प्रेरित 6

सौत सेवका रा छाँटणा

1तिन्हां ध्याड़ै न ज़ैबै च़ेले बोहू होंदै लागै ता यूनानी भाषा बोलणू आल़ै च़ेले इब्रानी भाषा बोलनु आल़ै च़ेले पैंधै कुड़कुड़ांदै लागै कि हर रोज़ै री सेविकाई न आसरी विधवै री कोई सुधि नी लेंदा। 2तैबै तिन्हैं बारा प्रेरितै बिश्वासी री मण्डली आपु हागै शाधी होर बोलू, “ऐ ठीक नी ऑथि कि आसै परमेश्वरा रा वचन छ़ौड़िआ खयाणै-प्याणै री सेवा न रौहलै। 3ऐबै हे भाइयो बैहणियो, आपु न सौत ऐण्ढै मर्दा बै चुना ज़ो पवित्र आत्मा होर बुद्धि न सिद्ध होलै ताकि आसै तिन्हां बै ऐई कोमा पैंधै रखलै कि ते विधवा रा ख्याल रखलै। 4पर आसा ता प्रार्थना होर वचना रै प्रचार होर उपदेश देणै न लागी रौहणा।”

5ऐ गैल सारी मण्डली बै शोभली लागी होर तिन्हैं स्तिफनुस नाँ रा एक मर्द ज़ो कि विश्वास होर पवित्र आत्मा न भौरुआ ती, फिलिप्पुस, प्रखुरूस, नीकानोर, तीमोन, परमिनास होर अन्ताकिया शैहरा न रौहणु आल़ा नीकुलाउस ज़ो यहूदी बैणू ती चुनै, 6होर तिन्हां बै ते प्रेरिता सामनै आंणै होर तिन्हां पैंधै हौथ रखिआ तिन्हरी तैंईंयैं प्रार्थना केरी।

7परमेश्वरा रा वचन फैलदा रौहू होर यरूश्लेम शैहरा न च़ेले री गिणती बढ़दी रौही होर यहूदी पुरोहिता रा एक बड़ै समाजै बी यीशु मसीह रै बशाह रै ऐई सन्देशा बै ग्रहण केरू।

स्तिफनुस री गिरफ्तारी

8स्तिफनुस परमेश्वरै रै अनुग्रह होर शक्ति सैंघै लोकै रै बिच़ा न बड़ै नौखै कोम होर चिन्ह च़मत्कार रिहा ती। 9तैबै तेसा रै आराधनालय न कुरेनी होर, सिकन्दरिया शैहरा रै किलिकिया होर आसिया प्रदेशा रै कई लोका उठिया स्तिफनुसा सैंघै वहस केरदै लागै। 10पर तेई ज्ञान होर आत्मा रा ते लोका सामना नी केरी सकै।

11पर तिन्हैं कई लोका भड़काए होर ते बोलदै लागै, कि आसै ऐ मूसा होर परमेश्वरै रै खिलाफ़ निन्दा री गैला केरदा शुणू सा।

12होर तिन्हैं लोका, तिन्हरै स्याणै होर शास्त्री भड़काइआ सौ ढौकिआ महासभा बै आंणु। 13तिन्हैं झ़ूठै गुआह खड़ै केरै होर तिन्हैं बोलू कि “ऐ मांहणु ऐसा पवित्र ज़ैगा रै बारै न होर मूसै री बिधाना री निन्दा केरना नी छ़ौड़दा। 14किबैकि आसै ऐण्ढा बोलदा शुणू कि यीशु नासरी ऐ मन्दिर ढाणा होर ते रीति बदलणी ज़ो मूसै आसा बा धिनी सी।”

15तैबै सभा न बेठैंदै सैभी लोकै तेइरा मुँह स्वर्गदूता सांही च़मकदा हेरू।

Currently Selected:

प्रेरित 6: KFX-NT

Highlight

Copy