Baloma 15

Amubotezye bamwi

1Lino swebo nitwakasima mulusyomo, tweelede kweengelela baabo batanasima. Tutalibotezyi lwesu tobeni. 2Umwi aumwi wesu abotezye mweenzinyina mukumugwasya kuti lusyomo lwakwe lusime. 3Kayi Kilisito taakalibotya lwakwe mwini, mbuli mbokulembedwe kuti, “Masampu aabaabo bakali kukusampaula aza akulindime.” 4Zyoonse zyakalembwa mu Malembe zyakalembelwa kutwiisya. Malembe atwiisya kukkazika myoyo akuba basicamba kuti tube aabulangizi bwini-bwini. 5Lino Leza uugwasya bantu kuti bakkazike myoyo akuba basicamba, amugwasye anywebo mukukamantana ooku nomutobela ciyanza ca Kilisito Jesu. 6Nkaako amoyo omwe amulemeke Leza uuli ngo Wisi wa Mwami wesu Jesu Kilisito.

Makani Mabotu ngabamasi abalo

7Lino amutambulane mbuli Kilisito mbwaakamutambula kuti Leza alemekwe. 8Nkasimpe ndamwaambila kuti Kilisito wakaba mutwanga wa Bajuda kutondezya kuti Leza ulasyomeka. Mukucita boobo wakatondezya bwini bwazisyomezyo zya Leza kuli basikale besu, 9akupa bamasi kaambo kakulemeka Leza nkaambo kaluzyalo lwakwe. Mbuli mbwaaamba Malembe kuti,

“O Leza, njookutembaula akati kabamasi,

njooimba nyimbo zyakulumbaizya zina lyako.”

10Alimwi alati,

“Amusekelele nobamasi antoomwe abantu ba Leza.”

11Alimwi alati,

“Amutembaule Leza nobamasi nyoonse,

amumutembaulisye, nobantu bamisyobo yoonse.”

12Awalo Izaya ulati,

“Umwi waciinga ca Jese uyooboola,

uyooboolela kulela bamasi,

eelyo bayoomusyoma.”

13Aboobo Leza uupa lulangilo lwabuumi butamani azuzye myoyo yanu alutangalo aluumuno kwiindila mukumusyoma. Nguzu zya Muuya Uusalala zikomezye lulangilo oolu.

Paulu mbwaakabelekela Leza

14Nobakwesu, ndimasimpe kuti muli aabuumi buli kabotu, mulizi njiisyo zya Bukilisito, alimwi mulakonzya kwiisyanya. 15Pele mulugwalo oolu, mumakani amwi, ndamulembela cakupozya kuti mwiibalusye zimwi. Ndacita boobo nkaambo Leza muluse lwakwe wandisala kuti mbe mutwanga wa Kilisito Jesu kuli bamasi. 16Mukukambauka Makani Mabotu, ndabeleka mbuli mupaizi kuti bamasi babe mbuli cituulo citambulika kuli Leza casalazigwa a Muuya Uusalala.

17Mbuli mbweli muli Kilisito Jesu, ndalisumpula akaambo kamilimo njebelekela Leza. 18Nsitibe aansoni mukukanana eezyo nzecita kwiindila muli Kilisito nekobolola bamasi kuti abalo baswiilile Leza. Ndacita eezi mukukambauka, amumicito, 19mumaleele azigambya, amunguzu zya Muuya Uusalala. Aboobo ndakakambauka Makani Mabotu aa Kilisito kuli koonse nkwindakaya, kutalikila ku Jelusalemu kusikila ku Ililikumu. 20Lyoonse ndayandisya kukambauka Makani Mabotu kutali nkubakamvwa kale zya Kilisito, kuti ambweni inga ndayaka antalisyo yaumwi. 21Mbuli mbwaamba Malembe kuti,

“Aabo batakaambilidwe zyanguwe,

bazoobona zyabwini,

aabo batamvwide, bayooziba zyanguwe.”

Paulu mbwaakayanda kuya ku Loma

22Nkaambo kamilimo eeyi ndakalesegwa kuboola kulindinywe. 23Kwamyaka minji ndali kuyanda kuboola kulindinywe. Pele lino ndamanizya milimo yamubusena oobu, njeeya kuti nzoomubona ndazikwiinda nkeya ku Sipeyini. 24Nzoobotelwa kumuswaya mazuba ongaye buyo, kuzwa waawo ndayanda kuti mukandigwasye mulweendo lwangu.

25Ciindi cino nja ku Jelusalemu, kutola lugwasyo kubantu ba Leza. 26Nkaambo basizikombelo zyaku Masedoniya a Akeya bakabotelwa kupa milumbo yakugwasya bacete akati kabantu ba Leza baku Jelusalemu. 27Cakababotela kucita boobo, pele nikuba boobo wakali mulimo wabo kugwasya bacete. Bajuda bakaabana zileleko zya Bukilisito abamasi, nkaako abalo bamasi baleelede kugwasya Bajuda muli nzyobabulide zyabuumi buno. 28Ndamanizya mulimo wakubapa milumbo eeyi, nzooinda kooko nkeya ku Sipeyini. 29Ndizi kuti ndaakuza, njoomuletelela zileleko zinji zya Kilisito.

30Ndamukumbila, nobakwesu, kwiindila mu Mwami wesu Jesu Kilisito aluyando lumupa Muuya Uusalala, kuti kamundipailila canguzu. Andime ndikuujisi. 31Amundipailile kuti Leza andikwabilile kuti intakawidi mumaanza abatasyomi ku Judiya. Alimwi amupaile kuti bantu ba Leza baku Jelusalemu bakatambule milumbo eeyi njindatumwa kuti mbatolele. 32Kwamana boobo, kuti Leza kayanda, nzoosika kulindinywe nkekondedwe. 33Leza uupa luumuno abe aandinywe nyoonse. Akube boobo.

Currently Selected:

Baloma 15: Tonga96

Highlight

Copy