Zekaliya 8
8
Mwami Leza mbwaakasyomezya kubukulusya Jelusalemu
1Majwi aa Mwami Leza Singuzuzyoonse akandisikila alimwi. 2Mboobu mbwaamba Mwami Leza Singuzuzyoonse ulati, “Munzi wa Ziyoni nduuyandisisya kapati, nduuyandide cakumaninina.”
3Mboobu mbwaamba Mwami Leza ulati, “Ndapilukila ku Ziyoni, ndikakkale mu Jelusalemu. Eelyo Jelusalemu uyooitwa kuti munzi wabwini, cilundu ca Mwami Leza Singuzuzyoonse ciyootegwa cilundu cisalala.”
4Mboobu mbwaamba Mwami Leza Singuzuzyoonse ulati, “Baalumi abakaintu bacembeede kapati cakuti beenzya misako bayookkala mumabbuwa aa Jelusalemu. 5Migwagwa yamumunzi iyoozula balombe abasimbi banoosobanina mumo.”
6Mboobu mbwaamba Mwami Leza Singuzuzyoonse ulati, “Ambweni cinoolangika kuti ncintu cigambya kubantu basyeede ciindi eeco, pele sena cinoogambya akulindime?” Mbwaamba Mwami Leza Singuzuzyoonse.
7Mboobu mbwaamba Mwami Leza Singuzuzyoonse ulati, “Njoovuna bantu bangu kuzwa kuzisi zyakujwe azyakumbo. 8Ndiyoobaboozya kuti bazookkale mu Jelusalemu, bayooba bantu bangu, njooba Leza wabo uubeendelezya cakusyomeka mubululami mukuti ndime Leza wabo.”
9Mboobu mbwaamba Mwami Leza Singuzuzyoonse ulati, “Nywebo ono nomumvwide majwi aaya aakaambwa abasinsimi bakaliko ciindi ntalisyo yaŋanda ya Mwami Leza Singuzuzyoonse niyakabikkwa amuyume kutegwa ŋanda ya Leza iyakwe. 10Muciindi cakamana kwakanyina cakuvola camuntu nociba camunyama. Taakwe muntu wakali kukonzya kubeleka kabotu akaambo kasinkondonyina, nkaambo ndime ndakacitide kuti bantu kababukilana amweenzinyina. 11Pele lino nsikacitili bantu basyeede aaba mbuli mbundakali kucita kusaanguna. Mbwaamba Mwami Leza Singuzuzyoonse.
12“Mbuto ziyookomena kabotu, musaansa uyoozyala micelo yawo, nyika iyoomena zisyango, julu liyoolosya mume walyo. Zintu zyoonse eezi njoozipa kubantu basyeede aaba kuti zibe lukono lwabo. 13Mbubonya mbuli mbumwakaba cisinganyo akati kabamasi, nywebo nobamu Juda amu Isilayeli mbombubo oobo mbwenjoomuvuna, muyooba cileleko, muyoolelekwa ncobeni. Mutayoowi pele amuyume kapati.”
14Mboobu mbwaamba Mwami Leza Singuzuzyoonse ulati, “Mbubonya mbuli mbundakakanzide kumuletela mapenzi ambundatakababeda aankumbu nibakandinyemya basikale banu, mbwaamba Mwami Leza Singuzuzyoonse, 15mbubonya oobo ono ndikanzide kumucitila zibotu alimwi nobamu Jelusalemu abamu Juda. Mutayoowi pe. 16Nzeezi zintu nzyomweelede kucita. Mweelede kukanana zyabwini kuli umwi aumwi, mweelede kubeteka kabotu bweelede munkuta zyanu. 17Utanookanzi zyabubi beenzinyoko, mutanooyandi kukonka cakubeja, zyoonse eezi ndizisulaikide, mbwaamba Mwami Leza.”
18Majwi aa Mwami Leza Singuzuzyoonse akandisikila alimwi. 19Mboobu mbwaamba Mwami Leza Singuzuzyoonse, ulati, “Kuliimya kulya kwanu kwamumwezi wane, wasanu, waciloba awakkumi kuyooba ciindi cakusekelela akutangala aciindi cakubotelwa camapobwe mu Juda. Nkaako amuyande bwini aluumuno.”
20Mboobu mbwaamba Mwami Leza Singuzuzyoonse ulati, “Bantu banji abantu bakkala muminzi minji bayooboola, 21nkabela bantu bakkala mumunzi umwi bayooinka kuluumbi akuyooti, ‘Atweende tukakumbile Mwami Leza, alimwi tukakombe Mwami Leza Singuzuzyoonse. Mebo lwangu ndainka.’ 22Aboobo bantu banji amisyobo yanguzu iyooboola ku Jelusalemu kuzoolangaula Mwami Leza Singuzuzyoonse akuzoomukumbila.
23“Mboobu mbwaamba Mwami Leza Singuzuzyoonse ulati, ‘Mumazuba aayo bantu bali kkumi kuzwa kumisyobo yoonse amuzisi zyoonse bayoojata Mujuda omwe kumoombe wajansi lyakwe’ akuti, ‘Atuunke anduwe, nkaambo twakamvwa kuti Leza ulaandinywe.’”
Currently Selected:
Zekaliya 8: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
