मरकुस 5

भूत शाचअ द मणछ ठीक करनअ

(मत्ती 8:28-34; लुका 8:26-39)

1तिंयां पुजै समुंदरा पार गरासेनी लाक्कै दी 2और ज़ांऊं ईशू किश्ती का होथअ, ता तेभी आअ एक मणछ तेऊ मणछा दी त भूत शाचअ द, सह आअ मल्थाना का ईशू सेटा लै ठुर्ही करै। 3सह रहा त मल्थाना ई दी और तेऊ निं शांघल़ी करै बी बान्हीं सकदै तै।

4किल्हैकि लोगै बान्हअ त सह शांघल़ी करै बी पर सह पाआ त तेता बी चोल़ी और तेऊ निं कोहै बश करी सकदअ त। 5सह रहा त धैल़ी राची मल्थाना दी और नाल़ै-धारा ज़ोरै-ज़ोरै हाक्का लैल़ा लांदी रिंगदअ और आपणीं घेरी करा त सह तिछै पात्थरा करै क्रिंज़ा पाई छ़िन्ह बिन्ह।

6ईशू भाल़ी करै आअ सह दूरा का ठुर्ही करै और माथअ टेकी करै बोलअ तेऊ लैल़ा पाई इहअ 7“हे ईशू परम प्रधान परमेशरे शोहरूआ, मेरअ ताह संघै कै मेल़-ज़ोल़? हुंह दैआ ताल्है परमेशरे सोह कि तूह निं मुल्है दुख दैई।” (मत्ती 8:29; 1 राज़ा 17:18) 8किल्हैकि ईशू बोलअ तेऊ लै इहअ, “भूता, एऊ मणछा का निखल़ पोर्ही।”

9ईशू तेऊ का पुछ़अ, “ताह नांअ कै आसा?”

तेऊ दैनअ ईशू लै ज़बाब, “मुंह नांअ आसा सैना, किल्हैकि हाम्हैं आसा खास्सै।” 10तेऊ की ईशू का बडी भारी अरज़ कि हाम्हां निं एऊ लाक्कै का बागै काढी।

11तिधी त धारठी लागअ द खास्सै सुंगरो एक छ़ुंड च़रदअ; 12तिन्नैं भूतै की ईशू का एही अरज़, “हाम्हां दै इना सुंगरा मांझ़ा लै डेऊणैं, ताकि हाम्हैं इना भितरी पेशी सके।”

13तेखअ दैनअ ईशू तिन्नां लै सुंगरा दी पेशणैंओ हुकम। तिंयां भूत पेठै तेऊ मणछा का निखल़ी करै सुंगरा भितरी। तिन्नां सुंगरे छ़ुंडा दी तै खास्सै नांईं ता कोई दूई हज़ार सुंगर। तिंयां सुंगर पल़ै बेगरै हई करै धारठी प्रैंदा का समुंदरा भितरी। इहअ करै हुऐ तिंयां सुंगर सोभ खतम।

14तिंयां सुंगरा गुआल़ै ठुर्है तिधा का गराऊंआं नगरी लै और तिन्नैं खोज़अ इना गल्लो सारअ समाद तिन्नां का और खास्सै लोग आऐ तिधी भाल़ै। 15ईशू सेटा पुजी करै ज़ांऊं सह भूत शाचअ द मणछ होशा-बाशा दी झिकल़ै बान्हीं बेठअ द भाल़ी करै डरै तिंयां सोभ।

16तिधी ज़ुंणी तिंयां गल्ला आपणीं आछी भाल़ी ती तिन्नैं खोज़अ तिन्नां होरी का तेऊ भूत शाचै दै मणछो और तिन्नां सुंगरो पूरअ हाल। 17तिंयां सोभ लोग लागै ईशू का एही अरज़ करदै “म्हारै एऊ लाक्कै का डेऊ बागै।”

18ज़ांऊं ईशू किश्ती दी बेशी च़ाल्लअ ता ज़हा मणछा का भूत निखल़अ त सह लागअ ईशू का अरज़ करदअ कि मुंबी दै ताह संघै एछणैं।

19पर ईशू निं तेऊए अह गल्ल मनी और तेऊ लै बोलअ, “आपणैं घरै डेऊ और लोगा का खोज़ इना गल्ला कि प्रभू ताल्है केही झींण की और ताल्है किहै बडै-बडै च़मत्कारे का किऐ।”

20सह मणछ बी तिधा का डेऊई करै दिकापुलिस लाक्कै दी लागअ इना गल्लो प्रच़ार करदअ कि ईशू मुल्है किहै बडै-बडै च़मत्कारे का किऐ; और सोभ लोग हआ तै रहैन।

मूंईं दी शोहरी और एक बमार बेटल़ी

(मत्ती 9:18-26; लुका 8:40-56)

21ईशू नाठअ भी किश्ती दी बेशी समुंदरा पार। ता तिधी हुऐ तेऊ सेटा बडै भारी लोग कठा।

22तिधी ज़ेतरी सह पुजअ ता तेभी आअ याईर नांओं एक आराधना कोठीओ कारदार। ईशू भाल़ी करै टेक्कअ तेऊ ईशू सेटा माथअ। 23तेऊ की ईशू सेटा एही अरज़, “मेरी होछ़ी शोहरी आसा मरनै आल़ी। तूह एछ और तेसा छ़ुंह आपणैं हाथा करै ताकि सह मरनै का बच़े।”

24ईशू लागअ तेखअ तेऊए अरज़ शूणीं करै तेऊ संघै हांढदअ। होर बी नाठै पिछ़ू खास्सै लोग।

25बाता हांढदी ती एक बेटल़ी, तेसा ती बारा साला ओर्ही लोहू बगणें बमारी। 26तेसा कराऊअ त बडै भारी बैईदा का आपणअ लाज़ बी पर सह निस्सी ती किछ़ू गल्ला करै ठीक हई। तेसा की आपणीं सारी ज़िन्दगीए कमाई बी तेसा बमारी पिछ़ू खतम; पर बमारी का ठीक हणें ज़ैगा हुई सह होर बी खास्सी बमार।

27ईशूए गल्ला शूणीं करै नाठी सह खास्सै लोगा जैंदरी ईशू पिछ़ू और तेसा छ़ुंअ पिछ़ू का ईशूए झिकल़ैओ पाल्लअ। 28किल्हैकि सह सोठा ती आपणैं मनैं इहअ, “ज़ै हुंह ईशूए झिकल़ै बी छुंए ता तेता करै जाणीं हुंह एसा बमारी का छ़ुटी।” 29ज़ांऊं तेसा ईशूए झिकल़ै छ़ूंऐं ता तेभी हुअ तेसो लोहू बगणअ बंद।

30ईशू का ज़ाण्हूंअ आप्पू बी कि मुखा निखल़ी शगती; ता ईशू पुछ़अ तेतरै लोगा जैंदरी पिछ़ू फिरी करै, “मेरै झिकल़ै कुंणी छ़ूंऐं?” 31तेऊए च़ेल्लै बोलअ तेऊ लै, “तूह इना केही गल्ला करा, तूह भाल़ा बी हैनूं ताह पिछ़ू भाल़ केतरै लोग आसा हांढदै लागै दै, और तूह बोला कि कुंणी हुंह छ़ुंअ!”

32ईशू भाल़अ फेर तेऊ भाल़णा ज़ुंणी अह काम किअ त। 33तेखअ सोठअ तेसा बेटल़ी इहअ कि मेरी भाल़ केही भलाई हुई, तेसा डरदी-काम्बदी ईशू सेटा माथअ टेकी करै खोज़ी सारी गल्ला शुची-शुची।

34ईशू बोलअ तेसा लै, “शोहरी, तंऐं किअ विश्वास कि हुंह सका ताह ठीक करी और मंऐं हेरी तूह एसा बमारी का राम्बल़ी करी। सुलै करै डेऊ आपणैं घरा लै ऐबै गई तूह एसा बमारी का छ़ुटी।”

35ईशू त इहअ बोलदअ ई लागअ द कि आराधना कोठीए कारदारे घरा का दैनअ लोगै समाद, “तेरी शोहरी ता मरी गई, ऐबै तंऐं गूरू लै किल्है लाअ थोघै बाझ़ी इधा लै एछणेंओ कष्ट दैई?”

36ज़िना गल्ला करदै तिंयां तै लागै दै, तिंयां गल्ला की ईशू शूणीं नां शूणीं; और आराधना कोठीए कारदारा लै ईशू बोलअ, “हैल़अ निं करी, तूह डाह सिधअ विश्वास।”

37ईशू निं पतरस, याकूब और तेऊए भाऊ युहन्ना छ़ाडी होरी कोही आप्पू संघै एछणैं दैनअ।

38आराधना कोठीए कारदारे घरै पुजी करै भाल़ै ईशू तिंयां लोग लेरदै-पकारदै। 39तेखअ तेऊ भितरी डेऊई करै तिन्नां लै बोलअ, “तम्हैं किल्है आसा लागै दै लेरदै-पकारदै? शोहरी निं मूंईं दी आथी अह आसा सुत्ती दी।”

40तिंयां सोभ लागै एसा गल्ला शूणीं करै सुहांगा करदै, पर ईशू काढै तिधा का तिंयां सोभ लोग बागा लै और शोहरीए आम्मां-बाप्पू और आपणैं चअन च़ेल्लै डाहै भितरी ज़िधी शोहरी ती डाही दी।

41तेखअ ईशू शोहरीओ हाथ ढाकी करै बोलअ तेऊए आपणीं बोली दी, “तलीता कूम्मीं” एतो मतलब हआ, “लान्हीऐ खल़ी उझ़ू।” 42ज़ांऊं ईशू इहअ बोलअ ता सह शोहरी उझ़ुई तेभी खल़ी और सह लागी हांढदी-फिरदी; किल्हैकि सह आसा ती बारा साले। एसा गल्ला भाल़ी हुऐ तिंयां रहैन।

43तेखअ ईशू तिन्नां लै चतैनगी दैनी कि एसा गल्लो थोघ निं लोल़ी कोही का लागअ, तेखअ बोलअ तेऊ तिन्नां लै इहअ, “एसा शोहरी लै दैआ किज़ै खाणां लै।”

Currently Selected:

मरकुस 5: OSJNT

Highlight

Copy