प्रेरित 2

पवित्र आत्मा रा ऐणा

1ज़ैबै यहूदियै रै पिन्तेकुसा रै त्यौहारा रा ध्याड़ा आऊ ता ते सैभ एकी ज़ैगा कठै ती। 2होर एकदम स्वर्गा न एक बड़ै ब्यानै री छ़ेड़ हुई होर तेथै लाइया ज़ौखै ते बेठै ती सौ सारा घौर भौरूआ। 3होर तिन्हां न औगी री ज़ीभा सांही फुटदी हेरूई होर तिन्हां हर एकी पैंधै ठहरी। 4ते सारै पवित्र आत्मै लाइया भौरूऐ होर ते दुज़ी भाषा बोलदै लागै। 5तेई बौगत परमेश्वरा न डौरनू आल़ै बोहू सारै यहूदी दुनिया रै हरेक देशा न त्यौहारा बै आऐ ती, होर यरूश्लेम शैहरा न रौहा ती। 6ज़ैबै बागरी सांही एक छ़ेड़ शुणुई ता लोकै री भीड़ कठी हुई होर सैभै लोका डौरै किबैकि हरेकी न ऐ शुणिया ती कि ऐ ता मेरी भाषा बोलदा लागा सा। 7ते सारै बड़ै हैरान होईया बोलदै लागै, “ऐ ज़ुणा बोलदै लागै सी कि ऐ गलीला न रौहणु आल़ै नी ऑथि। 8तैबै किबै आसा न आपणी-आपणी भाषा लागी सा शुणिदी? 9आसै ता पारथी इलाकै, मेदी, एलामी, मैसोपोटामिया, यहूदिया होर पुन्तुस होर आसिया, 10फ्रूगिया, पँफूलिया मिस्र देश होर लिबूआ देश ज़ो कि कुरेन शैहरा रै औरै-पौरै सा इन्हां सैभी ज़ैगा रै रौहणु आल़ै होर रोमी बासी सी, 11मतलब कि यहूदी, होर कि यहूदी मत अपनाणै आल़ै, क्रेती होर अरबी भी सी, पर आसै आपणी-आपणी भाषा न तिन्हां न परमेश्वरै रै बड़ै-बड़ै कोमै री चर्चा शुणा सी।” 12ते सारै हैरान हुऐ होर डौरदै-डौरदै, “एकी होरी बै बोलदै लागै कि ऐ कि होंदा लागा सा?” 13पर होरै ठठा केरिआ बोलू, “ऐ ता नशै न सी।”

पतरसा रा भाषण

14पतरस तिन्हां ग्यारा प्रेरिता मौंझ़ै खड़ा हुआ होर ज़ोरा सैंघै बोलदा लागा, ओ यहूदी होर यरूश्लेम शैहरा न रौहणु आल़ैओ, एसा गैला बै ज़ाणी लेआ होर मेरी गैला बै ध्याना सैंघै शुणा। 15ज़ैण्ढा तुसै समझ़दै लागै सी ऐ नशै न नी ऑथि किबैकि हाज़ी तक दोथकै नौऊ बाज़ै सी। 16पर ऐ सौ गैल सा ज़ो परमेश्वरै योएल नाँ रै भविष्यवाणी केरनु आल़ै रै ज़रियै बोली ती।

17“ ‘परमेश्वर बोला सा कि आखरी रै ध्याड़ै न ऐण्ढा होंणा,

कि मूँ आपणी आत्मा सैभी मांहणु बै देणी।

होर तुसरै बेटै होर बेटी भविष्यवाणी केरनी,

तुसरै ज़ुआन लोका दर्शन हेरनै,

होर बज़ुर्गा सुपनै हेरनै।

18बल्कि मूँ आपणै दास दासी बी,

तिन्हां ध्याड़ै न आपणी आत्मा देणी,

होर तिन्हां भविष्यवाणी केरनी।

19मूँ सर्गा न नौखै कोम,

होर धौरती पैंधै नशाण च़मत्कार मतलब लोहू,

औग होर धुँऐ रा बादल रिहाणा।

20प्रभु रै महान रोज़ै रै ऐणै न पैहलै सूरज़ निहारा होंणा,

होर चाँद लोहू सांही होंणा।

21ज़ुण प्रभु रा नाँ लेला,

सिर्फ़ तेई मुक्ति पाणी।’

22“ओ इस्राएलिओ, इन्हां गैला बै शुणा कि यीशु नासरी एक मांहणु ती, ज़ौसरा परमेश्वरा धिरै न होंणै रा सबूत तेइरै नोखै कोम होर चिन्ह चमत्कारा न प्रगट सा ज़ो परमेश्वरै तेइरै ज़रियै तुसा मौंझ़ै केरिआ रिहाऐ ज़ुणिबै तुसै आपु ज़ाणा सी। 23परमेश्वरै पैहलै तरकीब बणाई ती होर फैसला केरू ती कि यीशु तुसरै हौथा न देणा, तुसै लोका सौ पापी रै हौथै ढौकणै द्याइया सौ क्रूसा पैंधै च़ढ़ाइया मारनै द्याणा। 24पर सौहै परमेश्वरै मौऊत रै बन्धना न छड़ाईआ ज़िन्दा केरू किबैकि तेइरा मौऊत रै वशा न रौहणा अनहोना ती। 25दाऊद राज़ा मसीह रै बारै न बोला सा,

“ ‘हांऊँ प्रभु बै हमेशा आपणै सामनै हेरदा रौहू।

किबैकि सौ मूँ सैंघै सा,

हांऊँ तिन्हां लोका न नी डौरदा, ज़ो मेरा नुकसान केरना चाहा सी।

26एसा बजहा न मेरा मन खुश हुआ होर मेरी ज़िभ मगन हुई;

होर मेरै शरीरा न एक आशा बैणी दी सा,

27किबैकि तौ मेरै प्राण नरका न नी छ़ौड़नै,

होर न तौ आपणै पवित्र लोका री लाशा बै चौकिणै देणी।

28तैं मुँभै ज़ीणै रा रस्ता रिहाऊ सा;

तौ हांऊँ आपणै दर्शनै लाइया खुशी सैंघै भौरना।’

29“हे भाइयो होर बैहणियो, हांऊँ तेई दाऊद राज़ै रै बारै न बड़ै हौंसलै सैंघै तुसाबै बोला सा कि सौ ता मूँआ होर पौथू बी होर तेइरी कब्र औज़ा तैंईंयैं आसरै औखै सा। 30भविष्यवाणी केरनु आल़ा होईया होर ऐ ज़ाणिया कि परमेश्वरै मूँ सैंघै प्रतिज्ञा केरी सा कि, मूँ तेरै खानदाना न एक मांहणु तेरी राज़गद्दी पैंधै बशाणा।#2:30 2 शमूएल. 7:12-13, भजन सहिता. 132:11 31तेइयै होणू आल़ी गैल पैहलै हेरिया मसीह रै ज़िन्दै होंणै री भविष्यवाणी केरी कि तेइरै प्राण नरका न नी छ़ौड़ुऐ होर न तेइरी लाश चौकिणै धिनी। 32सौहै यीशु परमेश्वरै ज़िन्दा केरू ज़ौसरै आसै सब गुआह सी। 33ऐण्ढै तैरहै परमेश्वरै रै दैहिणै हौथै लाइया सैभी न उथड़ै औह्दै पाईआ होर ज़ौस पवित्र आत्मा रा परमेश्वरै वचन धिना ती सौ तेइयै आसा पैंधै भेज़ी सा ज़ो तुसै हेरा होर शुणा सी। 34किबैकि राज़ा दाऊद ता स्वर्गा बै नी च़ढ़ू; पर सौ आपु बोला सा,

“ ‘प्रभु परमेश्वरै मेरै प्रभु बै बोलू,

मेरै दैहिणै बेश,

35ज़ैबै तैंईंयैं कि हांऊँ,

तेरै बैरी बै सज़ा नी देनु।’ ” #भज. 110:1.

36“ऐबै सारै इस्राएली मांहणु पक्की तैरहा ज़ाणलै कि परमेश्वरै सौहै यीशु ज़ुण कि तुसै क्रूसा पैंधै च़ढ़ाऊ, प्रभु बी ठहराऊ होर मसीह बी।”

37तैबै ऐ गैला शुणनू आल़ै बोहू दुःखी हुऐ ती, होर ते पतरस होर दुज़ै तिन्हां प्रेरिता न पुछ़दै लागै कि, “हे भाइयो आसा कि केरना?”

38पतरसै तिन्हां बै बोलू, “आपणै पापा न मन बदला होर तुसा न हरेक माणू आपणै-आपणै पापै री माफी री तैंईंयैं यीशु मसीह रै नाँ न बपतिस्मा लेला, तैबै तुसा पवित्र आत्मा रा दान पाणा। 39किबैकि ऐ वायदा तुसाबै होर तुसरी औलादा बै होर तिन्हां सैभी दूरै-दूरै रै लोकै री तैंईंयैं सा ज़ुणिबै आसरा प्रभु परमेश्वर आपु हागै शाधला।”

40पतरसै बोहू सारी गैलै री गुआही देईया समझ़ाऐ, कि “तुसै आपु बै ऐसा टेढी ज़ाति न बच़ात्।” 41ज़ेतरै लोकै तेइरा वचन ग्रहण केरू तिन्हैं बपतिस्मा लेऊ होर तेई ध्याड़ै न लगभग त्रा हज़ार मांहणुऐ बपतिस्मा लेऊ होर तिन्हां सैंघै मिलै। 42ते तिन्हां प्रेरिता न शिक्षा पाणै, सँगति केरनै, प्रभु भोज़ केरनै होर प्रार्थना केरनै न मगन रौहै।

विश्वासी री संगती

43यरूश्लेमा रै सैभी लोका बै डौर पौई किबैकि तिन्हां प्रेरिता न बोहू सारै नौखै कोम होर चिन्ह च़मत्कार प्रगट होआ ती। 44ज़ेतरै बी लोका परमेश्वरा पैंधै बशाह केरा ती, ते सारै कठै रौहा ती होर तिन्हरी सारी चीज़ा साँझ़ै री ती। 45ते आपणी ज़रूरती रै मुताबक आपणी सम्पति होर समान बै बेच़िआ ज़ैण्ढी ज़रूरत होआ ती ते हर एकी बै बोंडा ती। 46ते हर रोज़ एक मन होईया मन्दिरा न कठा होआ ती होर घौरा-घौरा रोटी चोड़िया बड़ी खुशी सैंघै होर सीधै मना सैंघै रोटी खा ती, 47होर परमेश्वरै रा भजन केरा ती। सारै लोका तिन्हां न खुश ती होर ज़ेतरै लोका मुक्ति पा ती तिन्हां बै प्रभु हर रोज़ तिन्हां न मिला ती।

Currently Selected:

प्रेरित 2: KFX-NT

Highlight

Copy