मरकुस 4

बेज़ै बऊंणैं आल़े कथ्या

(मत्ती 13:1-9; लुका 8:4-8)

1तेखअ लागअ भी ईशू समुंदरे बाढै लोगा लै शिक्षा दैंदअ; ता तिधी हुऐ बडै भारी खास्सै लोग कठा और ईशू समुंदरा दी नाठअ और एकी किश्ती भितरी बेठअ, ता सारै लोग रहै समुंदरे बाढै शुक्की ज़ैगा खल़्हुई। 2ता ईशू लागअ तिन्नां का कथ्या खोज़ी कई गल्ला सखाऊंदअ, शिक्षा खोज़दी बोलअ ईशू इहअ,

3 “शूणां, एकी बारी निखल़अ एक बेज़ै बऊंणैं आल़अ बेज़ै बऊंदअ। 4बेज़ै बऊंदी बारी पल़अ धख बेज़अ बाते बाढै, ता सह च़ुंघअ च़ेल्लू पखीरू।

5 “धख बेज़अ पल़अ शकरीली ज़िम्मीं दी, तिधी निं तेता खास्सअ माटअ भेटअ इहअ करै टिप्पअ सह जाऊअ। 6तिन्नां टिपरूए ज़लैल़ै निं डुघै माटै दी आथी तै और ज़ांऊं चटाक धुपअ लागअ ता तिंयां टिपरू दझ़ै संघा शुक्कै।

7 “धख बेज़अ पल़अ झ़ाकल़ै। ज़ांऊं कांडै बझ़ै ता सह दाभूअ तेथ संघा तेथ निं फल़ लागै।

8 “पर धख बेज़अ पल़अ रज़दी-पज़दी ज़िम्मीं दी, ता तिन्नां दी लागी खास्सी फसल। कोई दी शौ गुणा, कोई दी शाठ गुणा और कोई तिह गुणा पज़ैआ।”

9तेखअ बोलअ ईशू तिन्नां लै, “ज़ै तम्हैं एता समझ़णअ च़ाहा, तै दै एसा गल्ला दी धैन कि मंऐं एभै तम्हां का किज़ै बोलअ।”

कथ्या खोज़णेंओ मकसद

(मत्ती 13:10-17; लुका 8:9,10)

10तेखअ ज़ांऊं ईशू आपणैं बारा च़ेल्लै और तिधी होरी कठा हुऐ दै लोगा संघै आसा त, च़ेल्लै आऐ ईशू सेटा, संघा पुछ़अ तिन्नैं कथ्या खोज़णें बारै।

11ईशू दैनअ तिन्नां लै ज़बाब, “तम्हैं ज़ुंण परमेशरे राज़ा दी आसा, हुंह खोज़ा तम्हां का खुल्ही करै। पर होरी लै ज़ुंण परमेशरे राज़ा दी नांईं आथी तिन्नां का खोज़ा हुंह कथ्या खोज़ी करै गल्ला। 12किल्हैकि (याशायाह 6:9; यिर्मयाह 5:21)

‘तिंयां निं मेरै मुंह भाल़ी करै शिखल़दै,

और मेरी गल्ला शूणीं करै निं समझ़दै।

ज़ै तिंयां समझ़ी जाए तै मांगणीं ती तिन्नां तेता लै माफी,

संघा मुंह करनै तै तिन्नें तिंयां पाप माफ ज़ुंण तिन्नैं किऐ।’” # 4:12 याशायाह 6:9-10; यिर्मयाह 5:21

बेज़ै बऊंणैं आल़े कथ्या समझ़ाऊंणी

(मत्ती 13:18-23; लुका 8:11-15)

13तेखअ बोलअ ईशू तिन्नां लै, “तम्हैं कै एता समझ़ै निं? तै ईंयां होर कथ्या किहअ करै समझ़णैं? 14बेज़ै बऊंणैं आल़अ ज़िम्मींदार आसा परमेशरे बैणा खोज़णैं आल़ै ज़िहअ।

15 “ज़ुंण बेज़अ बाते बाढै पल़अ, अह आसा तिन्नां लोगे बारै ज़ुंण परमेशरो बैण ता शूणां पर राख्स करा तिन्नां का तेता तेभी दूर।

16 “तिहअ ई शकरीली ज़िम्मीं दी पल़अ द बेज़अ आसा तिन्नां लोगे बारै ज़ुंण परमेशरो बैण शूणां और तेभी खुशी-खुशी संघै मना। 17पर आप्पू पाक्कअ विश्वास नांईं हणें बज़्हा रहा तिंयां थोल़ै ई धैल़ै लै। बैण मनणें बज़्हा ज़ांऊं तिन्नां लै मसीबता एछा ता तिंयां छ़ाडा तेभै परमेशरा दी विश्वास करनअ।

18 “ज़ुंण बेज़अ झ़ाकल़ै पल़अ सह आसा तिन्नां मणछे बारै ज़ुंण बैण ता शूणां, 19पर संसारै फिकर, धन-माया, मांण करनै ज़ेही संसारे गल्ला दी लाआ तिंयां आपणअ सारअ धैन मन। परमेशरे बैणा पाआ तिंयां बिसरी। तिंयां निं तिहअ करदै ज़िहअ परमेशर च़ाहा कि तिंयां करे।

20 “ज़ुंण बेज़अ रज़दी-पज़दी ज़िम्मीं दी पल़अ अह आसा तिन्नां लोगे बारै ज़ुंणी परमेशरो बैण शूणअ, मनअ और विश्वास किअ। तिन्नैं किअ तिहअ ई ज़िहअ परमेशर च़ाहा कि तिंयां करे। तिंयां आसा एही बधिया फसला ज़िहै ज़ेथ तिह गुणा, शाठ गुणा ता कोई दी शौ गुणा फसल हुई।”

लाटूए कथ्या

(लुका 8:16-18)

21ईशू बोलअ तिन्नां लै, “लोग निं लाटू ज़ाल़ी करै च़ठै हेठै या पाटल़ै हेठै दाबी डाहंदै। तेता डाहा उछ़टै दी ताकि सारै घरै प्रैशअ होए। 22किल्हैकि ढोपी डाही दी च़ीज़ शुझणीं सोभी का और गुप्त च़ीज़ हणीं सोभी सम्हनै प्रगट।

23 “ज़ै तम्हैं एता समझ़णअ च़ाहा, तै दै एसा गल्ला दी धैन कि मंऐं एभै तम्हां का किज़ै बोलअ।”

24तेखअ बोलअ ईशू तिन्नां लै, “ज़ुंण हुंह तम्हां लै बोला तेता शूणां धैन लाई, ज़ेऊ ढाल़ै तम्हैं होरी संघै बर्ताअ करा; तेऊ ढाल़ै हणअ तम्हां संघै बी बर्ताअ और तम्हां भेटणअ होर बी खास्सअ।

25 “ज़ुंण मेरी शिक्षा शूणां, तिन्नां लै दैणीं होर बी खास्सी समझ़। पर ज़ुंण मेरी शिक्षा नांईं शूणां, तिन्नां का निंणअ सह बी पोर्ही ज़ुंण तिन्नां का धख समझ़ होए बी।”

टिपणैं आल़ै बेज़े कथ्या

26ईशू बोलअ तिन्नां लै भी इहअ, “परमेशरो राज़ आसा इहअ, ज़िहअ ज़िम्मींदार ज़िम्मीं दी बेज़अ बऊआ। 27तेखअ रहा सह धैल़ आपणैं कामां लागी सह निं तेऊ बऊऐ दै बेज़ै बारै फिकर करदअ। बेज़ै का लागा टिपरू और बझ़ा तेतो निं तेऊ का थोघै हंदअ।

28 “अह ज़िम्मीं दैआ आप्पै फसल। पैहलै लागा टिपरू, तेखअ लागा सील, और एता बाद हआ सीला दी दाणअ तैर। 29पर ज़ेभै फसल लऊंणा लै जा हई, तेभै छ़ाडा सह तेता लऊंदै, किल्हैकि तेऊए फसला लऊंणेओ बगत गअ हई।”

शाऊईए बेज़े कथ्या

(मत्ती 13:31,32,34; लुका 13:18,19)

30तेखअ बोलअ ईशू तिन्नां लै, “हुंह परमेशरो राज़ किज़ू ज़िहअ खोज़ूं कि किहअ आसा? एता कहा कथ्या खोज़ी करै समझ़ाऊं?

31 “शूणां, परमेशरो राज़ आसा शाऊईए दाणैं ज़िहअ। शाऊईओ दाणअ आसा पृथूईए सोभी बेज़ै का होछ़अ बेज़अ। 32सह आसा ता पृथूईए सोभी बेज़ै का होछ़अ, पर ज़ेभै तेऊ बऊआ, ता सह हआ सोभी शाग-पाचा का बडअ। ज़ांऊं तेते शाण्हीं बडी हआ; ता सरगे डैऊणै आल़ै च़ेल्लू पखीरू बी सका तेते छ़ैल्ली दी बसेरअ करी।”

33ईशू खोज़ी तिन्नां का एही ई कई कथ्या और तिन्नें समझ़े साबै खोज़ा त तिन्नां का बैण। 34एही गल्ला समझ़ाऊंणा लै करा त सह लोगा मांझ़ै कथ्या खोज़ी गल्ला, पर कांगनरांगै डेऊई करै खोज़ा त ईशू आपणैं च़ेल्लै का तिन्नां सारी गल्लो सारअ भेद।

ढिश बागर शांत करनअ

(मत्ती 8:23-27; लुका 8:22-25)

35तेऊ ई धैल़ै ज़ांऊं सान्ह च़ाल्ली ती पल़ी ता ईशू बोलअ आपणैं च़ेल्लै लै, “च़ाल्ला हाम्हां डेऊणअ गलील समुंदरा पारा लै।”

36ईशू त किश्ती का ई लागअ द लोगा संघै गल्ला करदअ और च़ेल्लै नाठै ईशू संघा निंईं लोगा छ़ाडी तिधा का पारा बाखा लै। होर बी नाठै पिछ़ू तिन्नें आपणीं किश्ती दी बेठी संघा ती तेऊ संघै होर बी किश्ती।

37तेखअ हुअ इहअ कि बडअ भारी ढिश बागर आअ, और छ़ाली लागी एतरी कि किश्ती लागी पाणीं करै भरदी।

38पर आप्पू त ईशू किश्तीए पिछ़लै पास्सै दी सुत्तअ द। च़ेल्लै झ़ैऊअ ईशू खल़अ और बोलअ, “हे गूरू, ताह हैल़अ-फिकर निं आथी कि हाम्हैं सोभै च़ाल्लै पाणीं जैंदरी डुबी खतम हई?”

39ईशू उझ़ुअ खल़अ और ढिश बागरी लै एक ज़ोरै झ़ाहल़ काढी, और समुंदरे छ़ाली लै बोलअ, “शांत हअ, इधी रुक।” ता ढिश बागर रुकअ तेभी और समुंदर हुअ शांत, तैबै जाई करै हुअ चैन। 40तैबै बोलअ ईशू तिन्नां लै, “तम्हैं किल्है डरा? तम्हां कै अज़ी बी विश्वास निं हुअ?” (भज़न 107:29)

41तिन्नां सोभी फिरअ बडअ भारी हैल़अ और तिंयां लागै आप्पू मांझ़ै इहअ बोलदै, “अह कुंण आसा, एऊए हर गल्ला मना ढिश बागर और समुंदरे छ़ाली बी?”

Currently Selected:

मरकुस 4: OSJNT

Highlight

Copy