Maako 9
9
1Jesu wakacili kwaamba kuti, “Ncombeni ndamwaambila kuti mpobali bamwi aano batakooyoofwa kabatanabona bwami bwa Leza kabusika anguzu.”
Ciwa ca Jesu mbucakasanduka
(Mateyo 17.1-13; Luka 9.28-36)
2Naakainda mazuba aali cisambomwe, Jesu wakatola Pita, Jemusi, Joni, batanta acilundu cilamfu. Basikwiiya aabo kabeebelede ciwa ca Jesu cakasanduka caba bumbi. 3Zyakusama zyakwe zyakamweka zyakatuba buu. Taakwe muntu muno munyika uukonzya kuzitubya boobu pe. 4Nkabela basikwiiya aaba bakabona Elija a Mozesi kabakanana a Jesu. 5Pita wakaambila Jesu kuti, “Mufundisi, ncibotu kuti tuli aano. Tulayaka zilawo zyotatwe, cimwi cibe cako, cimwi ca Mozesi, cimwi ca Elija.” 6Pele taakazi ncaakali kwaamba, nkaambo walo abeenzinyina bakaliyoowede.
7Eelyo kwakalibonya kkumbi lyakasika akubavumbilila. Mukkumbi oomo mwakazwa jwi lyakati, “Ooyu ngo Mwanaangu ngwendiyandisisya, amumuswiilile!” 8Basikwiiya nibakacebauka, taakwe aumbi ngobakabona, pele buyo Jesu alikke nguwakali aabo.
9Lino nibakali kuya buseleluka kuzwa mucilundu, Jesu wakalailila basikwiiya aaba kuti, “Eezi nzimwabona mutakaambili muntu naba omwe pe mane kusikila Mwanaa Muntu akabuke kuzwa kubafu.”
10Bakakuswiilila kulailila kwakwe, nikuba boobo bakacili kwaambauzyanya mulicabo kuti, “Ino ooku ‘Kubuka kuzwa kubafu’ caamba nzi?” 11Basikwiiya aaba bakabuzya Jesu, kuti, “Ino bamayi ba Mulawo baambila nzi kuti Elija nguuelede kusaanguna kuboola?”
12Mukubaingula wakati, “Ncobeni Elija nguuelede kusaanguna kuboola kuti abambe zintu zyoonse. Nikuba boobo, ino nkaambo nzi Malembe naaamba kuti Mwanaa Muntu uleelede kupenga kapati akukakwa? 13Ncobeni ndamwaambila kuti Elija wakasika kale, alimwi bantu bakamucita mbuli mbubakayanda beni, mbubona mbuli Malembe mbwaamulungulula.”
Jesu mbwaakaponya sikasuntu
(Mateyo 17.14-21; Luka 9.37-43a)
14Nibakasika kuli basikwiiya bamwi, bakabona nkamu mpati yabantu, kwakali bamayi ba Mulawo bakali kukazyanya abasikwiiya. 15Bantu bacimubona buyo Jesu, bakagambwa kapati, bakazuzaana kulinguwe akumujuzya. 16Jesu wakababuzya basikwiiya bakwe kuti, “Ino mukazyanya nzi abantu aaba?”
17Nkabela umwi mwaalumi wakali munkamu wakavwiila Jesu kuti, “O Mwiiyi, mebo ndaleta mwanaangu kulinduwe. Ooyu mulombe unjidwe muuya mubi nkaako takonzyi kwaambaula. 18Coonse ciindi nuumusikila muuya mubi, ulamusuntusya, ulazwa kkovu kumulomo akuluma ntwino, inga mubili wakwe wayuma ntaa. Ndalibakumbide basikwiiya bako kuti bagwisye muuya mubi ooyu, pele bakakilwa.”
19Jesu wakaingula kuti, “Kaka nywebo nobantu batasyomi! Ino ndikkale ciindi cilamfu cili buti andinywe? Mmupengele ciindi cilamfu cili buti? Amumulete kuno kuli ndime!” 20Eelyo bakamuleta kulinguwe.
Muuya ucibona buyo Jesu wakatalika kumuzengemya mulombe, mpoonya wakawa ansi akwaalabana, watalika kuzwa kkovu kumulomo. 21Jesu wakabuzya wisi mwana kuti, “Ino eezi zyakamutalika lili?”
Wisi wakati, “Kuzwa naakacili mwana muniini. 22Ziindi zinji muuya ooyu wali kusola kumujaya niwakali kumuwisizya mucikko, nimuba mumaanzi. Pele naa kuti kokonzya kucita cimwi cintu, akaka tubede aalubomba, tugwasye!”
23Jesu wakati, “Caamba nzi kwaamba kuti, ‘Kuti kokonzya?’ Nkaambo zintu zyoonse zilakonzeka kumuntu uusyoma Leza.” 24Mpoonya-mpoonya wisi mulombe wakapozomoka akuti, “Ndasyoma, ndigwasye nnzunde kutasyoma kwangu!”
25Jesu naakabona kuti bantu banji baya buswena aawo mpobakabede, wakakalalila muuya mubi kuti, “Yebo omuuya uutamvwisyi, uutaambyi, ndakulailila kuti uzwe mumulombe ooyu, utakanjili limbi mulinguwe!”
26Mpoonya muuya mubi wakakwiila, wakamuzengemya mulombe, eelyo wakazwa mulinguwe. Mulombe wakali kulangika mbuli kuti ulifwide, mane bantu boonse bakatalika kwaamba kuti “Wafwidilila!”
27Jesu wakajata mulombe kujanza akumubusya, wamwiimika.
28Lino Jesu naakanjila muŋanda, basikwiiya bakwe bakamubuzya kumbali bati, “Ino swebo twakacilwa buti kugwisya muuya mubi kuzwa mumulombe?”
29Jesu wakaingula kuti, “Pele kukomba kulikke nkokukonzya kugwisya muuya uuli mbuli ooyu.”
Jesu mbwaakaamba zyalufu lwakwe alimwi
(Mateyo 17.22-23; Luka 9.43b-45)
30Jesu abasikwiiya bakwe nibakazwa ooko, bakainka akwiinda mucisi ca Galilii. Jesu taakwe naakayanda kuti muntu naba omwe azibe nkwaabede, 31nkaambo wakali kwiisya basikwiiya bakwe kuti, “Mwanaa Muntu uyooabwa kubantu bayoomujaya, pele nikuba boobo mumazuba otatwe uyoobuka kuzwa kubafu.”
32Balo taakwe nibakamvwisisya kwiisya ooku, pele bakayoowa kumubuzya.
Nguni mupati mubwami bwakujulu?
(Mateyo 18.1-5; Luka 9.46-48)
33Lino Jesu abasikwiiya bakasika kumunzi wa Kapenaumu, nibakanjila muŋanda, wakababuzya kuti, “Ino mwali kukazyanya nzi munzila?” 34Balo bakaumuna buyo, nkaambo kakuti munzila bakali kuyabukazyanya nkani yakuti ino mupati akati kesu nguni. 35Jesu wakakkala, nkabela wakaita basikwiiya bali kkumi ababili wakati kulimbabo, “Kufumbwa uuyanda kuba mutaanzi akati kanu uleelede kuba musyaalizi, alibikke munsi lyabeenzinyina, ababelekele boonse.” 36Mpoonya wakatola kana kamwi akukaimika akati kabo. Wakakakumbata akuti kulimbabo, 37“Kufumbwa uutambula umwi watwana mbuli aaka muzina lyangu utambula ndime, alimwi kufumbwa uunditambula, tatambuli ndime buyo pe, pele ulatambula ooyo wakandituma.”
Kufumbwa uutatukazyi nguwesu
(Luka 9.49-50)
38Joni wakati kuli Jesu, “O Mwiiyi, twakabona umwi muntu kagwisya myuuya mibi muzina lyako, pele twakamukasya, nkaambo taakali umwi wesu.”
39Jesu wakaingula kuti, “Mutamukasyi pe, nkaambo taakwe muntu uucita milimo yanguzu muzina lyangu uunga ulakonzya kundisandukila akundibisizya kufwambaana. 40Nkaambo kufumbwa uutali sinkondoma uli kulubazu lwesu. 41Amuyeeye eeci! Kufumbwa muntu uumupa maanzi aakunywa akaambo kakuti muli bantu ba Munanike wa Leza, muntu ooyo uyootambula cileleko cakwe ncobeni.
Zilebyo
(Mateyo 18.6-9; Luka 17.1-2)
42“Pele kufumbwa uulebya umwi wabaniini basyoma kuti babisye, inga cabota kuti aangililwe ziyo pati munsingo akubbizigwa mulwizi lulamfu. 43Nkaako kuti naa kuboko kwakulebya kuti ubisye, ukukosole! Nkaambo nkubotu kuti ukanjile mubuumi butamani koli cilema kwiinda kuwaalwa mubbibi lyamulilo uutamani kojisi maboko obilo. 44Mwalo ‘Omo mvunyu zyabo mozitafwi, alimwi mulilo muutazimi.’] 45Alimwi naa cituta cakuulu kwako cakulebya, ucikosole. Inga ncibotu kunjila mubuumi butamani koli cilema kwiinda kuwaalwa mubbibi lyamulilo uutamani kojisi zituta zyobilo. [ 46Mwalo ‘Omo mvunyu zyabo mozitafwi, alimwi mulilo muutazimi.’] 47Alimwi kuti naa liso lyako lyakulebya kuti ubisye, linonkole. Ncibotu kuti ukanjile mubwami bwa Leza acimbolyo, kwiinda kuti ukasowelwe mubbibi lyamulilo uutamani ameso obilo. 48Mwalo ‘Omo mvunyu zyabo mozitafwi, alimwi mulilo muutazimi.’
Zyakusunkwa
49“Nkaambo mbuli cilyo mbocilungwa munyo mbubonya oobo anywebo muyoobotezegwa amulilo wamapenzi! 50Munyo mubotu, pele kuti naa munyo wasampuka, ino inga ulakonzya buti kulunzigwa? Amube amunyo muli ndinywe lwanu, alimwi amukkale muluumuno abeenzinyoko.”
Currently Selected:
Maako 9: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
