Zekaliya 9
9
Misyobo imwi mbuyakabetekwa
1Majwi aa Mwami Leza alaamba azyanyika ya Hadilaki, ayoosikila amunzi wa Damasikasi. Mwami Leza ulalangilila bantu boonse, mbubonya mbuli mbwalanga musyobo wa Isilayeli, 2ulangilila munzi wa Hamati ooyo uubambene aanjiyo aku Taya a Sidoni nokuba kuti balicibwene kapati. 3Munzi wa Taya wakaliyakila mayubilo mayumu, wakalundika nsiliva mbuli kuti ndivu, angolida mbuli lusuko lwamumigwagwa. 4Pele Mwami Leza uyootola lubono lwawo, akuyoonyonyoona mato aawo mayumu mulwizi, uyoosyukutwa amulilo.
5Munzi wa Asyikeloni uyoocibona eeci, nkabela uyooyoowa, munzi wa Gaza uyoominingana mukucisa, awalo munzi wa Ekiloni uulisyoma uyoozundwa. Munzi wa Gaza tuukabi aamwami, wa Asyikeloni uyoosiigwa mbuboobu. 6Bamasi bayookkala mu Asyidodi, ndiyoomanizya kulisumpula kwa Bafilisiti. 7Tabayoolyi limbi zyabulowa niziba zilyo zitondwa zyoonse niziba buti. Aabo bayoosyaala bayooba bantu ba Leza wesu, bayooba basololi mu Juda, munzi wa Ekiloni uyooba mbuli wa Jebusi. 8Pele njookwabilila ŋanda yangu kuzwa kunkamu yabasikusaala. Taakwe sikudyaminina nayoozunda bantu bangu alimwi pe, nkaambo lino ndime eembalanga.
Mwami uumbi mbwayooboola
9Kosekelela kapati omunzi wa Ziyoni! Kopozomoka omunzi wa Jelusalemu!
Bona ngooyo mwami wako wasika, uliluleme, ulizundide, mubombe moyo,
utantide ambongolo amwanaa mbongolo, iiyi mwanaa mbongolo.
10Njoogwisya nkalaki kuzwa ku Efulemu, amabbiza aankondo kuzwa ku Jelusalemu,
mata aamunkondo ayootyoloolwa. Uyooendelezya ca luumuno kuli bamasi.
Uyooendelezya kuzwa kulwizi lumwi kuyoosika kuli lumwi.
Kuzwa kumulonga umwi kuyoosika kumagolelo aanyika.
Kuboozegwa kwabantu ba Leza
11Pele yebo, akaambo kacizuminano cabulowa ncotwakapangana anduwe,
njooangununa basintolongo bako kuzwa mumalindi aatakwe maanzi.
12Amuboole kumayubilo aanu, nobasintolongo balangila kufutulwa,
lino ndamwaambila kuti njoomuboozezya kobilo.
13Njooongomeka musyobo wa Juda mbuli mbweongomeka buta bwangu,
Baefulemu njoobabelesya mbuli mivwi. Njoobelesya bantu bako Ziyoni
kuti bakalwane cisi ca Gilisi, bayooba mbuli panga lyasilumamba.
14Aawo Mwami Leza uyoolibonya kulimbabo, muvwi wakwe uyoosomoka mbuli lulabo.
Mwami Leza uyoosiba mweembo, uyooendela mumaguwo aakumusanza,
15nkabela Mwami Leza Singuzuzyoonse uyoobakwabilila. Bayoonyonyoona akuzunda ankwibba.
Bayoovwipa bulowa bwabasinkondonyina mbuli waini,
bayoozula mbuli mutiba uubelesegwa mukusansaila ziswi zyacipaililo.
16Mwami Leza wabo uyoobavuna mubuzuba oobo nkaambo mbutanga bwabantu bakwe.
Bayoomweka munyika yakwe mbuli kabwe keebesi mumusini.
17Kuyooba zibotu kapati zyeebeka! Maila ayoobotya bakubusi, waini uyoobotya booye.
Currently Selected:
Zekaliya 9: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
