प्रेरित 11

पतरसा री आपणै कोमा रै बारै न जानकारी

1यीशु रै चुनीरै प्रेरित होर विश्वासीयै ज़ो यहूदिया देशा न ती ज़ैबै ऐ शुणू कि, होरी ज़ाति रै लोकै ज़ो यहूदी नी ऑथि तिन्हैं बी परमेश्वरा रा वचन मैनू सा। 2ज़ैबै पतरस यरूश्लेम शैहरा बै आऊ, ता, यहूदी बिश्वासी लोका तेई सैंघै बैहस केरदै लागै। 3कि तैं होरी जाति रै घौरा ज़ाइआ तिन्हां सैंघै खाऊ-पीऊ।

4तैबै पतरसै शुरू न लेइआ तिन्हां बै बौढ़ै ऐ दैसू; 5हांऊँ याफा नगरा न प्रार्थना केरदा लागा ती, होर बैहोश होईया एक दर्शन हेरू, कि एक बड़ी च़ादरी सांही च़ोहू कुणै न लटकाउआदा सर्गा न उतरिआ मूँ हागै आऊ। 6ज़ैबै मैं तेई पैंधै ध्यान केरू ता धौरती रै सारै पशु होर सर्गा रै च़ीड़ू-च़कारू हेरै। 7होर ऐ आवाज़ शुणुई कि हे पतरस, “उठ, मार होर खा।”

8मैं बोलू, नैंई प्रभु नैंई, किबैकि कोई छ़ोतली च़िज़ा मेरै मुँहा न नी नौठी।

9तैबै सर्गा दुज़ी बार आवाज़ हुई कि, ज़ो परमेश्वरै च़ोखा ठहराऊ सा, तू तेइबै छ़ोतली मत बोलदा। 10ऐण्ढा त्रा बार हुआ; तैबै सैभ किछ़ सर्गा बै च़ेकुआ।

11तेई बौगता, “त्रा मांहणु ज़ो कैसरिया नगरा न मूँ हागै बै भेज़ै ती ते तुरन्त एज़िया ज़ौस घौरा न हांऊँ ती, तौखै आई पुज़ै। 12तैबै पवित्र आत्मै मुँभै तिन्हां सैंघै होंणै बै बोलू होर ऐ छ़ौह भाई बी मूँ सैंघै आऐ होर आसै तेई मांहणु रै घौरा बै नौठै। 13तेइयै दैसू, कि मैं एक स्वर्गदूत आपणै घौरा न खड़ा हेरू ज़ुणियै मुँभै बोलू कि याफा नगरा बै मांहणु भेज़िआ शमौना बै ज़ुणिबै कि पतरस बोला सी, शाध। 14तेई तौभै ऐण्ढी गैला बोलणी, ज़ुणिरै द्वारा तौ होर तेरै सारै घरानै मुक्ति पाणी।

15“हांऊँ गैला केरदा लागा ता पवित्र आत्मा तिन्हां पैंधै ऐसा रीतियै उतरु, ज़ौस रीतियै शुरू न पिन्तेकुस्ता रै त्यौहारा न आसा पैंधै उतरु ती। 16तैबै मुँभै प्रभु रा सौ वचन याद आऊ कि यूहन्नै ता पाणियै लाइआ बपतिस्मा धिना पर तुसा पवित्र आत्मा रा बपतिस्मा पाणा। 17तैबै परमेश्वरै तिन्हां बै सौहै दान धिना ज़ो आसाबै प्रभु यीशु मसीह पैंधै विश्वास केरिआ मिलू ती ता हांऊँ कुण ती ज़ो परमेश्वरा बै रोकी सकदा।”

18ऐ शुणिआ ते यहूदी बिश्वासी च़ुप रौहै, होर परमेश्वरै री सराउथी केरिआ बोलदै लागै, “तैबै ता परमेश्वरै होरी ज़ाति बै बी हमेशा री ज़िन्दगी पाणै री तैंईंयैं पापा बै छ़ौड़िया मसीह पैंधै बशाह केरनै रा दान धिना सा।”

अन्ताकिया री मण्डली

19ज़ो लोका स्तफनुसै रै मौरनै न बाद यरूश्लेम शैहरा बै छ़ौड़िया तितर-बितर हुऐ ती, ते दूरा-दूरा तक फीनीकै इलाकै, साइप्रस टापू होर अन्ताकिया शैहरा न पुजै, पर ते यहूदी लोका बै केल्ही प्रभु यीशु रा वचन शुणा ती। 20पर तिन्हां न केतरै बिश्वासी ता साइप्रस टापू होर कुरेनी शैहरा रै ती, ज़ो अन्ताकिया शैहरा न एज़िया यूनानी लोका बै प्रभु यीशु री खुशी री समादै री गैला शुणादै लागै। 21प्रभु री समर्थ तिन्हां पैंधै ती, होर बोहू लोका विश्वास केरिआ प्रभु धिराबै फिरै।

22तैबै तिन्हरी चर्चा यरूश्लेम शैहरा री मण्डली न शुणनै न आई, होर तिन्हैं बरनबास अन्ताकिया शैहरा बै भेज़ू 23सौ तौखै पुजिआ, होर परमेश्वरै रै अनुग्रह हेरिआ बड़ा खुश हुआ होर सैभी बै उपदेश धिना कि तन-मन लाइआ प्रभु सैंघै लिपटी रौहा। 24बरनबास एक भला मांहणु ती होर पवित्र आत्मा न सिद्ध ती होर बोहू सारै लोका प्रभु धिराबै फिरै।

25तैबै बरनबास अन्ताकिया शैहरा बै छ़ौड़िया शाऊला बै तोपणै री तैंईंयैं तरसुसा बै नौठा। 26ज़ैबै सौ तिन्हां बै मिलू ता सौ अन्ताकिया शैहरा बै आंणु, होर ऐण्ढा हुआ कि बरनबास होर शाऊल एकी बौर्षा तैंईंयैं मण्डली सैंघै मिलदै रौहै बोहू लोका बै यीशु मसीह रा उपदेश देंदै रौहै होर च़ेले सैभी न पैहलै अन्ताकिया शैहरा न मसीही कहलाऐ।

27तिन्हां रोज़ा न कई बिश्वासी ज़ो भविष्यवाणी केरनु आल़ै ती, यरूश्लेम शैहरा न अन्ताकिया शैहरा बै आऐ। 28तिन्हां न अगबुस नाँ रै एकी भविष्यवाणी केरनु आल़ै खड़ै होईया आत्मै री प्रेरणा सैंघै ऐ दैसू कि सारै दुनिया न अकाल पौड़ना। ज़ैबै रोमा रा राज़ा क्लौदियुस राज़ केरदा लागा ती तेई बौगतै अकाल पौड़ू। 29तैबै च़ेले फैसला केरू कि, हर एक आपणी-आपणी कमाई रै मुताबक यहूदिया देशा न रौहणु आल़ै मसीह बिश्वासी री तैंईंयैं आपणी सामर्था रै मुताबक मज़त केरनै रा फैसला केरू। 30तिन्हैं ऐण्ढाऐ केरू होर बरनबास होर शाऊलै रै हौथै स्याणै हागै किछ़ ढैबुऐ भेज़ू।

Currently Selected:

प्रेरित 11: KFX-NT

Highlight

Copy