Zekaliya 6

Cilengaano cankalaki zyone

1Ndakalanga mujulu alimwi, ndakabona nkalaki zyone kumbele lyangu kazizwida akati kazilundu zyobilo, zyakali zilundu zyamukuba! 2Nkalaki yakusaanguna yakajisi mabbiza aasalala, yabili akali kusiya, 3yatatu akali kutuba, yane akali aamabala-mabala, oonse akali aanguzu. 4Ndakabuzya mungelo ooyu ngundakali kukanana aawe kuti, “Ino ninzi eezi, osimalelo wangu?”

5Mungelo wakandiingula kuti, “Eeyi myuuya yone yakujulu, yawa kumbele lya Mwami Leza wanyika yoonse.” 6Uulya uuli ankalaki iijisi mabbiza aasiya uya kunyika yakunyika, uuli ankalaki iili aamabbiza aatuba uya kumbo, uuli amabbiza aamabala-mabala uya kunyika yakumusanza.

7Lino mabbiza aanguzu naakainka akali kuyanda kuunka munyika yoonse. Mpawo wakati, “Kamuya munyika yoonse!” Nkaako akainka munyika yoonse.

8Mpawo wakandiita wakati, “Langa aalya aainka kunyika iili kunyika apa Muuya wangu kuti nyika iili kunyika ibe aaluumuno.”

Musini wakalaililwa Josyuwa

9Mpoonya majwi aa Mwami Leza akandisikila aakuti, 10“Bweza nsiliva angolida zyakaleta baange ba Helidayi, Tobija a Jedaiya, aabo bakaboola kuzwa ku Babuloni. Uunke ndilyonya sunu kuŋanda ya Josiya mwanaa Zefaniya. 11Bweza nsiliva angolida, panga musini, wamana uusamike Josyuwa mupaizi mupati mwanaa Jehozadaki. 12Ambila mupaizi kuti mboobu mbwaamba Mwami Leza Singuzuzyoonse ulati, ‘Ngooyu muntu wiitwa kuti Mutabi, uyoozanduka kuzwa mubusena bwakwe kuti akayake ŋanda ya Mwami Leza.’ 13Ngonguwe uuyooyaka ŋanda ya Mwami Leza, uyoosamikwa zyabulemu, nkabela uyookkala akulela acuuno cakwe cabwami. Mupaizi unooli munsi aacuuno cakwe cabwami. Nkabela banoomvwana aaba bobilo. 14Musini uyoopegwa kuli Helidayi, Tobija, Jedaiya a Heni mwanaa Zefaniya kuti cibe ciibalusyo muŋanda ya Mwami Leza. 15Aabo bali kulaale bayooboola kuti bazoogwasye kuyaka ŋanda ya Mwami Leza, ndendilyo nomuyooziba kuti Mwami Leza Singuzuzyoonse nguwakandituma. Eeci ciyoocitika kuti naa mumuswiilile Mwami Leza wanu cabunkutwe.”

Currently Selected:

Zekaliya 6: Tonga96

Highlight

Copy