मरकुस 2
2
दरंगे बमारी आल़अ ठीक करनअ
(मत्ती 9:1-8; लुका 5:17-26)
1खास्सै धैल़ै बाद आअ ईशू भी कफरनहूम नगरी लै और लोगै शूणअ कि सह आसा एऊ घरै। 2तेखअ तिधी हुऐ एतरै लोग कठा कि दुआरा आजू बी निं सिऊंणी सहरना लै ज़ैगा रही और ईशू त तिन्नां का परमेशरे बैणा खोज़दअ लागअ द।
3तिधी आणअ लोगै एक दरंगे बमारी आल़अ मरीज़ च़ऊ मणछा करै ईशू सेटा लै च़की। 4तिधी दुआरा सेटा तै बडै भारी खास्सै लोग कठा हुऐ दै। खास्सै लोगा हणें बज़्हा निं तिंयां ईशू सेटा पुजी सकै। तिन्नैं पेच़अ तेऊ घरो छ़ाप्पर तैहा सिधा ज़ेथ हेठै ईशू त बेठअ द। ज़ेथ दी सह दरंगो मरीज़ सताऊअ द त, सह बछ़ाऊणअ छ़ड़ाऊअ तिन्नैं छ़ाप्परा बाती च़ऊ कूणैं राशी बान्हीं करै उंधै।
5ईशू बोलअ तिन्नों विश्वास भाल़ी करै तेऊ दरंगे बमारी आल़ै मरीज़ा का,
“मेरै शोहरूआ, तेरै पाप हुऐ माफ।”
6तेखअ कई शास्त्री ज़ुंण तिधी सभा दी आसा तै बेठै दै तिंयां लागै सोठदै कि 7“अह मणछ इहअ किल्है बोला? अह ता परमेशरे कदर बी निं करदअ, परमेशरा छ़ाडी होर कुंण सका पाप माफ करी?” (याशायाह 43:25)
8ईशू हेरअ तेभी आपणीं आत्मां दी तिन्नें मनें गल्ला भुझ़ी कि ईंयां किज़ै सोठा और तेऊ तिन्नां लै बोलअ,
“तम्हैं आपणैं मना दी इहअ किल्है आसा लागै दै सोठदै?
9 “सान किज़ै आसा? एऊ दरंगे मरीज़ा लै इहअ बोल़णअ कि तेरै पाप हुऐ माफ या इहअ बोल़णअ उझ़ू आपणैं बछ़ाऊणैं च़क और हांढदअ फिरदअ लाग? 10ज़िहअ करै तम्हां का थोघ लागे कि मुंह मणछे शोहरू लै आसा पृथूई दी पाप माफ करनैओ हक।”
तेखअ बोलअ ईशू तेऊ दरंगे मरीज़ा लै, 11“हुंह बोला ताल्है, उझ़ू आपणैं एऊ बछ़ाऊणैं च़क संघा डेऊ आपणैं घरा लै।”
12सह मरीज़ उझ़ुअ तेभी सोभी सम्हनै खल़अ और आपणैं बछ़ाऊणैं च़की नाठअ सह आपणीं ज़ांघा हांढी घरा लै। एसा गल्ला भाल़ी हुऐ सोभ लोग रहैन और तिंयां लागै परमेशरे बड़ाई करदै कि हाम्हैं निं इहअ च़मत्कार आझ़ तैणीं कधि हेरअ।
कारै गराहणै आल़अ लेबी शादणअ
(मत्ती 9:9-13; लुका 5:27-32)
13ईशू बी तिधा का उझ़ुअ और सह नाठअ समुंदरे बाढै ता तिधी आऐ बडै भारी लोग तेऊ सेटा और सह लागअ तिन्नां लै शिक्षा दैंदअ।
14तिधा का डेऊंदी बारी भाल़अ ईशू हलफीओ शोहरू लेबी नांओं मणछ कारै गराहणें थल़्ही दी बेठअ द और तेऊ लै बोलअ, “मुंह पिछ़ू एछ।” ता सह बी तिधा का उझ़ुअ और सह नाठअ ईशू संघै।
15ज़ांऊं सह तेऊए घरै रोटी खांदअ बेठअ, ता तिधी बेठै कई साबा का बाधू कारै गराहणै आल़ै और पापी मणछ ईशू और तेऊए च़ेल्लै संघै रोटी खांदै किल्हैकि तिधी आसा तै इहै खास्सै लोग ज़ुंण ईशू संघा हआ तै।
16बधाना सखाऊंणै आल़ै शास्त्री ज़ुंण फरीसी मणछ तै, तिन्नैं बोलअ एता भाल़ी करै कि अह आसा लागअ द कारै गराहणै आल़ै और पापी मणछा संघै रोटी खांदअ। तेखअ बोलअ तिन्नैं ईशूए च़ेल्लै लै,
“अह साबा का बाधू कारै गराहणै आल़ै और पापी मणछा संघै किल्है खाआ-पिआ?” 17इना गल्ला शूणीं करै बोलअ ईशू तिन्नां लै, “ज़हा कोई दाह-खीज़ नांईं हंदी; तेऊ निं बैईदे ज़रुरत हंदी पर बमारा हआ बैईदे ज़रुरत; हुंह निं धर्मीं लै आथी पर हुंह आसा पापी शधाणूं आअ द।”
ब्रत करनैओ सुआल
(मत्ती 9:14-17; लुका 5:33-39)
18युहन्ना डुबकी दैणैं आल़े च़ेल्लै और फरीसी लोग करा तै ब्रत; ता तिन्नैं बोलअ ईशू सेटा एछी करै, “युहन्ने च़ेल्लै और फरीसी लोगे च़ेल्लै करा ब्रत; पर तेरै च़ेल्लै किल्है निं ब्रत करदै?”
19ईशू दैनअ तिन्नां लै ज़बाब, “ज़ेभै तैणीं लाल़अ बरातू संघै रहा, तेभै निं तिंयां ब्रत करदै। 20एक बगत एछणअ इहअ बी कि लाल़अ करनअ तिन्नां का ज़ुदअ और तेभै करनअ तिन्नां ब्रत।”
21 “नऊंऐं झिकल़ैओ शाटअ निं पराणैं झिकल़ै दी कोहै लांदअ, किल्हैकि झिकल़ै धोंदी बारी धेल़ा सह नऊंअ शाटअ तेऊ पराणैं झिकल़ै होर बी खास्सअ।
22 “नऊंऐं अंगूरे रसा बी निं पराणैं खाल्हल़ै दी कोहै डाहंदै, नांईं ता पराणैं खाल्हल़ै फुटा तेता करै और अंगूरो रस और तिंयां खाल्हल़ै हआ इहअ करै दुहै गल्ला बरैबाद। पर नऊंअ अंगूरो रस सका नऊंऐं खाल्हल़ै दी भरी।”
बशैघे धैल़ीओ बी प्रभू
(मत्ती 12:1-8; लुका 6:1-5)
23एकी धैल़ै त ईशू बशैघे धैल़ी खेचा बाती लागअ द डेऊंदअ, और तेऊए च़ेल्लै लागै बाता हांढदी खाणां लै गिंहूंए सीला चोल़दै। (बधान 23:25)
24फरीसी लोगै बोलअ तेऊ लै, “हेर, ईंयां बशैघे धैल़ी तेऊ कामां किल्है करा ज़ुंण तेसा धैल़ी करनअ मुसा गूरे बधाने साबै ठीक निं आथी?”
25ईशू दैनअ तिन्नां लै ज़बाब, “तम्हैं कै कधू इहअ निं पहल़अ कि ज़धू दाबेद राज़ै ज़रुरत पल़ी और ज़ांऊं सह और तेऊए साथी भुखै तै तेभै तेऊ किज़ै किअ? 26तेऊ किहअ करै खाई अबियातार माहा परोहिते ज़मानैं परमेशरे च़ऊंरै भितरी डेऊई करै भैंट दैनी दी रोटी। ज़ेता मुसा गूरे बधाने साबै परोहिता छ़ाडी होर कोहै निं खाई सकदअ त, और तेऊ दैनी तिंयां आपणैं साथी लै बी?”
27तेखअ बोलअ ईशू तिन्नां लै, “बशैघो धैल़अ आसा मणछा लै बणांअ द, मणछ निं बशैघे धैल़ै लै आथी। 28तैही आसा हुंह मणछो शोहरू बशैघे धैल़ीओ बी मालक।”
Currently Selected:
मरकुस 2: OSJNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.