मरकुस 3

मछैंऐं दै हाथा आल़अ ठीक करनअ

(मत्ती 10:1-4; लुका 6:12-16)

1तेखअ नाठअ एकी होरी बारी भी ईशू आराधना कोठी लै। तिधी त एक मणछ इहअ कि तेऊओ हाथ त मछैंअ द। 2फरीसी पंथे लोग आसा तै ईशू लै दोशा लाणें तैणीं ताखुऐ दै कि हाम्हां भाल़णअ कि अह बशैघे धैल़ी एऊ मणछा राम्बल़अ करा कि नांईं ज़ुंण मुसा गूरे बधाने साबै ठीक निं आथी।

3ईशू बोलअ तेऊ मछैंऐं दै हाथे मणछा लै, “इधी खल़्हू सोभी सम्हनै।” 4तेखअ पुछ़अ ईशू तिन्नां का, “बधाना दी किज़ै आसा लिखअ द? बशैघे धैल़ी भलअ करनअ ठीक आसा कि बूरअ करनअ? प्राण बच़ाऊंणै कि मारनअ?” पर तिंयां सोभ रहै च़ुप्पी।

5ईशू भाल़अ फेर संघा बोलअ तेऊ तिन्नें काठै मना का दुखी हई करै रोशा संघै तेऊ मणछा लै, “आपणअ हाथ कर आजू।” तेऊ बी किअ आपणअ हाथ आजू और तेऊओ हाथ हुअ राम्बल़अ।

6तेखअ लागै फरीसी तिधा का बागै डेऊई करै तेभी हेरोदेस राज़े पक्ष लणै आल़ै लोगा संघै ईशूए खलाफ इहै जोगा करदै, “अह पाणअ त हाम्हां किहअ करै मारी।”

ईशू पिछ़ू खास्सै लोगो एछणअ

7कफरनहूम नगरी का नाठअ ईशू आपणैं च़ेल्लै संघै गलील समुंदरा बाखा लै। 8गलील, यहूदा लाक्कै, इदूमिआ लाक्कै, येरुशलेम नगरी और जरदण नदी पार और सूर और सैदा नगरी ओरी-पोरी का आऐ बडै भारी लोग ईशू पिछ़ू। तिन्नैं शूणअ कि ईशू करा बडै-बडै नुआहरै काम और तेता भाल़ै आऐ तिंयां सोभ ईशू सेटा लै।

9ईशू बोलअ आपणैं च़ेल्लै का, “इधी हुअ लोगो खास्सअ झाल़अ एता लै करा तम्हैं मुल्है एक होछ़ी किश्ती तैर ताकि तेथ प्रैंदै बेशी करै हुंह इना लोगा संघै गल्ला करूं।”

10किल्हैकि ईशू किऐ तै तधू कई बमार मणछ ठीक और ज़ेतरै बी बमार आऐ तै; तिंयां पल़ै तेऊ छ़ुंहदै एकी दुजै प्रैंदा बाती चुटी।

11भूता आल़ै मणछ बी ज़ांऊं ईशू भाल़ा तै, तिंयां बी पल़ा तै ईशू सेटा उटी बाखा और लैल़ा-पकारा लाई करै बोला तै तिंयां इहअ, “तूह आसा परमेशरो शोहरू।” 12ईशू बोलअ तिन्नां भूता लै चतैनगी दैई करै इहअ, “मेरै बारै निं कोही का खोज़ी कि हुंह कुंण आसा।”

बारा च़ेल्लै छ़ांटणैं

(मत्ती 10:1-4; लुका 6:12-16)

13तेखअ नाठअ ईशू धारा प्रैंदा लै और ज़ुंण तेऊ आप्पू संघै निंणै च़ाहै तिंयां शादै तेऊ आप्पू सेटा और तिंयां नाठै तेऊ संघै।

14तेखअ छ़ांटै तेऊ बारा ज़ण्हैं और तिन्नां लै बोलअ तेऊ शधाणूं कि तिंयां तेऊ संघा-संघा रहे और सह तिन्नां प्रच़ार करदै छ़ाडी सके, 15संघा लोगा का भूता काढणेंओ हक बी तिन्नां का होए। 16तिंयां बारा ज़ण्हैं आसा ईंयां,

शमौन ज़सरअ नांअ ईशू पतरस डाहअ,

17जबदीए शोहरू याकूब और तेऊओ भाऊ युहन्ना ज़हा नांअ ईशू गुल़ूबिज़ल़ूओ शोहरू डाहअ त।

18आन्दरू, फिलिप्पुस, बरतुल्मैं, मत्ती, थोमा, हलफीओ शोहरू याकूब, तदैई शमौन कनानी,

19करोती गराऊंओ यहूदा ज़ुंणी ईशू ढाकणैं बी बझ़ैल़अ त।

ईशू और भूतो राज़अ

(मत्ती 12:22-32; लुका 11:14-23; 12:10)

20तेखअ आऐ ईशू और तेऊए च़ेल्लै कफरनहूम नगरी एकी घरै और तिधी हुऐ एतरै खास्सै लोग कठा कि तिन्नां निं रोटी खाणेंओ बगत बी भेटअ।

21ज़ांऊं तेऊए घरा आल़ै इहअ शूणअ, ता तिंयां आऐ तेऊ घरा लै निंदै; किल्हैकि कई लोगै बोलअ तिन्नां का कि “सह आसा बेगरअ हुअ द।”

22येरुशलेम नगरी का आसा तै शास्त्री बी आऐ दै और तिंयां बी बोला तै इहअ कि एऊ दी आसा, “राख्स” और, “अह काढा भूते राज़ै राख्से शगती करै भूत।”

23एसा गल्ला लै शादै ईशू तिंयां आप्पू सेटा लै और तिंयां समझ़ाऊऐ एही कथ्या खोज़ी करै, “राख्स किहअ करै सका भूत बागै काढी! तिंयां ता तेऊए आपणैं आसा?

24 “ज़ै कसरी राईसी दी फूट पल़े; ता सह राईसी हआ बरैबाद। 25ठीक इहअ ई ज़ै कसा घरे टबरा मांझ़ै फूट पल़े, ता सह घर बी हआ बरैबाद। 26इहअ करै ज़ै राख्स आपणअ ई बरोधी हई करै आप्पू ई मांझ़ै फूट पाए, ता तेऊओ राज़ किहअ करै सका बणीं रही? तेऊओ राज़ हआ खतम।

27 “पर कोहै निं राख्सा ज़िहै जोधै मणछे घरै पेशी करै तेऊओ धन तेभै तैणीं लुटी सकदअ ज़ेभै तैणीं की सह तेऊ जोधै बान्हीं नां लऐ। तेखअ सका सह तेऊओ धन लुटी।

28 “हुंह खोज़ा तम्हां का सत्त कि मणछे सोभ पाप और निंदा हणैं माफ, 29पर ज़ुंण बी पबित्र आत्में खलाफ निंदा करे सह निं कधि माफ हणअ। सह हणअ सदा लै पापो ज़ुल्म करने आल़अ।” 30ईशू बोलअ तिन्नां लै इहअ तै कि तिंयां बोला तै तेऊ लै इहअ कि “एऊ दी आसा भूत शाचअ द।”

ईशूए आम्मां और भाई

(मत्ती 12:46-50; लुका 8:19-21)

31तेखअ आऐ ईशूए आम्मां और भाऊ तेऊ भाल़ै तिंयां खल़्हुऐ बागै और तिन्नैं दैनअ ईशू लै समाद कि बागै एछी कर हाम्हां संघै गल्ला।

32ईशू फेर तै बडै भारी खास्सै लोग कठा हुऐ दै ता तिन्नां मांझ़ै बोलअ एकी ईशू लै, “भाल़, तेरी आम्मां, भाई और बैहण आसा बागै ताह न्हैल़ै लागै दै तिंयां च़ाहा ताह संघै गल्ला-बाता करनी।”

33ईशू दैनअ तिन्नां लै ज़बाब, “मेरी आम्मां और मेरै भाई और बैहण कुंण आसा?” 34तेखअ भाल़अ ईशू आप्पू फेर और ज़ुंण तिधी आसा तै, तेऊ बोलअ तिन्नां लै, “भाल़ा, मेरी आम्मां और मेरै भाई और बैहण आसा ईंयां। 35किल्हैकि ज़ुंण परमेशरो बैण शूणां और मना तिंयां ई आसा मेरै भाई-बैहण और आम्मां।”

Currently Selected:

मरकुस 3: OSJNT

Highlight

Copy