Maako 4

Cikozyanyo casikuminza

(Mateyo 13.1-9; Luka 8.4-8)

1Alimwi Jesu wakatalika kwiisya kumbali aalwizi lwaku Galilii. Bantu bakamubunganina bakali banji kapati, cakuti wakanjila mubwato bwakali mumaanzi kumbali aankomwe, akukkala mulimbubo. Bantu boonse bakaliimvwi ankomwe yalwizi. 2Wakabaiisya zintu zinji muzikozyanyo. Mukwiisya kwakwe wakati kulimbabo.

3“Amuswiilile, muntu umwi wakainka kuyoominza maila mumuunda wakwe. 4Lino naakali kuminza, zimwi mbuto zyakawida munzila nkabela bayuni bakaboola akuzilya. 5Zimwi zyakawida avu lyakavumbide bbwe. Mukuti kwakanyina vu linji, cakufwambaana zyakamena. 6Pele zuba nilyakabala zyakapusama, akufwa, nkaambo tiizyakanasimpisya miyanda. 7Zimwi zyakawida mumamvwa, mamvwa naakakomena akaziyasa akuzifundilizya, nkabela tiizyakazyala micelo. 8Zimwi zyakawida muvu bbotu, zyalo zyakamena, kukomena akuzyala kabotu. Zimwi zyakavuzyanya akuba makumi otatwe, zimwi makumi aali cisambomwe, azimwi mwaanda.”

9Mpawo Jesu wakati, “Ooyo ulaamatwi amvwisye!”

Bupanduluzi bwazikozyanyo

(Mateyo 13.10-17; Luka 8.9-10)

10Bantu banji nibakamwaika, basikwiiya bali kkumi ababili abantu bamwi bakacaala, bakasika bamukumbila Jesu kuti abapandulwide zikozyanyo eezi ncozyaamba. 11Wakabaambila kuti, “Nywebo mulipedwe luzibo lwa zyamaseseke aabwami bwa Leza. Pele aabo bacili anze tabakonzyi kumvwa zintu zyoonse ccita zyaambwa muzikozyanyo. 12Nikuba kuti,

‘Balabona, pele tababonesesyi,

nikuba kuti balamvwa, pele tabamvwisisyi.

Nkaambo nibali kubonesesya a kumvwisisya,

nobanga basandukila kuli Leza,

awalo nokunga wabalekelela.’”

Bupanduluzi bwini-bwini bwacikozyanyo casikuminza

(Mateyo 13.18-23; Luka 8.11-15)

13Alimwi Jesu wakababuzya wati, “Sena tamumvwisisyi cikozyanyo eeci? Ino inga mwamvwa buti cikozyanyo niciba cili buti? 14Sikuminza mmuntu uukanana majwi aa Leza. 15Mbuto yakawida munzila mbantu banga mbubaamvwa buyo majwi aa Leza, Saatani wasika, mpoonya-mpoonya waagwisya kuzwa mumyoyo yabo. 16Bamwi bantu balikozyenye ambuto yakawida avu livumbide abbwe. Nibamvwa majwi, cakufwambaana baatambula akukondwa. 17Nikuba boobo tabajisi miyanda mulimbabo, mbayumu kwakaindi kaniini, pele ciindi makatazyo alimwi amapenzi naabasikila akaambo kakucita zyaamba majwi aaya inga ndilyonya balebwa. 18Alimwi bantu bamwi bali mbuli mbuto zyakawida mumamvwa. Aaba mbabaabo banga majwi baamvwa akwaatambula kabotu-kabotu, 19pele nkaambo kakuyeeyesya zyamunyika abuvubi, eezi zilasyanikizya majwi mumyoyo yabo. Aboobo tabazyali micelo. 20Pele mbuto yakawida muvu bbotu mbabaabo banga bamvwa majwi aa Leza akwaabamba, nkaako balazyala micelo cakuvuzyanya, bamwi ziindi zili makumi otatwe, bamwi ziindi zili makumi aali cisambomwe, abamwi ziindi zili mwaanda.”

Ilambe kunsi lyacisuwo

(Luka 8.16-18)

21Jesu wakacili kwaamba wati, “Sena kuli muntu uunga waleta lambe akulivunika kunsi lyacisuwo nikuba kulibikka mujungusi lyabulo? Tee kayi inga talibikki mpolikonzya kupa mumuni kuli boonse? 22Kufumbwa cintu cisisidwe ciyoosisululwa acalo coonse civumbidwe ciyoovumbululwa. 23Aboobo amuswiilile naa mulaamatwi aakumvwisya!”

24Alimwi Jesu wakati kulimbabo, “Amucenjele, muteenwi! Nkaambo myeelwe njomubelesya mukweelekela bamwi njenjiyo njayoobelesya Leza mukweelekela ndinywe, mane walo uyooiyungizya kwiindilila. 25Ooyo uujisi uyooyungizizilwa, pele uujisi kasyoonto uyoonyangwa koonse nkajisi nikaceya.”

Cikozyanyo cambuto

26Alimwi Jesu wakacili kwaamba wati, “Bwami bwa Leza buli mbuli muntu uuminza mbuto mumuunda wakwe. 27Masiku uloona eelyo ulabuka nibuca, ciindi coonse eeci mbuto zilamena akukomena. Pele mukamwini tazi mbozimena nikuba kukomena. 28Mbuto zilamena kuzwa mubulongo, zilakomena akuzyala micelo, kusaanguna busonga kumena, musule cisiko amatu kumamanino kulazwa kkunka amaila. 29Lino maila naasima muntu ulabweza cigonsyo cakwe ulatalika kwaagonka, nkaambo ciindi cakutebula casika.”

Cikozyanyo cakaseke kamasitadi

(Mateyo 13.31-32, 34; Luka 13.18-19)

30Jesu wakati, “Ino inga bwami bwa Leza twabukozyanisya mbuli nzi? Inga twapa ceezyanyisyo nzi cikonzya kubupandulula kabotu? 31Buli mbuli kaseke kamasitadi kalo kali nkaseke kaniini kwiindilila munyika. Pele muntu nakasyanga mumuunda, 32kalakomena kwiinda zisyango zyoonse akuba cisamu, bayuni balayaka ziteente mumitabi yaco.”

33Mukukambauka kwakwe kubantu, Jesu wakabelesya zikozyanyo zinji zili mbuli eezi nzyobakali kukonzya kumvwisisya. 34Taakwe naakaiisya buyo katabelesyi zikozyanyo, ccita buyo naakali alikke abasikwiiya bakwe, ndendilyo naakali kuzipandulula zintu zyoonse kulimbabo.

Jesu mbwaakaumuzya guwo

(Mateyo 8.23-27; Luka 8.22-25)

35Kumangolezya aabuzuba oobo mbubonya Jesu wakati kuli basikwiiya bakwe, “Atuzubukile mutala eliya lyalwizi.” 36Nkabela nibakasiya nkamu yabantu, basikwiiya bakanjila mubwato oobo Jesu mwaakanjide kale, bainka awalo. Aambi mato akaliwo abusena oobo akainka aawe. 37Lino kwakatalika kubbubbula guwo, cakuti mayuwe akali kunjila mubwato akuyanda kubuzuzya, 38Jesu wakali kusule lyabwato. Wakali koona kalitulisye mutwe acilitulisyo. Nkabela basikwiiya bakwe bakamubusya bati, “O Mwiiyi, totubwene kuti tuyanda kufwa?”

39Jesu naakasinsimuka wakakalalila guwo, “Umuna!” Alimwi wakati kumayuwe, “Batama!” Mpoonya aawo lyakaleka kubbubbula, alimwi lwizi lwakabatama. 40Jesu wakati kuli basikwiiya, “Muyoowa nzi? Sena ambuli sunu tamunasyoma?”

41Pele balo bakaliyoowede kapati, bakatalika kubuzyanya kuti, “Ino ooyu muntu uuli buti? Uunga guwo amayuwe zilamuswiilila.”

Currently Selected:

Maako 4: Tonga96

Highlight

Copy