मरकुस 1

युहन्ना डुबकी दैणैं आल़ैओ प्रच़ार

(मत्ती 3:1-12; लुका 3:1-18; युहन्ना 1:19-28)

1अह खुशीओ समाद आसा ईशू मसीहे बारै ज़ुंण परमेशरो शोहरू आसा। एते शुरूआत हुई इहअ करै 2ज़िहअ परमेशरे गूर याशायाहे कताबा दी आसा लिखअ द, (मत्ती 11:10; मलाकी 3:1) (याशायाह 40:3)

“भाल़, मुंह छ़ाडणअ आपणअ दूत ताह आजू

ज़हा ताल्है बात दैणीं बणांईं।

3दूर उज़ल़ ज़ैगा का आसा लागअ द एकी हाक्का लाणैं आल़ैओ बोल शुण्हदअ कि

‘प्रभूए सल़का करा सरली और तेऊए सुआगत करना लै रहा तैर्हुई।’”

4अह दूत आसा त युहन्ना डुबकी दैणैं आल़अ। सह रहा त उज़ल़ कराहणीं ज़ैगा दी और सह आसा त इहअ प्रच़ार करदअ लागअ द कि आपणअ मन बदल़ा और पाप करनअ छ़ाडा ताकि परमेशर तम्हां माफ करे और तेखअ दैंऊं हुंह तम्हां लै डुबकी।

5यहूदा लाक्के और येरुशलेम नगरी रहणैं आल़ै बडै भारी लोग नाठै तेऊ सेटा लै और तिन्नैं लई आपणैं-आपणैं पाप मनी करै जरदण नदी दी तेऊ का डुबकी।

6युहन्ना बान्हां त घेरी ऊँटे ऊने झिकल़ै और आपणीं कुछी दी बान्हां त च़ाम्भल़ेओ गाचू और खाणां लै खाआ त रैट्टै और मखीर। (2 राज़ा 1:8; मत्ती 3:4)

7संघा करा त सह इहअ प्रच़ार “ज़ुंण मुंह बाद एछणैं आल़अ आसा, सह आसा सोभी का महान। इधी तैणीं कि हुंह निं तेऊ सेटा एता जोगी बी आथी कि हुंह तेऊए पोलल़ै खोल्हणैं च़ाकरी करनै आल़अ टैहलू बणीं सकूं।

8“मंऐं ता दैनी तम्हां लै पाणीं दी डुबकी पर तेऊ दैणीं तम्हां लै पबित्र आत्मां दी डुबकी।”

ईशूए पाणीं दी डुबकी और परिक्षा

(मत्ती 3:13—4:11; लुका 3:21,22; 4:1-13)

9तिन्नां धैल़ै आअ ईशू बी गलील लाक्के नासरत गराऊंआं का युहन्ना सेटा लै और जरदण नदी दी तेऊ का डुबकी लई।

10ईशू निखल़अ पाणीं जैंदरा का डुबकी दैई करै उझै। ता तेभी खुल्हअ तेऊ लै सरग। सरगा का भाल़ी तेऊ पबित्र आत्मां पालल़ी ज़ेही आप्पू प्रैंदै एछदी।

11परमेशरै बोलअ स्वर्गा का इहअ, “तूह आसा मेरअ शोहरू ज़हा लै हुंह खास्सअ झ़ूरा। हुंह आसा ताखा खुश।”

12पबित्र आत्मां निंयं तेभी ईशू कराहणीं उज़ल़ ज़ैगा लै। 13तिधी रहअ राख्स च़ाल़्ही धैल़ी तैणीं तेऊ परखदअ लागी और सह रहअ उज़ल़ ज़ैगा दी बणें ज़ीबा संघै और स्वर्ग दूत रहै तेऊए सेऊआ-च़ाकरी करदै लागी।

ईशूए सेऊआ-च़ाकरीए शुरूआत

(मत्ती 4:12-17; लुका 4:14,15)

14युहन्ना कैद करनै का बाद आअ ईशू गलील लाक्कै लै। तिधी खोज़अ लोगा का तेऊ परमेशरो खुशीओ समाद इहअ बोली कि, 15“ज़ेते बारै परमेशरै बोलअ त सह बगत गअ पुजी; स्वर्गो राज़ गअ नेल़ एछी। पाप करनअ छ़ाडा आपणअ मन बदल़ा और एऊ खुशीए समादा दी करा विश्वास।”

माह्छ़ली ढाकणैं आल़ै शादणैं

(मत्ती 4:18-22; लुका 5:1-11)

16गलील समुंदरे बाढै हांढदी-फिरदी भाल़ै ईशू शमौन और तेऊओ भाऊ आन्दरू समुंदरा दी माह्छ़ली ढाकणा लै ज़ाल़ा पांदै, किल्हैकि तिंयां तै माह्छ़ली ढाकणैं आल़ै।

17ईशू बोलअ तिन्नां लै, “ज़ेही तम्हैं माह्छ़ली कठा करदै आसा लागै दै, मुंह संघै च़ाल्ला हुंह सखाऊं तम्हां मेरै च़ेल्लै हणां लै मणछ कठा करनै।” 18तिंयां बी लागै तेभी ज़ाल़ा छ़ाडी करै तेऊ संघै हांढदै।

19थोल़ै आजू डेऊई करै भाल़ै ईशू दूई होर भाई, याकूब और तेऊओ भाऊ युहन्ना। तिंयां तै लागै दै आपणैं बाप्पू जबदी संघै किश्ती प्रैंदै बेशी ज़ाल़ा सोहरदै। 20तेऊ शादै तेभी तिंयां बी और तिंयां लागै आपणैं बाप्पू जबदी होरी मज़दूरा संघै किश्ती दी छ़ाडी करै तेऊ संघै हांढदै।

भूत शाचअ द मणछ ठीक करनअ

(लुका 4:31-37)

21तिधा का पुजै तिंयां कफरनहूम नगरी और ईशू लागअ तेभी पोर्ही बशैघे धैल़ी आराधना कोठी दी शिक्षा दैंदअ। 22सोभ लोग हुऐ तिधी तेऊए शिक्षा शूणीं रहैन।

किल्हैकि सह निं शास्त्री फरीसी लोगा ज़ेही शिक्षा दैंदअ त ज़ुंण लोगा का बधाने तिन्नां गल्ला भी-भी खोज़ा तै ज़ुंण पैहलै होरी आसा बोली दी। पर सह दैआ त इहै गूरू ज़ेही शिक्षा ज़ेतो तेऊ हक और आप्पू का थोघ हआ त।

23तिधी त तिन्नें आराधना कोठी दी एक मणछ तेऊ दी त भूत शाचअ द। 24तेऊ पाई ज़ोरै-ज़ोरै हाक्का। सह लागअ बोलदअ, “हे ईशू नासरी, हाम्हां भूता निं ताह संघै किछ़ै काम आथी! तूह कै हाम्हां खतम करदअ आसा आअ द? मुखा आसा थोघ कि तूह कुंण आसा, तूह आसा परमेशरै छ़ाडअ द पबित्र।”

25ईशू लागअ तेऊ नैरदअ, “च़ुप्पी रह; और एऊ मणछा का निखल़ पोर्ही।” 26तिंयां भूत निखल़ै तेभी तेऊ मणछा मरोक्की करै और लैल़ा-पकारा लांदी दूर।

27एसा गल्ला भाल़ी हूई सोभी लोगा रहैनी और आप्पू मांझ़ै लागै गल्ला करदै, “अह किज़ै गल्ल आसा? अह ता कोई नऊंईं शिक्षा आसा! एऊ ता एतरअ हक आसा कि भूता लै बी दैआ पोर्ही निखल़णेंओ हुकम! और तिंयां बी मना ज़िहअ एऊ बोलअ तिहअ ई!”

28ता इहअ करै लागअ ईशूए बारै ओरी-पोरी गलील लाक्कै सारै दी कई ज़ैगा थोघ।

कई बमारी आल़ै ठीक करनै

(मत्ती 8:14-17; लुका 4:38-41)

29तेखअ नाठअ ईशू आराधना कोठी का याकूब और युहन्ना संघै शमौन और आन्दरू च़ेल्ले घरा लै।

30शमौन पतरसे शाशुई त ज़ौर आअ द और तिन्नैं खोज़अ तेभी तेसे बारै ईशू का। 31तेखअ तेसा नेल़ डेऊई करै तेसो हाथ ढाकअ और सह झ़ैऊई खल़ी; और तेसो ज़ौर बेठअ तेभी और सह लागी तिन्नां लै बैल़ी चाणदी।

32ज़ांऊं सान्ह पल़ी ता तेऊ सेटा लै आणै कई बमार और भूत शाचै दै मणछ। 33तेसा नगरीए बडै भारी लोग हुऐ तिधी दुआरा आजू कठा। 34तेऊ किऐ बडै भारी कई रंगे बमारी दी पल़ै दै दुखी लोग ठीक और बडै भारी भूत बी काढै।

ईशू निं तिन्नां भूता बोल़णैं ई दैनअ त कि तिंयां तेऊए बारै लोगा का खोज़े किल्हैकि तिन्नां का त तेऊओ थोघ कि सह आसा परमेशरै छ़ाडअ द पबित्र।

ईशूए कांगनरांगै प्राथणां करनी

(लुका 4:42-44)

35ईशू उझ़ुअ राची भैणै का पैहलै और तिधा का नाठअ एक कांगनरांगी ज़ैगा लै प्राथणां करदअ। 36ता पिछ़ू आऐ शमौन और तेऊए होर साथी तेऊ लोल़ै। 37ज़ांऊं तिन्नां सह भेटअ, ता तिन्नैं बोलअ तेऊ लै, “कई लोग आसा नगरी ताह भाल़ै लागै दै।”

38ईशू बोलअ तिन्नां लै, “च़ाल्ला, हाम्हां डेऊणअ किधी ओरी-पोरी गराऊंआं दी ताकि हुंह प्रच़ार करी सकूं; किल्हैकि हुंह आसा एते ई तैणीं आअ द।” 39तेखअ नाठअ ईशू गलील लाक्कै कई ज़ैगा, संघा रहअ आराधना कोठी दी प्रच़ार करदअ लागी और भूत शाचै दै लोगा बी रहअ ठीक करदअ लागी।

कोल़्हे बमारी आल़अ मणछ ठीक करनअ

(मत्ती 8:1-4; लुका 5:12-16)

40तिधी आअ एक कोल़्हे बमारी आल़अ और तेऊ ईशू सेटा माथअ टेकी करै अरज़ की, “ज़ै तूह च़ाहे तै सका तूह मुंह एसा कोल़्हे बमारी का ठीक करी।”

41ईशू फिरी तेऊए बडी भारी झींण संघा लाअ तेऊ दी हाथ और तेऊ लै बोलअ इहअ, “हुंबी च़ाहा” “ठीक हअ।”

42सह मणछ हुअ तेभी कोल़्हे बमारी का ठीक। 43ईशू छ़ाडअ सह एही चतैनगी दैई परोहिता सेटा लै कि 44“हेरे, एसा गल्ला निं होरी कोही का खोज़ी। हाँ, परोहिता सेटा डेऊई एछ आप्पू रहैऊई और कोल़्हे बमारी का शुचै हणें बारै ज़ुंण बधान परमेशरे गूर मुसा आसा खोज़अ द तेऊ साबै दै भैंट, ताकि तिंयां भाल़े कि तूह गअ कोल़्हे बमारी का शुचअ हई।” (लेबी बधान 14:1-32)

45पर सह नाठअ तिधा का मांदरै परोहिता सेटा और तिधा का बागै एछी खोज़ी तेऊ तिंयां सारी गल्ला कई लोगा का कि ईशू सह किहअ करै किअ राम्बल़अ।

इहअ करै पुजी तिंयां गल्ला कई ज़ैगा और ईशू बी निं लोगा सम्हनै नगरी दी डेऊई सकअ सह रहअ नगरी बागै कांगनरांगै दी; पर तेथ बी लागै च़ऊ बाखा हर लाक्कै का लोग ईशू सेटा लै एछदै।

Currently Selected:

मरकुस 1: OSJNT

Highlight

Copy