प्रेरित 1
1
लूकै लिखिदी दुज़ी कताब
1हे थियुफिलुस, मैं पैहली कताब तिन्हां सैभी गैलै रै बारै न लिखी, ज़ो यीशु शुरू न लेइया केरदा होर सिखाँदा रौहू, 2तेई बौगता तैंईंयैं ज़ैबै तैंईंयैं कि सौ तेइरै प्रेरिता बै ज़ो तेइयै चुनै ती, पवित्र आत्मा री मज़ती द्वारा हुक्म देईया स्वर्गा बै नैंई च़कू, 3तेइयै बड़ै दुःख सौहणै होर मौरनै न बाद बोहू पक्के सबूता सैंघै आपणै आपा बै ज़िन्दा रिहाऊ, होर चाली रोजा तैंईंयैं सौ तिन्हां न हेरुआ, होर परमेश्वरा रै राज्य री गैला केरदा रौहू।
पवित्र आत्मा री कसम
4होर तेइयै च़ेले सैंघै मिलिया हुक्म धिना, “यरूश्लेम शैहरा बै मता छ़ौड़ा, पर बापू री तेई भेंटा री प्रतिज्ञा रै पूरै होंणै रा इंतज़ार केरदै रौहा, ज़ुणिरी चर्चा तुसै मूँ न शुणी सा। 5किबैकि यूहन्नै ता पाणी न बपतिस्मा धिना ती, पर थोड़ै रोजा बाद तुसै पवित्र आत्मा न बपतिस्मा पाणा।”
यीशु रा स्वर्ग ज़ाणा
6तिन्हैं प्रेरितै कठै होईया यीशु न पुछ़ू, “ओ प्रभु, कि तौ एही बौगतै इस्राएला रा राज्य दबारा फेरना?”
7यीशुऐ तिन्हां बै बोलू, “तेई बौगतै रै बारै न ज़ाणना तुसरी तैंईंयैं ज़रूरी नैंई ऑथि। सिर्फ़ तिन्हां गैला रै बारै न बापू ज़ाणा सा कि तै कैबै होली। 8पर ज़ैबै पवित्र आत्मा तुसा पैंधै एला तैबै तुसाबै शक्ति मिलणी; होर फिरी तुसै मेरै बारै न, यरूश्लेम शैहरा न लेइया सारै यहूदिया ज़िलै होर सामरिया ज़िलै होर सारै दुनिया रै हर ज़ैगा मेरै गवाह होंणा।”
यीशु रा स्वर्गा बै च़किणा
9ऐण्ढा बोलै न बाद यीशु तिन्हरै हेरदै-हेरदै स्वर्गा बै च़कुआ होर बादलै री बजहा सैंघै तै तेइबै हेरी नी सकै।
10प्रेरित ज़ैबै तेइबै स्वर्गा धिरै हेरदै लागै ती ता शुणा, च़ानक दूई मर्द च़मकणु आल़ै शेतै झिकड़ै लाइया तिन्हां सामनै एज़िया खड़ै हुऐ। 11होर बोलदै लागै, “ओ गलीली मर्दो, तुसै किबै खड़ै होईया सर्गा धिरै भाल्दै लागै सी? ऐ यीशु ज़ो तुसा हागै न स्वर्गा बै च़कुआ ज़ौस रीतियै तुसै ऐ ज़ाँदा हेरू तेसा रीतियै ऐई दबारा ऐणा।”
मतित्याह बै यहूदा रा अधिकार मिलणा
12तैबै प्रेरित ज़ैतून नाँ रै ढौगा न ज़ो यरूश्लेम शैहरा रै नेड़े बशाँ रै एक किलो मिटरा री दूरी पैंधै ती यरूश्लेम शैहरा बै आऐ। 13ज़ैबै ते नगरा न पुजै ता ते तेई टाल़ै पैंधै नौठै ज़ौखै पतरस, यूहन्ना न, याकूब, अन्द्रियास, फिलिप्पुस, थौमा, बरतुलमई, मती, हलफई रा बेटा याकूब होर शमौन ज़िलौती होर याकूबा रा बेटा यहूदा रौहा ती। 14ऐ सारै कई बेटड़ी होर यीशु री आमा मरियम होर यीशु रै भाई सैंघै एक मन होईया प्रार्थना न लागी रौहै।
15तिन्हां ध्याड़ै न पतरस भाई बिच़ै ज़ो कि लगभग एक शौऊ बीह बिश्वासी मांहणु ती, खड़ै होईया बोलदा लागा, 16“ओ भाइयो बैहणियो, पवित्र शास्त्रा न लिखुदा पूरा होंणा ज़रूरी ती। ज़ो पवित्र आत्मै दाऊदै रै मुँहै लाइया यहूदै रै बारै न ज़ो यीशु बै ढौकणु आल़ै रा अगुवा ती पैहलै न बोलू ती। 17किबैकि सौ आसा बिच़ै न एक ती, होर सैभै रै कोमा न आसा सैंघै शामिल ती।”
18तेइयै पापै री कमाई न एक छेत लेऊ होर उल्टा पौड़ू होर तेइरा पेट फुटू होर तेइरी सारी आँजा निकती। 19ऐसा गैला बै यरूश्लेम शैहरा न रौहणु आल़ै सारै लोका ज़ाणा सी। तिन्हैं तेई छेता रा नाँ बी तिन्हरी भाषा न “हकलदमा” मतलब लोहू रा छेत रखू।
20किबैकि दाऊद भजन सँहितै री कताबा न लिखू सा,
तेइरा घौर उजड़ू लोड़ी;
होर तौखै कोई नी रौहला;
“ ‘होर तेइरा अध्यक्षा रा औह्दा कोई होर लेला।’
21यूहन्नै रै बपतिस्मै न लेइया स्वर्गा बै च़किणै तैंईंयैं ज़ेतरै बी रोज़ा तैंईंयैं यीशु आसा सैंघै ऐन्दा-ज़ाँदा रौहू होर ज़ो लोका आसा सैंघै रौहै, 22ऐ ज़रूरी सा कि तिन्हां न एक मांहणु आसा सैंघै यीशु रै ज़िन्दै होंणै रा गुआह बणला।”
23तैबै तिन्हैं दुई मांहणु खड़ै केरै। एक यूसुफ ज़ुणिबै बरसब्बास बोला सी होर तेइरा आपणा नाँ यूस्तुस सा होर दुज़ा मत्तित्याह खड़ा केरू। 24तैबै तिन्हैं प्रार्थना केरी; हे “प्रभु, तू ज़ो सैभी रै मना बै ज़ाणा सा ऐ प्रगट केर कि तैं इन्हां दूई न कुण चुनू? 25कि सेवै रै कोमा न प्रेरिताई रै तेई औह्दै बै लेला ज़ुणिबै छ़ौड़िआ यहूदा आपणी ज़ैगा बै नौठा।” 26तैबै तिन्हैं तेइरै बारै न चिट्ठी पाई होर चिट्ठी मत्तित्याह रै नाँ री निकती होर सौ तिन्हां ग्यारा प्रेरित च़ेले सैंघै गिणुआ।
Currently Selected:
प्रेरित 1: KFX-NT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
