1 Bakolinti 1

1Ndime Paulu wakaitwa a Leza mukuyanda kwakwe kuti ndibe mutumwa wa Kilisito Jesu. Ndili a Sositinesi mukwesu.

2Tulembela mbungano ya Leza iili mu Kolinti. Leza wakamuzandula muli Kilisito Jesu alimwi wakamwiita kuti mube bantu bakwe basalala antoomwe abaabo boonse bali mumasena aandeene-andeene balemeka zina lya Mwami Jesu Kilisito, Mwami wabo aswebo antoomwe.

3Leza Taata a Mwami Jesu Kilisito bamubede aaluse akumupa luumuno.

Zyakulumba Leza

4Lyoonse ndalumba Leza wangu akaambo kanu kuti wakamubeda aaluse muli Kilisito Jesu. 5Muli Kilisito mulivubide munzila zyoonse. Mulizizi zyoonse alimwi mulakonzya kuzyaamba. 6Nkaambo makani aapa bumboni bwa Kilisito alikkalikide mulindinywe. 7Nkaako taakwe cipego comwe camuuya ncomubula ciindi nomulindila kuboola kwa Mwami wesu Jesu Kilisito. 8Uyoomuyumya mane kusikila kumamanino, kuti mutakabikkwi kaambo mubuzuba bwa Mwami wesu Jesu Kilisito. 9Leza ulasyomeka walo nguwakamwiita kuti muyanzane a Mwanaakwe Jesu Kilisito, Mwami wesu.

Kuzandulana mumbungano

10Lino ndamukumbila, nobakwesu, muzina lya Mwami wesu Jesu Kilisito, kuti nyoonse muzuminane cintu comwe akuti kutabi kuzandulana akati kanu pe. Pele mukamantane amoyo omwe amuyeeyo omwe. 11Nkaambo bamwi baluzubo lwa Kilowe bakandaambila kuti kuli kuzwangana akati kanu. 12Ncendaamba ncakuti umwi aumwi wanu waamba cakwe mwini. Umwi ulati, “Ime ndiwa Paulu,” aumwi “Ime ndiwa Apolosi,” aumwi, “Ime ndiwa Kefasi,” umwi ulati, “Ime ncilila Kilisito.” 13Sena Kilisito ulizandaulidwe? Sena Paulu wakamukankamininwa? Sena mwakabbapatizigwa muzina lya Paulu?

14Ndalumba kuti taakwe naba omwe wanu ngundakabbapatizya, ccita buyo Kilisiposi a Gayosi. 15Nkaako kutabi muntu waamba kuti wakabbapatizigwa muzina lyangu. 16Atubone, ndakabbapatizya baŋanda ya Sitefanasi. Kusule lyabaabo, nsiyeeyede uumbi ngundakabbapatizya pe. 17Nkaambo Kilisito taakanditumina kubbapatizya, pele buyo kukambauka Makani Mabotu. Eelyo njelede kwaakambauka mukutatobela busongo bwabuntunsi, kuyoowa kuti nguzu zyalufu lwa Kilisito aciingano zitayeeyegwi kuti nzyabuyo.

Kilisito ninguzu abusongo bwa Leza

18Majwi aaamba zyalufu lwa Jesu aciingano ngabufuba-fuba kuli baabo basweekede, pele kulindiswe notuli munzila ya lufutuko ninguzu zya Leza.

19Nkaambo Malembe alati

“Njoonyonyoona busongo bwabasongo,

aalo maanu aabasimaanu njooalobya.”

20Ino uli kuli muntu musongo? Ino uli kuli wiide? Ino uli kuli sikukazyanyina zyaansi aano? Kayi Leza watondezya kuti busongo bwabantu ansi aano mbufuba-fuba.

21Nkaambo mubusongo bwakwe Leza wakabambila limwi kuti bantu batamuzibi abusongo bwabo. Pele cakamubotela kuti afutule basyoma kwiindila mumajwi ngobati ngabufuba-fuba ngotukambauka. 22Bajuda balayanda kubona zitondezyo, Bagiliki bayandaula zyabusongo. 23Swebo tulakambauka zya Kilisito wakakankaminwa aciingano, ku Bajuda majwi aaya ncilebyo, kuli bamasi mbufuba-fuba buyo. 24Lino kuli baabo boonse bakaitwa, Bajuda nibaba Bagiliki, balizi kuti Kilisito ninguzu zya Leza abusongo bwa Leza. 25Nkaambo eeco ciboneka kuti mbufuba-fuba bwa Leza cilainda busongo bwabantu, acalo ciboneka kuti mbuteteete bwa Leza cilainda nguzu zyabantu.

26Nobakwesu, amuyeeye, mwakali bani ciindi Leza naakamwiita. Akati kanu kwakanyina banji bakali kuyeeyegwa kuti mbasongo, mbanguzu naa bakazyalwa aabantu beni-beni. 27Pele Leza wakasala zintu nzyobayeeya bantunsi kuti nzyabufuba-fuba kuti ausye nsoni basongo. Alimwi Leza wakasala zintu ziteteete kubantunsi kuti ausye nsoni basinguzu. 28Alimwi Leza wakasala zintu nzyobayeeya bantunsi kuti nzyabuyo zisampaulwa naa nzyobatabali, kuti alobye eezyo nzyobayeeyela kuti nzini-zini. 29Leza wakacita boobo kuti kutabi muntunsi naba omwe uulisumpula kulinguwe. 30Leza nguwakamuyanzanya a Kilisito Jesu kuti abe busongo bwesu. Walo nguutululamika kuli Leza, wakatusalazya kutunununa. 31Cili mbubuli bwaamba Malembe kuti, “Ooyu uuyanda kulilumbaizizya weelede kulilumbaizila Mwami.”

Currently Selected:

1 Bakolinti 1: Tonga96

Highlight

Copy