Maako 6
6
Jesu mbwaakakakwa ku Nazaleta
(Mateyo 13.53-58; Luka 4.16-30)
1Naakazwa ooko, Jesu wakaya kumunzi wabanamuzyaabo, abalo basikwiiya bakwe bakamuccilila. 2Mu Buzuba bwa Kulyookezya butegwa Sabata wakatalika kwiisya mucikombelo. Mwakali bantu banji, lino nibakamvwa, boonse bakagambwa. Bakali kwaambilana kuti, “Ino muntu ooyu njiisyo eezi wazijana kuli? Ino mbusongo nzi mbwajisi? Mbuti mbwacita milimo iitondezya nguzu eeyi? 3Sena teesi mubezi, mwanaa Maliya, mwanookwabo Jemusi, Jose, Judasi a Saimoni? Tee abalo bacizi bakwe tulaabo.” Aboobo bakamukaka.
4Jesu wakabaambila kuti, “Musinsimi ulalemekwa kuli koonse pele kutali kwabo, kati kaluzubo lwakwe, amumukwasyi wakwe mwini.”
5Taakwe naakacita limbi milimo iitondezya nguzu, ccita buyo kubikka maanza abantu bace bakali kuciswa akubaponya. 6Jesu wakagambwa akaambo kakutasyoma kwabo.
Jesu mbwaakatuma basikwiiya bakwe
(Mateyo 10.5-15; Luka 9.1-6)
Nkabela wakainka kuminzi yoonse yakazingulukide kuya bwiisya bantu.
7Jesu wakabunganya basikwiiya bali kkumi ababili akubatuma bobilo-bobilo, alimwi wakabapa nguzu zyakugwisya myuuya mibi. 8Wakabalailila kuti, “Mutatoleleli cimwi cintu mulweendo lwanu niciba cinkwa, niiba nkomo, naaba mali muzikwama zyanu, pele buyo musako wakweenzya ulikke. 9Musame buyo ndyasyo, pele mutatoleleli cibaki cimbi.” 10Alimwi wakabaambila kuti, “Mwasika mumunzi, mukkale muŋanda mumwatambulwa kabotu kusikila mwaakusiya munzi ooyo. 11Koonse nkobakaka kumutambula naa kumuteelela, mukalikunkumune lusuko kumatende mukazwe. Lusuko lukabe cicenjezyo kulimbabo!”
12Aboobo basikwiiya bakainka kabaya bukambauka makani aakuti bantu beelede kweempa zibi zyabo. 13Bakagwisya myuuya mibi mubantu, alimwi balwazi banji bakali kubananika mafuta akubaponya.
Zyakufwa kwa Joni Mubbapatizi
(Mateyo 14.1-12; Luka 9.7-9)
14Mwami Helodi wakamvwa makani aaya aakali kwaambwa akaambo kampuwo mbotu ya Jesu yakamwaikide koonse-koonse. Bamwi bantu bakati, “Joni Mubbapatizi wabuka kubafu! Ncencico ncacitila zyanguzu eezi.”
15Pele bamwi bakaamba kuti, “Ngu Elija.”
Bamwi bakati, “Musinsimi naa ngumwi uulu mbuli basinsimi bakale-kale.”
16Helodi naakamvwa eezi, wakati, “Ngu Joni Mubbapatizi ngwindakakosozya mutwe, wabuka kuzwa kubafu!” 17Mwami Helodi mwini wakatumide kuti ajatwe Joni aangwe akubikkwa muntolongo. Ncaakaangila Joni nkaambo ka Helodiyasi. Helodiyasi wakali muka Filipo mwanookwabo mwami Helodi, nikuba boobo Helodi wakakwata Helodiyasi. 18Nkaako Joni Mubbapatizi wakaambila Helodi kuti, “Tuuli mulawo kuti yebo ukwate mukamunyoko!”
19Nkaako Helodiyasi wakaba aankoto a Joni mane wakali kuyanda kuti amujaye, pele cakamukacila kucita oobo nkaambo ka Helodi. 20Helodi wakali kuyoowa Joni nkaambo wakalizi kuti Joni wakali mululami uusalala, nkaambo kaako wakamukwabilila. Helodi wakalikuyandisya kumvwa Joni, nikuba kuti wakali kupenzegwa mumoyo lyoonse naakamumvwa.
21Bumwi buzuba Helodiyasi wakamulya Joni coolwe. Cakacitika boobu, Helodi naakapanga pobwe lyakubotelwa buzuba bwakuzyalwa kwakwe, wakatamba bapati boonse babulelo bwakwe, bapati balumamba, abapati babuleya baku Galilii. 22Mwana musimbi wa Helodiyasi wakanjila mobakali kulida pobwe akubazyanina. Kuzyana kwakwe kwakabotezya boonse basipobwe. Eelyo mwami Helodi wakaambila musimbi kuti, “Uyanda nzi? Ndilakupa kufumbwa ncoyanda.” 23Helodi wakakonkezya kuti, “Kufumbwa ncotindikumbile ndakupa, niciba cisela canyika yangu!”
24Musimbi wakainka kuyoobuzya banyina kuti, “Ino ndikakumbile nzi?”
Banyina bakati, “Ukaambe mutwe wa Joni Mubbapatizi.”
25Nkabela musimbi wakafwambaana kupiluka kumwami kuyooamba kuti, “Ndiyanda kuti undipe ndilyonya lino mutwe wa Joni Mubbapatizi mumutiba.”
26Mpawo mwami wakausa, pele taakacili kukonzya kukaka akaambo kakuti wakalikonkezezye kumbele lyabeenzu boonse bakazide kupobwe. 27Mpoonya mwami wakafwambaana kutuma umwi mulindizi wantolongo kuyoomukosola mutwe. Eelyo mulindizi ooyo wakamukosola mutwe. 28Wakaletela musimbi mutwe wa Joni mumutiba, walo wakaakuupa banyina. 29Lino basikwiiya ba Joni nibakamvwa lufu lwakwe, bakasika kuzoobweza mutumba akuyoouzikka.
Jesu mbwaakasanina bantu banji
(Mateyo 14.13-21; Luka 9.10-17; Joni 6.1-14)
30Nibakajokela batumwa bakaswaana a Jesu akumwaambila zyoonse nzyobakacita akwiisya. 31Bantu banji-banji bakali kuunka akupiluka, cakuti basikwiiya tiibakakonzya kujana ciindi cakulya. Nkaako Jesu wakabaambila kuti, “Atweende kubusena nkotuyooba tolikke tukalyookezye aasyoonto.” 32Bakanjila mubwato akuunka kubusena buliibide.
33Pele bantu banji bakababona nibakainka akubaziba kuti mbambabo, bantu bakanyamuka kuzwa muminzi yoonse kabaya buzuzaana, baakusika kubusena oobo Jesu abasikwiiya bakwe kabatana sika. 34Jesu naakazwa mubwato, wakabona bantu banji-banji, mpoonya wakeetela akaambo kabo, nkaambo bakali mbuli mbelele zitakwe mweembezi. Wakatalika kubaiisya zintu zinji. 35Zuba nilyakaba aafwiifwi kubbila, basikwiiya bakaboola kulinguwe akwaamba kuti, “Ciindi camana, alimwi kuno nkuusokwe. 36Baambile bantu bainke muminzi amutunzi tulaafwiifwi kuti bakalyuulile zyakulya.”
37Jesu wakati, “Amubape cakulya nywebo.”
Basikwiiya bakabuzya kuti, “Sena uyanda kuti tuunke tukaule zinkwa zyamali aali myaanda yobilo tubasanine?”
38Jesu wakababuzya kuti, “Mujisi zinkwa zyongaye? Kamuya, mukabone.” Bazibe buyo, bakati, “Nzisanu answi zyobilo.”
39Mpoonya Jesu wakaambila basikwiiya bakwe kuti bakkazike bantu muzibunga-zibunga mumweemvwe. 40Bakabakkazika mbubonya oobo. Bakakkala muzibunga zyamyaanda alimwi amuzibunga zyamakumi osanwe. 41Jesu wakabweza zinkwa zyosanwe answi zyobilo, walungumana kujulu, walumba Leza amane wazikomona akupa basikwiiya kuti baabanye bantu, azyalo nswi zyobilo bakabaabanya mbubonya. 42Lino boonse bakalya bakkuta. 43Basikwiiya bakabwezelela bufwefwelenga bwazinkwa abwanswi bwakalekwa, bakazuzya zisuwo zili kkumi azibili. 44Lino mubantu bakalya mwakali baalumi bakali zyuulu zyosanwe.
Jesu mbwaakeenda amaanzi
(Mateyo 14.22-23; Joni 6.15-21)
45Ndilyonya Jesu wakalailila basikwiiya kuti banjile mubwato, basolole kuya mutala lwizi kumunzi wa Betesaida, walo wakacaala kalayana abantu. 46Naakamana kubalaya, wakaya kucilundu kuyookomba. 47Nikwakaba kulubundu-bundu, bwato bwakali akati kalwizi, pele walo wakali alikke kutala. 48Jesu wakabona kuti basikwiiya bakwe bakali mumapenzi aakukwasula bwato, nkaambo guwo lyakali kubbubbwida kulimbabo. Akati kabusiku, Jesu wakaza kulimbabo keenda amaanzi. Wakatibaindilile. 49Nibakamubona keenda amaanzi, bakakwemba kabayeeya kuti musangu. 50Nkaambo boonse nibakamubona, bakayoowa.
Mpoonya Jesu wakabaambila kuti, “Amukkazike myoyo! Ndime. Mutayoowi!” 51Lino wakanjila mubwato mubakabede. Mpoonya guwo lyakaumuna. Basikwiiya bakagambwa kapati. 52Taakwe nibakamvwisisya zyamaleele aazinkwa zyakasaninwa bantu bali zyuulu zyosanwe nkaambo kakutasyoma kwabo.
Jesu mbwaakaponya balwazi ku Jenesaleti
(Mateyo 14.34-36)
53Lino nibakazubuka lwizi bakasika kucisi ca Jenesaleti, mpawo bakaangilila bwato. 54Bacizwa buyo mubwato, bantu bakaindilila kuziba Jesu. 55Bakaindingana mucisi eeco coonse, bakatalika kubweza balwazi akubatola nkubakamumvwida kuti nkwabede. 56Nkabela moonse mwaakali kuya bwiinda mbuli muminzi, muminzi mipati, nikuba muzitungu bantu bakatola balwazi babo kumasambalilo akumukumbila kuti bagume nuuba moombe wacisani cakwe. Eelyo boonse bakaguma bakaponyezegwa.
Currently Selected:
Maako 6: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
