Zekaliya 10
10
Mwami mbwaakasyomezya kubavuna
1Amukumbile mvula ku Mwami Leza kumatangilo, Mwami Leza nguuleta makumbi. Ulawisizya bantu lunywanywa lwamvula, ulakuzya tusyango twamumyuunda twamuntu uuli woonse. 2Mituni ilaamba zyakubeja. Basondi babona zilengaano zyakubeja, baamba ziloto zyakubeja. Kuumbulizya kwabo nkwabuyo. Nkaako bantu balaingaila mbuli mbelele zidyaminidwe akaambo kakubula mweembezi.
3“Lino ndanyemena beembezi mubukali bwangu, aboobo ndabasubula basololi, nkaambo Mwami Leza Singuzuzyoonse uyoobamba butanga bwakwe. Bamusyobo wa Juda ndiyoobacita kuti babe mbuli bbiza lyanguzu munkondo. 4Kuzwa kumusyobo wa Juda, nkokuyoozwa bbwe lyacooko, kuzwa kulinguwo nkokuyoozwa nembe yatente, kuzwa kulinguwo nkokuyoozwa buta bwakulwanya, kuzwa kulinguwo nkokuyoozwa baleli boonse. 5Boonse bayooba mbuli bantu basintanze, bayoolyatauka basinkondonyina mbuli ntimba munkondo. Nkaambo kakuti Mwami Leza uli aambabo bayoolwana akubazunda basimabbiza.
6“Njooyumya musyobo wa Juda akuvuna musyobo wa Josefa. Njoobaboozya nkaambo ndababeda aankumbu.
Bayooba mbuli kuti tiindakabakakide, mukuti ndendime Mwami Leza wabo, njoobavuwa.
7Baefulemu bayooba mbuli bantu basintanze,
bayootangala mumyoyo yabo mbuli bantu banywa waini.
Bana babo bayoocibona eeci, nkaako bayookondwa, myoyo yabo iyootangalila Mwami Leza.
8“Njooboobola akubabunganya. Kasimpe njoobanununa, bayoovula mbuli mbubakabede kusaanguna.
9Nokuba kuti ndakabamwaisya akati kabantu bambi,
pele nomuba mumasi aali kulaale banoondiyeeya.
Balo abana babo banoopona, eelyo bayoopiluka.
10Ndiyoobaleta kuzwa ku Ijipiti, akubayobolola kuzwa ku Asiliya.
Ndiyoobaleta ku Giliyadi aku Lebanoni, nkabela ooko bayooata.
11Bayooinda mulwizi lwamapenzi, lwizi lukapaika luyoobatama,
mpisi zyoonse zyamulonga wa Nailo ziyooyuminina. Kulisumpula kwa Baasiliya kuyoomana, nguzu zya Baijipiti ziyooela.
12Njoobayumya mu Mwami Leza, bayooenda muzina lyakwe, mbwaamba Mwami Leza.”
Currently Selected:
Zekaliya 10: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
