Maako 5
5
Jesu mbwaakaponya muntu wakanjidwe myuuya mibi
(Mateyo 8.28-34; Luka 8.26-39)
1Nibakazubuka lwizi lwamucisi ca Galilii, bakasika kucisi ca Bagelasini, 2Jesu naakazwa mubwato, wakaswaanwa amuntu wakazwida kuzyuumbwe. 3Muntu wakanjidwe myuuya mibi alimwi wakali kukkala kunamaumbwe. Kaatakwe wakali kukonzya kumwaanga nketani pe. 4Nkaambo kanji-kanji naakali kwaangwa kumaulu akumaboko, lyoonse wakali kuzibbansaula nketani akutyoloola nsimbi nzyaakaangidwe kumaulu. Wakalijisi nguzu zinji cakuti taakwe wakali kukonzya kumubombya. 5Masiku asikati wakali kunga nkweendeenda kunamaumbwe amumalundu kaya boompolola akulinengaula amabwe.
6Eelyo naakabona Jesu kacili alaale, wakamuzuzaanina akuliwaala kumbele lyakwe, 7wakoompolola ajwi pati wakati, “Yebo Jesu, Mwanaa Leza, Sijulu lyamajulu! Uyanda kundicita nzi? Akaka ndakomba muzina lya Leza, utandipenzyi!” 8Muuya mubi ooyo wakaamba boobo nkaambo Jesu wakamwaambilide kuti, “Omuuya mubi, kozwa mumuntu ooyu!” 9Mpawo Jesu wakamubuzya kuti, “Ino nduweni zina lyako?” Wakavwiila kuti, “Ndime ‘Makamu’ nkaambo tuli banji-banji!” 10Muuya mubi mumwaalumi ooyu wakacili kumukombelezya Jesu kuti myuuya mibi ataitandili kumbi kuzwa mucisi eeco.
11Mubusena oobo mwakali butanga bwangulube aafwiifwi, bwakali kucela munsi aamalundu. 12Myuuya mibi yakakombelezya Jesu yati, “Tutandile kungulube tukanjile nzizyo.” 13Jesu wakiizumizya. Aboobo myuuya mibi yakazwa mumuntu ooyo yakanjila mungulube. Butanga boonse bwakali zyuulu zyobilo, bwakazuza bwakakunkulukila mujelele lyalwizi, bwakadumpukila mumaanzi, bwaloba.
14Beembezi bangulube bakatija akuyoomwaya makani mumunzi amutunzi. Bantu bakainka kukubona eeco cakacitika. 15Nibakasika kuli Jesu, bakabona mwaalumi ooyo kusaanguna wakanjidwe myuuya mibi ulikkede kasamide kabotu, wakali kulilemeka cabuntu, nkabela boonse bakayoowa. 16Aabo bakalibonena bakaambila bantu cakacitika kumwaalumi wakajisi wamyuuya mibi uulya, amakani aangulube. 17Lino bakatalika kukumbila Jesu kuti azwe mucisi cabo. 18Jesu naakanjila mubwato, mwaalumi wakagwisigwa myuuya mibi wakamukumbila wati, “Ndizumizye kuti ngunke anduwe!”
19Pele Jesu wakamukasya. Wakamwaambila kuti, “Koya kumunzi, kumukwasyi wako, ukabaambile zigambya nzyaakucitila Mwami Leza, ambwaakufwida luzyalo!”
20Aboobo muntu ooyo wakaya akwiinda mucisi citegwa Minzi iili kkumi, uya bwaamba ncaakamucitila Jesu. Nkabela bantu boonse nibakamumvwa bakagambwa.
Mwana musimbi wa Jailosi amukaintu wakaguma cisani ca Jesu
(Mateyo 9.18-26; Luka 8.40-56)
21Lino Jesu wakapiluka alimwi mutala lwizi. Naakasika nkamu mpati yabantu yakamubunganina ankomwe yalwizi. 22Lino Jailosi, mweendelezi wacikombelo, wakasika, naakabona Jesu, wakamuvuntamina. 23Wamukombelezya canguzu kuti, “Mwanaangu musimbi ulaciswa kapati. Akaka ndakomba uboole uzoobikke maanza aako alinguwe, kutegwa apone, abe kabotu.”
24Mpoonya aawo Jesu wakainka anguwe. Nkabela kwakamutobela bantu banji mane bakali kuya bumusyaanikizya koonse-koonse.
25Lino kwakali mukaintu wakali kuciswa kalobola, kakamupenzya kwamyaka iili kkumi aibili. 26Nikuba kuti basilisi banji bakalisolekede kumusilika, awalo mwini kamanizizye lubono lwakwe loonse mukusilikwa ooku, pele bulwazi bwakali kuya bwiindilila kubija lyoonse. 27Wakaliimvwide mpuwo ya Jesu, eelyo wakamuccilila munkamu. 28Mukaintu wakati mumoyo wakwe, “Naa ndaguma buyo cisani cakwe ndapona.”
29Wakaguma cisani ca Jesu, mpoonya aawo bulowa bwakaleka kuzwa, alimwi wakalimvwa mumubili kuti wapona ncobeni. 30Awalo Jesu wakalimvwa kuti nguzu zimwi zyazwa mulinguwe. Aboobo wakacebaukila bantu bakamusyaanikizizye wakati, “Ino nguni waguma cisani cangu?”
31Basikwiiya bakwe bakati kulinguwe, “Ino kobuzya buya kuti nguni wakuguma, oobwene bantu mbobakusyaanikizizye?”
32Pele Jesu wakacili kulangaula kuti abone ooyo wakamuguma. 33Mukaintu wakaciziba cakacitika kulinguwe, wakasika kayoowede akutuntuma, wamuvuntamina, akumwaambila makani oonse mubwini. 34Jesu wakati kulinguwe, “Baama, lusyomo lwako lwakuponya. Koya muluumuno, upone kubulwazi bwako.”
35Jesu naakacili kwaamba boobo Jesu, kwakasika basikutumwa bakazwida kuŋanda ya Jailosi kuti, “Mwanaako wafwa kale. Ino ucimukatazizya nzi Mwiiyi?”
36Pele Jesu taakabikka miyeeyo kuli eezyo nzyobakaamba, wakaambila Jailosi kuti, “Utayoowi pe, kosyoma muli Leza.” 37Taakwe naba omwe ngwaakazumizya kuunka aawe, ccita buyo Pita, Jemusi amwanookwabo Joni. 38Nibakasika kuŋanda yamweendelezi wacikombelo, Jesu wakabona kunyongana akumvwa koomoka akulila. 39Wakanjila, wakati kubantu, “Nkaambo nzi ncomwiilingana akulila boobu? Mwana tafwide, uloona!”
40Nibakamvwa oobo, boonse bakamuseka, mpawo wakabatandila anze. Wakatola buyo wisi, banyina mwana, abasikwiiya bakwe botatwe banjila muŋanda mwakalede mutumba wamwana. 41Wakajata janza lyamusimbi akwaamba kuti, “Talita, kkumi,” nkokwamba kuti, “Musimbi! ndakwaambila kuti, buka!”
42Ndilyonya wakabuka akunyamuka, watalika kwiimaima. (Musimbi ooyo wakajisi myaka iili kkumi aibili.) Bantu bakakankamana kapati. 43Nicakacitika eeci wakabalailisisya kuti bataambili muntu naba omwe, akuti musimbi bamupe cilyo alye.
Currently Selected:
Maako 5: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
