Zekaliya 7
7
Leza uyanda bululami alweengelelo kutali kuliimya kulya
1Mumwaka wane wakulela kwamwami Daliyasi, majwi aa Mwami Leza akasikila Zekaliya mubuzuba bwane bwamwezi wafuka, mwezi wa Kisilevu. 2Bantu baku Beteli bakatumide Syalezaa a Legemumeleki antoomwe abantu babo kuti bazookumbile Mwami Leza 3mukuzoobuzya bapaizi baŋanda ya Mwami Leza Singuzuzyoonse abasinsimi kuti, “Sena tuleelede kulila akuliimya kulya mumwezi wasanu, mbubonya mbuli mbutwakali kucita kwamyaka minji yainda.”
4Mpawo majwi aa Mwami Leza Singuzuzyoonse akandisikila akati, “Buzya bantu boonse bamucisi abapaizi kuti, 5‘Nimwakaliimya kulya akulila mumwezi wasanu amumwezi waciloba mumyaka iili makumi aali ciloba yainda, sena kasimpe mwakali kuliimya kulya akaambo kandime? 6Nimwakali kulya akunywa mumapobwe, sena tiimwakali kucita boobo kulisangalazya nobeni?’” 7Sena aaya taali ngamajwi ngaakaamba Mwami Leza kwiindila mubasinsimi bakale ciindi munzi wa Jelusalemu atunzi twawo tuuzingulukide katuliibide muluumuno, ciindi nyika yakumusanza, anyika yatulundu-lundu kumbo, kazicikkedwe bantu?
Kutaswiilila nkukwakamutozya mubwaange
8Mpawo majwi aa Mwami Leza akasikila Zekaliya alimwi akuti, Mboobu mbwaamba Mwami Leza Singuzuzyoonse ulati, 9“Kamucita bululami bwini-bwini, kamweengelelana akweetelelana umwi aumwi. 10Mutanoodyaminini mukamufu naba musyaala, muzwakule amucete pe. Mutanooyeeyelani bubi mumyoyo yanu.
11“Pele bakakaka kuswiilila, mucinguni cabo bakafutata akusinka matwi aabo ndi. 12Bakayumya myoyo yabo mbuli bbwe, cakuti tiibakaswiilila milawo naaba majwi aayo Mwami Leza Singuzuzyoonse ngaakatuma a Muuya wakwe kwiindila mubasinsimi bakale. Nkaako Mwami Leza Singuzuzyoonse wakanyema kapati.
13“Nindakabaita, tiibakaswiilila, aboobo abalo nibakandiita tiindakabaswiilila pe, mbwaamba Mwami Leza Singuzuzyoonse. 14Nkaako ndakabamwaisya akambizi mumasi oonse, ooko nkobali beenzu. Nyika yabo yakaba tongo cakuti taakwe muntu wakali kukonzya kuboola nokuba kukkala mulinjiyo. Mbombuboobu mbubakacita kuti nyika mbotu isyaale buyo.”
Currently Selected:
Zekaliya 7: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
