित्र आत्मै फिलिप्पुसा बै बोलू, ऐई रौथा भेटी ज़ा।

30फिलिप्पुस ठोर मारिआ नौठा होर सौ यशायाह भविष्यवक्तै री कताब पौढ़दा शुणू होर तेईन पुछ़ू, ज़ो तू पौढ़दा लागा सा तू तेइबै समझ़ा बी सा कि नी?

31तेइयै बोलू, ज़ाँ तैंईंयैं कोई मुँभै समझ़ाला नी मूँ कैण्ढै समझ़णा। तेइयै फिलिप्पुसा हागै अर्ज़ा केरी कि तू रौथा पैंधै च़ढ़िया मूँ हागै बेश। 32पवित्र शास्त्रा रा ज़ो पाठ सौ पौढ़दा लागा ती सौ ऐसा,

“सौ भेड़ा सांही बलि होंणै री तैंईंयैं पजाउआ होर

ज़ैण्ढा गौभु ऊन काटणू आल़ै सामनै च़ुप रौहा,

तैण्ढाऐ तेइयै बी आपणा मुँह नी खोलू।

33तेइरी दीनता न तेइरा न्याय नी हुआ।

होर तेइरै बौगतै रै लोका रा वर्णन कुणी केरना?

किबैकि धौरती न तेइरा प्राण च़किआ सा।”

34तैबै खुसरै फिलिप्पुसा न पुछ़ू, हांऊँ तौ आगै अर्ज़ा केरा सा कि तू, “मुँभै ऐसा गैल दैस, कि भविष्यवाणी केरनु आल़ा ऐ किज़ी रै बारै न बोला सा, आपणै या कौसी होरी रै बारै न।” 35तैबै फिलिप्पुसै बोलणा शुरू केरू होर पवित्र शास्त्रा न शुरू केरिआ तेइबै यीशु रै बारै न खुशी रा समाद शुणाऊ।

36बौतै औंढदै-औंढदै ते पाणी रै तलाबा हागै पुजै, तैबै तेई खुसरै बोलू, “हेर औखै तलाब सा, ऐबै मुँभै बपतिस्मै लेणै न कि रोक सा?” 37फिलिप्पुसै बोलू, अगर तू सारै मना सैंघै बशाह केरा सा ता होई सका सा, खुसरै ज़वाब धिना हांऊँ बशाह केरा सा कि यीशु परमेश्वर रा बेटा सा। 38तैबै तेइयै रौथा बै रोकणै रा हुक्म केरू, तैबै खुसरा होर फिलिप्पुस दुऐ पाणी न उतरै, होर फिलिप्पुसै खुसरै बै बपतिस्मा धिना। 39ज़ैबै ते तलाबा न बाहरै निकतै, ता प्रभु री आत्मै फिलिप्पुस च़कू होर खुसरै सौ दबारा नी हेरू होर सौ खुशी मनाँदै-मनाँदै आपणी बौतै नौठा। 40फिलिप्पुस अशदोद शैहरा न पुजू। ज़ैबै तैंईंयैं सौ कैसरिया शैहरा न नी पुजू तैबै तैंईंयैं सौ ग्राँ-ग्राँ न यीशु रै बारै न खुशी रा समाद शुणादा रौहू।

Currently Selected:

प्रेरित 8: KFX-NT

Highlight

Copy