Maako 7

Tulengwa twabensiku

(Mateyo 15.1-9)

1Lino Bafalisi abamwi bamayi ba Mulawo bakazwa ku Jelusalemu bakabunganina Jesu. 2Nkaambo bakabona kuti bamwi basikwiiya bakwe bakali kulya kabatasambi maanza, tiibakasamba kweendelana acilengwa ca Bafalisi cakuyanda kuti bantu basalale.

3Bafalisi a Bajuda boonse, batobela kwiisya kwabasikale. Tabalyi, ccita basamba maanza munzila yeelede, 4alimwi tabakonzyi kulya cintu cuulwa mucisambalilo ccita mane balisalazye. Mpiili aimwi milawo yabasikale njibakali kutobela, mbuli yakusanzya nkomeki zibiya, mitiba yamukuba, akusalazya malo.

5Lino Bafalisi abamayi ba Mulawo bakabuzya Jesu kuti, “Nkaambo nzi basikwiiya bako ncobasiya kwiisya kwabasikale? Nkaambo nzi tabasambi maanza ciindi ncobalya?”

6Jesu wakabaingula kuti, “Ani Izaya wakaliluzi naakasinsima akaambo kanu! Nkaambo muli basikuupaupa ameso buyo, mbubonya mbokulembedwe kuti,

‘Aaba bantu balandilemeka amilomo yabo,

pele myoyo yabo ili kule andime.

7Kundikomba kwabo nkwabuyo,

balaiisya njiisyo zyabantu

mbuli kuti nzizya Leza!’”

8Alimwi Jesu wakati, “Milawo ya Leza mwiisowa, mwajatisya njiisyo zyabantu.”

9Wakacili kwaamba wati, “Mulasusya milawo ya Leza kutegwa mubambe milawo yazilengwa zyanu. 10Mozesi wakalailila kuti, ‘Lemeka uso abanyoko,’ ‘Kufumbwa ooyo uusampaula wisi nibaba banyina uleelede kufwa.’ 11Nywebo mwaamba kuti naa muntu waambila wisi nibaba banyina kuti, kufumbwa lugwasyo ndomutambula ngu ‘Koloboni’ (nkokuti cipegwa kuli Leza), 12mwazumizya muntu ooyo kuti katacigwasyi wisi abanyina. 13Mukucita boobo mwaubausya majwi aa Leza anjiisyo zyanu. Alimwi nkozili zimwi zintu zinji zili boobu nzyomucita.”

Zintu zisofwaazya muntu

(Mateyo 15.10-20)

14Jesu wakaita bantu banji kuti baze kuli nguwe, eelyo wakati, “Amuswiililisye kuli nceyanda kumwaambila. 15Cinjila mumuntu tacimusofwaazyi pe. Pele nciceeco cizwa mulinguwe cimusofwaazya. 16Ooyo uujisi matwi aakumvwisya amvwe.”

17Lino Jesu naakasiya bantu, wakanjila muŋanda, mpoonya basikwiiya bakwe bakasika kumubuzya akaambo kacikozyanyo eeci. 18Jesu wakaingula kuti, “Ani anywebo tamuna mvwisya? Taakwe cinjila mumuntu cinga cilamusofwaazya. 19Kayi cinjila buyo mwida akuzwa, tacinjili mumoyo pe.” (Mukwaamba boobo Jesu wakacisalazya kuti zilyo zyoonse zilasalala.)

20Alimwi wakazwida ambele akuti, “Nceeciya cizwa mumuntu cimusofwaazya. 21Nkaambo mukati kamuntu, mumoyo wakwe, momuzwa miyeeyo mibi iicita kuti muntu abbe ajaye, 22acite bumambe, alikumbuzye, acite azisusi zibi zyoonse, bubeji, kantu-kantu, munyono, kutukila, kulisumpula abufuba-fuba. 23Zyoonse zintu zibi eezi zizwida mukati nzezisofwaazya muntu.”

Zyalusyomo lwamukaintu

(Mateyo 15.21-28)

24Lino Jesu naakazwa ooko, wakatozya kuzisi zya Taya a Sidoni. Wakakkala muŋanda imwi, pele taakali kuyanda kuti bantu bazibe. Nikuba boobo taakakonzya kulisisa, bantu bakaziba kuti mwali muŋanda.

25Nkabela mukaintu umwi, wakajisi mwana musimbi wakanjidwe muuya mubi naakamvwa kuti Jesu mwali muŋanda wakasika akuzoomufugamina. 26Mukaintu ooyu wakali muzwamasi, musyobo wakwe wakali Mufenisiya uuli mucisi ca Siliya. Wakakumbila Jesu kuti agwisye muuya mubi mumwanaakwe. 27Jesu wakamwaambila kuti, “Atusanine bana kusaanguna, nkaambo tacili cibotu kunyanga bana cilyo akuciwaala kubabwa.”

28Mukaintu wakaingula kuti, “Mwami, ncobeni abalo babwa balabwezelelela akulya tufwefwelenga tuloka-loka kuzwa atebule!”

29Mpawo Jesu wakaingula kuti, “Wavuwa kabotu, nkaambo kamajwi aako aaya koya kuŋanda yako, muuya mubi wazwa mumwanaako!” 30Nkabela mukaintu ooyo wakabweeda kuŋanda yakwe, waakujana mwana ulilede abulo. Muuya mubi wakalizwide kale mulinguwe.

Jesu mbwaakaponya sikamaama

31Jesu naakapiluka kuzwa kucisi ca Taya, wakainda mumunzi wa Sidoni kuya kulwizi lwa Galilii, wainda akati ka Minzi iili kkumi. 32Nkabela bamwi bantu bakamuletela sikamaama, musinkematwi, watakali kukonzya kwaambaula, bakakumbila Jesu kuti amusilike kwiindila mukubikka maanza aakwe alinguwe. 33Jesu wakamugwisya mubuleya, wamutola kumbali, wanjizya minwe yakwe mumatwi aamuntu ooyo. Wakaswida mate akuguma mulaka wakwe. 34Jesu wakalanga kujulu, walisinsukila akupozomoka wati, “Efata,” nkokuti, “Sinkuka!”

35Mpoonya matwi aamuntu ooyo akasinkuka, anenda yakamana, wakatalika kwaambaula kabotu. 36Lino Jesu wakabalailila aabo bakamweeta kuti, “Mutakaambili muntu uumbi makani aaya!” Pele balo bakamwaisya makani aaya. 37Nkabela boonse bakaamvwa bakaindilila kukankamana, bakati, “Amulange mbwazicita kabotu zintu zyoonse! Basinkematwi ulabasinkula alimwi abasyaataambi ulabaponya!”

Currently Selected:

Maako 7: Tonga96

Highlight

Copy