प्रेरित 12

पतरसा रा कैदखानै न छुटकारा

1तेई बौगतै हेरोदेस राज़ै मण्डली रै कई मांहणु बै दु:ख देणै री तैंईंयैं बन्दी बणायै। 2तिन्हैं यीशु रै चुनीरै लोका मौंझ़ै यूहन्नै रै भाई याकूब तलवारी सैंघै मकाऊ। 3होर ज़ैबै तेइयै हेरू कि यहूदी लोका एथा न खुश होआ सी ता तेइयै पतरस बी ढौकू; ते ध्याड़ै अखमीरी रोटी रै त्यौहारा रै ध्याड़ै ती। 4हेरोदेसै पतरस ढौकिआ कैदखानै न पाऊ होर च़ार सिपाही पैहरैदारी केरदै रखै। तेइयै ऐण्ढा सोच़ू कि फसह रै त्यौहारा न बाद ते तेइबै लोका सामनै आंणलै।

पतरसा रा कैदखानै न छुटकारा

5होर ज़ैबै बोहू ध्याड़ै न कैदखानै मौंझ़ै पतरसै री रखवाली होंदी रौही, पर मण्डली तेइरी तैंईंयैं लगातार परमेश्वरा हागै प्रार्थना केरदी लागी ती। 6ज़ुणी रोज़ हेरोदेस पतरसा बै लोका सामनै आंणनु आल़ा ती, ता तेसा रातियै पतरस दूई शाँगल़ीयै लाईया बोनूआ दा दूई सिपाही बिच़ा न सोंदा लागा ती होर पैहरैदार जेला रै दुआरा पैंधै पैहरैदारी केरदै लागै ती। 7ता हेरा प्रभु रा एक स्वर्गदूत एज़िया खड़ा हुआ होर तेसा कोठरी न प्याशा च़मकू। तेई स्वर्गदूतै पतरसै री पसली पैंधै हौथ मारिआ सौ बझ़ेऊ होर बोलू, “उठ, फुरती केर।” होर तेइरै हौथै री शाँगल चुटिआ शौढ़ी।

8तैबै स्वर्गदूतै तेइबै बोलू, “त्यार हो, होर आपणै बूट ला।” तेइयै तैण्ढाऐ केरू। तैबै स्वर्गदूतै तेइबै बोलू, “आपणा च़ोगा लाइआ मूँ पिछ़ै एज़।” 9पतरस निकल़िया तेई पिछ़ै च़लू पर ऐ नी ती ज़ाणदा कि ज़ो किछ़ स्वर्गदूत केरदा लागा ती सौ सच़ सा। पतरस ऐ सोच़दा लागा ती कि हांऊँ दर्शन हेरदा लागा सा। 10तैबै ते पैहलै होर दुज़ै पैहरै न निकल़िया तेई लोहै रै बड़ै गेटा आगै पुजै ज़ो नगरा धिराबै ती। सौ तिन्हरी तैंईंयैं आपणै-आप खुलू होर ते निकल़िया एकी गलिऐ नौठै। ऐतरै न स्वर्गदूत तेइबै छ़ौड़िआ नौठा।

11तैबै पतरसै सच़ेत होईया बोलू, ऐबै मैं सच़िऐ ज़ाणू कि प्रभुऐ आपणा स्वर्गदूत भेज़िआ हांऊँ हेरोदेसै रै हौथा न छुड़ाऊ होर यहूदी री सारी आशा चोड़ी।

12ऐण्ढा सोच़िआ सौ यूहन्नै री आमा मरियमै रै घौरा बै आऊ ज़ुणिबै मरकुस बोला सी। तौखै बोहू सारै बिश्वासी लोका कठै होईया प्रार्थना केरदै लागै ती। 13ज़ैबै तेइयै गेटै री ताकि खटखटाई ता रूदै नाँ री एक प्रभु री दासी शुणदी आई। 14तेसै आवाज़ शुणिआ पतरस पछ़ियाणु पर तेसै खुशी रै मारै गेट नी खोलू होर ठोर मारिआ भीतरै नौठी होर दैसू कि पतरस द्वारा पैंधै खड़ा सा।

15तिन्हैं तेसा बै बोलू, “तू पागल सा।” पर तेसै बोलू कि पक्का सौहै सा। तैबै तिन्हैं बोलू, “तेइरा स्वर्गदूत होला।”

16पर पतरस दुआर खटखटाँदा रौहू होर तिन्हैं खिड़की खोली। ते तेइबै हेरिआ हैरान हुऐ। 17तैबै तेइयै तिन्हां बै च़ुप रौहणै री तैंईंयैं हौथै लाइआ इशारा केरू होर तिन्हां बै दैसू कि प्रभुऐ कौस रीतिऐ हांऊँ बन्दी घौरा न कौढिआ आंणु। तैबै पतरसै भी बोलू कि “एसा गैला बै याकूब होर भाई, बैहणा बै बी दैसीत्,” होर ऐण्ढा बोलिआ सौ दुज़ी ज़ैगा बै नौठा।

18दोथी सिपाही न बड़ी हलचल होंदी लागी कि पतरस कौखै नौठा। 19ज़ैबै हेरोदेस राज़ै खोजबीन केरी होर किछ़ नी मिलू ता पैहरैदारै री ज़ाँच केरिआ तिन्हां बै मारनै रा हुक्म धिना होर पतरस यहूदिया देश छ़ौड़िआ कैसरिया शैहरा न ज़ाइआ रौंहदा लागा।

हेरोदेसा री मौऊत

20हेरोदेस राजा सूर होर सैदा शैहरा रै लोका न खुश नी ती ऑथि। तैबै एक ध्याड़ै सूर होर सैदा शैहरा रै किछ़ लोका एक छ़ुण्ड बनाईया कैसरिया शैहरा बै आऐ ताकि हेरोदेस राज़ै सैंघै मुलाकात केरी सकलै। होर तिन्हैं बलास्तुस राज़ी केरू ज़ो कि हेरोदेस राज़ै रा खास कर्मचारी ती, ताकि तै तेइरै ज़रियै हेरोदेस राज़ै बै दसी सकलै कि सूर होर सैदा शैहरा रै लोका तेई सैंघै मेल-मिलाप केरना चाहा सी; किबैकि हेरोदेस राज़ै रै देशै लाइआ तिन्हरा पालन-पोषण होआ ती।

21होर राज़ा हेरोदेस ठहराऊऐ दै रोज़ा न राज़शाही झिकड़ै लाइआ राज़गद्दी पैंधै बेठा होर तिन्हां बै व्याख्या देंदा लागा।

22होर लोका पुकारदै लागै कि “ऐ ता मांहणु रा नी परमेश्वरा री आवाज़ सा।” 23तेसा घड़ियै प्रभु रै एकी स्वर्गदूतै सौ झिड़कु किबैकि तेइयै परमेश्वरै री महिमा नी केरी होर सौ कीड़ै पौड़िआ मूँआ।

24पर परमेश्वरा रा वचन बढ़दा रौहू होर फैलदा रौहू।

25ज़ैबै बरनबास होर शाऊलै आपणी सेवा यहूदिया देशा न पूरी केरी ता यूहन्ना ज़ुणिबै मरकुस बोला सी सैंघै लेइआ यरूश्लेम शैहरा न अन्ताकिया शैहरा बै वापस आऐ।

Currently Selected:

प्रेरित 12: KFX-NT

Highlight

Copy