Baloma 16

Majwi aakujuzya

1Njanda kumwaambila kuti mucizi wesu Fiibi, mmubelesi wambungano yaku Kenkileya. 2Amumutambule mbuli Mukilisitonyoko mbuli bweelede kutambulana bantu ba Leza. Amumugwasye nzyayanda, nkaambo wakagwasya bantu banji kubikkilizya andime.

3Amundijuzizye Pulisila a Akwila, babelesi ba Kilisito Jesu mbuli ndime. 4Bakalilibambilide kujaigwa kuti mebo intafwi. Nsili buyo ndime endikke eebalumba, pele ambungano zyoonse zili kuli bamasi. 5Mundijuzizye bantu bakombela muŋanda yabo.

Mundijuzizye Epenetosi ngwenjandisisya, uuli ngomutaanzi kusyoma Kilisito mu Asiya. 6Mujuzye Maliya ooyo wamubelekela kapati. 7Mubajuzye ba Andilonikasi a Juniyasi, Bajudama bakanzwa mbuli ndime. Aaba bakalizizilwe kapati abatumwa, nkabela bakali kale Bakilisito mebo nketanaba pe.

8Mujuzye Amfipolosi mweenzuma ngwendiyandisisya mu Mwami. 9Mujuzye Ubanasi, similimoma muli Kilisito, a Sitakusi, ngwendiyandisya. 10Mujuzye Aelesi, Mukilisito muyumu. Mubajuzye bamukwasyi wa Alisitobulusi. 11Mujuzye Helodiyoni, Mujudama. Mubajuzye Bakilisito bamukwasyi wa Nasisusi.

12Mubajuzye ba Tulaifena a Tulaifosa, babeleka mulimo wa Mwami canguzu. Mujuzye Pelisisi uuyandwa, wacita zinji mukubelekela Mwami. 13Mujuzye Lufusi munkutwe mukubelekela Mwami, mujuzuzizye abanyina balo bali mbabaama ambebo. 14Mubajuzye ba Asinkilitosi, Filengoni, Hemezi, Patilosi, Hemasi, abakwesu boonse mbobalaabo. 15Mubajuzye ba Filologasi, Juliya, Neleyusi amucizi wakwe, Olimpasi, abantu ba Leza boonse mbobalaabo. 16Kamujuzyanya muluyando lwini-lwini. Bambungano zyoonse zyakwe Kilisito balamujuzya.

Malailile aamamanino

17Lino ndamukumbila, nobakwesu, amubacenjelele aabo baandaanya beenzinyina akubacitya kuti babisye. Mukucita boobo balasiya njiisyo nzimwakaiya. Mubatantamuke, 18nkambo bantu bali boobo tababelekeli Kilisito Mwami wesu pe. Babelekela buyo nzobayanda kuti zibakkutye. Amajwi mabotu aabumpelenge balacenga batasimide mulusyomo. 19Bantu boonse baliimvwide mpuwo yanu yakuswiilila Leza. Aboobo ndakondwa akaambo kanu, pele ndiyanda kuti mube basongo muzibotu, mutanyonganyizigwi azibi. 20Eelyo Leza uupa luumuno, uyoopwaya nguzu zya Saatani kuti mumuzunde.

Mwami wesu Jesu Kilisito amubede aaluse.

21Ulamujuzya Timoti similimoma, aba Luka, Jasoni a Sosipata bamusyobo wangu. 22Ndamujuzya mu Mwami mebo nde Teetiyasi, ndemulembi walugwalo oolu. 23Ulamujuzya Gayosi, uuli ngosimeenzu wangu asimeenzu wambungano yoonse. Ulamujuzya Elasitosi muyobozi wamali aamunzi, a Kwatosi mukwesu. [ 24Mwami Jesu Kilisito amubede aaluse nyoonse. Akube boobo.]

Mupailo wamamanino

25Lino Leza ulaanguzu uya kumuyumya-yumya kwiindila mu Makani Mabotu ngekambauka aaamba zya Jesu Kilisito. Zya Makani aaya zyakalisisidwe kwamyaka minji 26pele lino zyakalembwa abasinsimi zyayubununwa, eelyo mbuli mbwaakalailila Leza uutamani zyazibisigwa kuti bantu bamisyobo yoonse bazisyome akuziswiilila.

27Leza alikke sibusongo alemekwe kwiindila muli Jesu Kilisito kukabe kutamani. Akube boobo.

Currently Selected:

Baloma 16: Tonga96

Highlight

Copy