Maako 8
8
Jesu mbwaakasanina zyuulu zyone zyabantu
(Mateyo 15.32-39)
1Kaatanainda mazuba manji bantu banji-banji bakabunganina Jesu alimwi. Nibakabula cakulya, Jesu wakaliitila basikwiiya bakwe akubaambila kuti, 2“Bandeetezya bantu aaba nkaambo bali aandime kwamazuba otatwe, alimwi taakwe ancobalya. 3Naa kuti ndabaleka kuya kuminzi yabo kabatalide, banooya bunetuka, nkaambo bamwi babo bazwa kule.”
4Basikwiiya bakwe bakati, “Ino muno munkanda inga twazijana kuli zilyo zyakusanina bantu banji boobu?”
5Jesu wakabuzya kuti, “Ino mujisi zinkwa zyongaye?” Bakati “Zili ciloba.”
6Mpoonya Jesu wakaambila makamu aabantu kuti akkale ansi. Eelyo wakabweza zinkwa eezyo zili ciloba, walumba Leza, amane wakazikomona, wazipa basikwiiya bakwe kuti baabanye bantu, basikwiiya bakacita mbubonya mbuli mbubakalaililwa. 7Alimwi bakalijisi tumwi tuswi tuniini, tuce buyo, atwalo naakamana kulumba, wakaambila basikwiiya bakwe kuti babaabanye atwalo. 8Boonse bantu bakalya bakkuta. Kwakali bantu bakatisike kuzyuulu zyone. 9Nkabela basikwiiya bakabwezelela bufwefwelenga bwakasyaala bantu nibakakkuta. Bakazuzya zisuwo zili ciloba. Jesu wakaambila bantu kuti bainke. 10Mpoonya-mpoonya wakanjila mubwato abasikwiiya bakwe baya kucisi ca Dulamanuta.
Zyakwiisya kwakubeja kwa Bafalisi
(Mateyo 16.1-4)
11Bamwi Bafalisi bakasika kuli Jesu akutalika kukazyanya anguwe. Bakamukumbila cakumusunka, bakati abatondezye citondezyo cibonya kuti ulaanguzu zizwa kuli Leza. 12Jesu wakalisinsukila mumoyo wati, “Ino bantu bamazuba aano bayandila nzi zitondezyo? Ncobeni ndamwaambila kuti taakwe ncobaticitilwe pe.”
13Mpoonya Jesu wakabasiya, wanjila mubwato wainka mutala lwizi.
Mimena ya Bafalisi aya mwami Helodi
(Mateyo 16.5-12)
14Basikwiiya bakaluba kubweza zinkwa nibakanjila mubwato, bakajisi buyo cinkwa comwe. 15Nkabela wakabacenjezya kuti, “Ncobeni, amucenjele amimena ya Bafalisi aya mwami Helodi.”
16Balo bakatalika kulyaambauzya akati kabo akwaamba kuti, “Ncaambila boobu nkaambo wabona kuti tatujisi cakulya.”
17Jesu wakalizi ncobakali kwaambaula, eelyo wakababuzya kuti, “Nkaambo nzi ncomwaambaula makani aakubula zinkwa? Sena ambuli sunu tamumvwisyi? Sena miyeeyo yanu icilelede? 18Sena meso aanu taabonesyi? Amatwi aanu taamvwisyi na? Sena tamuyeeyi 19kuti kuzwa muzinkwa zyosanwe ndakasanina bantu bali zyuulu zyosanwe? Kwakazula zisuwo zyabufwefwelenga zyongaye?” Bakaingula bakati, “Kkumi azibili.”
20ALimwi wakati, “Kuzwa kuzinkwa zili ciloba, ndakasanina bantu bali zyuulu zyone, ino mwakazuzya zisuwo zyongaye zyabufwefwelenga?” Bakaingula bati, “Nciloba.”
21Mpoonya Jesu wakabaambila kuti, “Sena tamuna kumvwisisya?”
Jesu wakaponya muntu moofu ku Betesaida
22Lino bakasika kumunzi wa Betesaida. Ooko bantu bamwi bakaleta muntu moofu kuli Jesu, bakamukumbila kuti amugume akumuponya muntu ooyo. 23Mpawo Jesu wakajata moofu ooyo kukuboko wamugwisizya kunze aamunzi. Mpoonya wakamuswida mate mumeso, amane wakamuvumbilila amaanza akumubuzya kuti, “Sena wakonzya kubona cimwi cintu?”
24Moofu naakabbamuna meso wakati, “Ndakonzya kubona bantu beendeenda, pele balangika mbuli misamu.”
25Mpoonya Jesu alimwi wakabikka maanza ameso aamoofu. Ciindi eeci moofu wakalangisya, mboni zyakwe zyakajaluka, wakakonzya kubonesya. 26Jesu wakamulailila kuti, “Koya kuŋanda yako, utajokeli mumunzi ooyu pe.”
Jesu ngo Munanike wa Leza
(Mateyo 16.13-20; Luka 9.18-21)
27Mpoonya Jesu abasikwiiya bakwe bakaya kuminzi yacisi caku Sizaliya Filipi. Munzila wakababuzya kuti, “Amundaambile, ino bantu bandaamba kuti ndime ni?”
28Balo bakati, “Bamwi bakwaamba kuti nduwe Joni Mubbapatizi, bamwi balati uli musinsimi Elija, alimwi bamwi balati uli umwi wabasinsimi.”
29Eelyo wakababuzya kuti, “Ino nywebo, mundaamba kuti ndime ni?” Pita wakaingula kuti, “Nduwe Kilisito, Munanike wa Leza.”
30Ndilyonya Jesu wakabalailila kuti, “Mutaambili muntu naba omwe zyandime.”
Jesu mbwaakaambilizya zyakupenga azyalufu lwakwe
(Mateyo 16.21-28; Luka 9.22-27)
31Lino Jesu wakatalika kwiisya basikwiiya bakwe kuti, “Mwanaa Muntu uleelede kupenga mapenzi mapati, akukakwa abapati babantu, bapaizi basilutwe, abamayi ba Mulawo. Bayoomujaya, pele mubuzuba bwatatu uyoobuka.” 32Makani aaya wakaaamba akwaasalazya kabotu kulimbabo. Amvwe boobo Pita wakatola Jesu kumbali, wakatalika kumukalalila. 33Jesu wakacebuka akulanga kuli basikwiiya bakwe, wakakalalila Pita kuti, “Kozwa aawa Saatani, nkaambo toyeeyi miyeeyo ya Leza, pele yabantu!”
Zyakuyumuna ciingano akutobela Jesu
(Mateyo 16.24-28; Luka 9.23-27; Joni 12.25)
34Nkabela wakaita nkamu yabantu antoomwe abasikwiiya bakwe kulinguwe. Wakabaambila wati, “Kuti naa muntu kayanda kunditobela aliimye, abweze ciingano cakwe, eelyo anditobele. 35Nkaambo kufumbwa uuyandisya buumi bwakwe, uyoobuswekelwa, nkabela ooyo uusweekelwa buumi bwakwe akaambo kandime aka Makani Mabotu, uyoobujana. 36Nkaambo nimpindu nzi njajana muntu wavuba nyika yoonse, kwamana wasweekelwa buumi bwakwe? 37Naa ncinzi muntu ncakonzya kupa kuti anunuzye buumi bwakwe? 38Nkaambo kaako kufumbwa uuusa nsoni akaambo kandime amakani aangu munyika eeyi iizwide bantu batasyomeki basunu, awalo Mwanaa Muntu uyoomukaka ciindi ncatikaboole mubulemu bwawisi antoomwe abangelo basalala.”
Currently Selected:
Maako 8: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
