प्रेरित 10

कुरनेलियुस रा पतरसा बै शाधणा

1कैसरिया नगर न कुरनेलियुस नाँ रा एक मांहणु ती, ज़ो इतालियानी पलटना रा सूबैदारा ती। 2सौ परमेश्वरा रा भक्त ती, होर आपणै सारै खानदाना समेत परमेश्वरा न डौरा ती, सौ गरीब यहूदी लोका बै बोहू दान देआ ती होर परमेश्वरा आगै लगातार प्रार्थना केरा ती। 3तेइयै ध्याड़ी रै त्रीज़ै पौहरै रै लगभग त्राई बज़ै एक दर्शन हेरू, कि परमेश्वरा रा एक स्वर्गदूत तेई हागै भीतरै एज़िया बोला सा, हे “कुरनेलियुस।” 4तेइयै सौ ध्याना सैंघै हेरू होर डौरदै-डौरदै बोलू, “हे प्रभु मुँभै दस कि गैल सा?” तेइयै बोलू, तेरी प्रार्थना होर दान यादगारी री तैंईंयैं परमेश्वरा सामनै पुजै सी। 5होर ऐबै याफा नगरा न मांहणु भेज़िआ शमौन ज़ुणिबै पतरस बोला सी, तेइबै शाध। 6सौ च़ंबड़ै रै धँधा केरनु आल़ै शमौनै रै घौरा न पाहुँणा सा, होर तेइरा घौर समुद्रै रै कनारै सा।

7ज़ैबै सौ स्वर्गदूत तेई हागै न भैगू ता तेइयै आपणै दूई सेवक होर ज़ो तेई सैंघै रौहा ती तिन्हां न एक परमेश्वरा रा भक्त सिपाही शाधु। 8होर तिन्हां बै सारी गैला दैसिआ ते याफा नगरा बै पतरसा बै आंणनै री तैंईंयैं भेज़ै।

पतरसा रा दर्शन

9दुज़ै ध्याड़ी, ज़ैबै इन्हां त्राई बै ज़ुणिबै कुरनेलियुसै भेज़ै ती, ते च़लदै-च़लदै नगरा न लगभग बारा बाज़ै पुजै। तेई बौगता पतरस प्रार्थना केरदा छ़ापरा पैंधै च़ढ़ू ती। 10तेइबै भूख लागी होर सौ किछ़ खाँणा चाहा ती पर ज़ैबै ते रोटी त्यार केरदै लागै ती ता पतरसै दर्शन हेरू। 11होर तेइयै हेरू, कि सर्ग खुलू होर एक बड़ी च़ादरा सांही लटकाउआदा, धौरती बै उतरदा लागा सा। 12ज़ुणीन धौरती रै हर किस्मै रै पशु होर सर्गा रै च़ीड़ू-च़कारू ती, ज़ुणिबै मूसा रै बिधाना रै मुताबक यहूदी लोका री तैंईंयैं खाँणा नाँह ती। 13तेईन एक ऐण्ढी आवाज़ शुणुई कि हे पतरस, “उठ, मार होर खा।”

14पर पतरसै बोलू, नैंई प्रभु बिल्कुल नी, किबैकि मैं औज़ा तैंईंयैं छ़ोतली च़िज़ा नी खाई।

15तैबै दुज़ी बार तेईन भी शुणुआ, “कि ज़ो किछ़ परमेश्वरै च़ोखा ठहराऊ सा तू तेइबै छ़ोतली मत बोलदा।”

16त्रा बार ऐण्ढाऐ हुआ; तैबै सौ बड़ी चादर तुरन्त सर्गा बै च़ेकुआ।

17ज़ैबै पतरस आपणै मैना न दूई विचार केरदा लागा ती, कि ज़ो दर्शन तिन्हैं हेरू तेथा रा मतलब कि सा, तैबै तै मांहणु ज़ो कुरनेलियुसै भेज़ै ती ते शमौनै रै घौरा रा पैता लाइआ तेइरी डेवढ़ी हागै आई पुज़ै, 18होर पुछ़दै लागै, कि शमौन ज़ुणिबै पतरस बोला सी सौ औखै पाहुँणा सा?

19पतरस तेई दर्शनै रै बारै न सोच़दा लागा ती, कि प्रभु री पवित्र आत्मै तेइबै बोलू, हेर त्रा मांहणु तौभै तोपदै लागै सी। 20तैबै तू उठिया बुनै धिरै बै ज़ा, होर बिना डौरै तू तिन्हां सैंघै ज़ा किबैकि ते मैं भेज़ै सी। 21तैबै पतरसै उतरिआ तिन्हां मांहणु बै बोलू, हेरा तुसै ज़ुणी तोपदै लागै सी सौ हांऊँ सा। तुसरै ऐणै री कि बजहा सा। 22तिन्हैं बोलू, आसै कुरनेलियुस सुबैदारै भेज़ै सी ज़ो धर्मी होर परमेश्वरा न डौरनू आल़ा सा होर सारी यहूदी ज़ाति न खरा मांहणु सा, तेइयै एकी पवित्र स्वर्गदूता न च़िताऊणी पाई कि तौभै आपणै घौरा शाधिआ तौ न वचन शुणला।

कुरनेलियुस रै घौरा न पतरस

23तैबै तेइयै ते भीतरै शाधै होर तिन्हरी पाहुणच़ारी केरी, होर दुज़ै रोज़ै सौ तिन्हां सैंघै नौठा होर याफै शहरा रै विश्वासी भाई मौंझ़ै न कई तेई सैंघै नौठै। 24त्रीज़ै रोज़ै ते कैसरिया नगरा न पुजै, होर कुरनेलियुस आपणै टबर होर सैंघी-साथी बै कठा केरिआ तिन्हरी गैला केरदा लागा ती। 25ज़ैबै पतरस भीतरै ऐन्दा लागा ती, ता कुरनेलियुस तेई सैंघै मिलू, होर तेइरी ज़ोंघा पैंधै पौड़िआ प्रणाम केरू। 26पर पतरसै तेइबै खड़ै च़किआ बोलू, खड़ा हो हांऊँ बी ता मांहणु सा।

27होर तेई सैंघै गैल-बात केरदै-केरदै भीतरा बै नौठा, बोहू सारै लोक बै कठै हेरिआ तेइयै तिन्हां बोलू, 28पतरसै तिन्हां बै बोलू, “तुसै जाँणा सी, कि होरी ज़ाति री सँगति केरना होर तिन्हां कौछ़ै जाँणा यहूदी बिधाना रै हिसाबा न पाप सा पर परमेश्वरै मुँभै दैसू सा, कि हांऊँ कौसी मांहणु बै छ़ोतला नी बोलणू। 29एसा बजहा न हांऊँ बगैर बोलै आऊ। ऐबै हांऊँ पुछ़ा सा कि हांऊँ कौस कोमै री तैंईंयैं शाधु सा।”

30कुरनेलियुसै बोलू, एसा घड़ी च़ार रोज़ पैहलै हांऊँ आपणै घौरा न त्रीज़ै पौहरै त्राई बाज़ै प्रार्थना केरदा लागा ती कि च़मकीलै झिकड़ै लाऊआ दा एक मर्द मूँ सामनै एज़िया खड़ा हुआ, 31होर बोलदा लागा, हे कुरनेलियुस तेरी प्रार्थना शुणुई सा होर तेरै दान परमेश्वरा सामनै याद केरूऐ सी। 32ऐबै कौसी बै याफा बै भैज़िआ शमौन ज़ुणिबै पतरस बोला सी शाध। सौ समुद्रै रै कनारै च़ंबड़ै रै धँधा केरनु आल़ै शमौनै रै घौरा न रौहा सा, होर ज़ैबै तेई ऐणा तैबै तेई तुसाबै परमेश्वरा री गैला दसणी। 33तैबै मैं तुरन्त तौ आगै मांहणु भेज़ै होर तैं भला केरू कि तू आऊ। ऐबै आसै सैभै औखै परमेश्वरा सामनै सी ताकि ज़ो किछ़ परमेश्वरै तौभै बोलू सा तेइबै शुणलै।

पतरसा रा उपदेश

34तैबै पतरसै बोलू, ऐबै मुँभै पक्का विश्वास हुआ कि परमेश्वर कौसी रा पक्षपात नी केरदा, 35बल्कि हर एक ज़ाति ज़ो परमेश्वरा न डौरा सा होर धर्मै रै कोम केरा सा सौ तेइबै ग्रहण केरा सा। 36ऐ सौहै शान्ति होर खुशी रा समाद सा ज़ो तेइयै इस्राएली लोका हागै यीशु मसीह रै द्वारा भेज़ू ज़ो सैभी रा प्रभु सा। 37तेसा गैला बै तुसै ज़ाणा सी ज़ो यूहन्नै रै बपतिस्मै रै प्रचारा न बाद गलील ज़िलै न शुरू केरिआ सारै यहूदिया प्रदेशा न फैली। 38तुसै नासरता रै यीशु नासरी रै बारै न ज़ाणा सी कि परमेश्वरै कौस रीतियै पवित्र आत्मा होर शक्ति सैंघै अभिषेक केरू। सौ हमेशा भलाई रै कोम केरदा रौहू होर ज़ुण शैताना रै सताउदै ती, तिन्हां बै ठीक केरदा रौहू किबैकि परमेश्वर तेई सैंघै ती,

39होर आसै तिन्हां सैभी कोमै रै गुआही सी ज़ो तेइयै सारै यहूदिया देशा न केरै होर यरूश्लेम शैहरा न बी केरै होर तिन्हैं सौ क्रूसा पैंधै लटकाइआ मारू। 40पर सौ परमेश्वरै त्रीज़ै रोज़ै मूँऐंदै न ज़िन्दा केरू होर प्रगट बी केरू सा। 41सैभी लोका बै नी पर तिन्हां गुआही बै ज़ो परमेश्वरै पैहलै न चुनै ती, मतलब आसाबै ज़ुणियै कि आसै मूँऐंदै न ज़िन्दै होंणै न बाद तेई सैंघै खाऊ-पीऊ।

42तेइयै आसाबै हुक्म धिना कि सारै लोका बै प्रचार केरा; होर गुआही दैआत् कि यीशु ही एक सा ज़ो परमेश्वरै ज़िन्दै होर मूँऐंदै रा न्यायी ठहराऊ सा। 43तेइरै बारै न सैभै भविष्यवाणी केरनु आल़ा गुआही देआ सी, कि ज़ो कोई तेई पैंधै विश्वास केरला तेइबै यीशु रै नाँ रै ज़रियै पापै री माफी मिलणी।

होरी ज़ाति पैंधै पवित्र आत्मा रा उतरना

44ज़ैबै पतरस इन्हां गैला केरदा लागा ती, ता पवित्र आत्मा वचन शुणनू आल़ै सैभी लोका पैंधै उतरु। 45ज़ेतरै यहूदी विश्वासी पतरसा सैंघै आऐ ती, ते सारै हैरान हुऐ कि होरी ज़ाति रै लोका पैंधै ज़ो यहूदी नी ऑथि तिन्हां बै बी पवित्र आत्मा रा दान मिलू। 46किबैकि तिन्हैं ते भाँति-भाँति री भाषा बोलदै होर परमेश्वरै री बड़ाई केरदै शुणै। 47तैबै पतरसै बोलू, कि कोई पाणी बै रोकी सका सा कि ऐ बपतिस्मा नी पालै ज़ुणियै कि आसा सांही परमेश्वरा न पवित्र आत्मा पाऊ सा। 48होर पतरसै इन्हां बै यीशु मसीह रै नाँ न बपतिस्मा देणै रा हुक्म धिना, तैबै तिन्हैं पतरसा हागै अर्ज़ा केरी कि सौ किछ़ रोज़ तिन्हां सैंघै रौहला।

Currently Selected:

प्रेरित 10: KFX-NT

Highlight

Copy