Maako 3

Jesu mbwaakaponya muntu wakapuutide janza

(Mateyo 12.9-14; Luka 6.6-11)

1Alimwi wakanjila mucikombelo ca Bajuda, oomo mwakali muntu wakapuutide janza. 2Oomo mwakali bamwi bantu bakali kuyanda kumujanina Jesu kaambo, nkaambo kaako bakamulangisisya kuti babone naa ulaponya muntu mu Buzuba bwa Kulyookezya butegwa Sabata. 3Jesu wakaambila muntu wakapuutide janza kuti, “Koza kuno kumbele.” 4Mpoonya wakabuzya bantu kuti, “Ino Mulawo wesu utuzumizya kucita nzi mu Buzuba bwa Sabata? Kugwasya naa kunyonyoona muntu? Kufutula buumi bwamuntu, naa kumujaya?”

Balo bakaumuna buyo. 5Lino naakabalangisisya cabukali, wakausa akaambo kabusicinguni bwabo, wakaambila ooyo muntu kuti, “Vungununa janza lyako.” Naakalivungununa lyakaba kabotu. 6Nkabela Bafalisi bakazwa mucikombelo baakuli bunga-bunga abankamu yamwami Helodi kutegwa bajane nzila yakujaya Jesu.

Inkamu yabantu kulwizi

7Jesu antoomwe abasikwiiya bakwe bakainka kunkomwe yalwizi lwa Galilii. Nkabela kwakamutobela bantu banji kapati, bazwa mucisi ca Galilii, mucisi ca Judiya, 8mu Jelusalemu, mucisi ca Idumeya, mutala lyamulonga wa Jolodani amuminzi ya Taya a Sidoni. Bantu aaba bakasika kuli Jesu nibakamvwa zintu zigambya nzyaakali buya bucita.

9Akaambo kakuvula kwabantu, Jesu wakaambila basikwiiya bakwe kuti bamubambile bwato, kutegwa bantu batamusyaanikizyi. 10Mukuti wakaponya bantu banji balwazi bakatonkana kuti bamugume. 11Abalo bakanjidwe myuuya mibi nibakamubona bakaliwaala ansi kumbele lyakwe akupozomoka kuti, “Nduwe Mwanaa Leza.”

12Jesu wakakalalila myuuya mibi kuti itamuyubununi.

Jesu mbwaakasala basikwiiya bali ikkumi ababili

(Mateyo 10.1-4; Luka 6.12-16)

13Lino Jesu wakatanta acilundu akwiita baalumi mbaakaliyandila. Bakaboola kulinguwe, 14nkabela wakasala bali kkumi ababili, mbaakaita kuti mbatumwa bakwe. Wakabaambila kuti, “Ndamusala nywebo kuti kamweenda andime lyoonse, alimwi ndiyoomutuma kuti mukakambauke. 15Muyoopegwa nguzu zyakugwisya myuuya mibi mubantu.”

16Mbaaba bali kkumi ababili mbaakasala: Saimoni, (Jesu ngwaakaulika kuti Pita), 17Jemusi mwanookwabo Joni, bana ba Zebedii (balo mbaakaulika kuti Bowanejesi, nkokuti bantu bali mbuli muzumo), 18Andulu, Filipo, Baatolomeyo, a Mateyo, a Tomasi, a Jemusi, mwana wa Alufayusi, Tadeyusi, Saimoni, wakali munkutwe, 19a Judasi Isikaliyoti, wakamwaaba.

Zya Jesu a Belizebule

(Mateyo 12.22-32; Luka 11.14-23; 12.10)

20Abweede buyo kumunzi alimwi, bantu banji bakamubunganina cakuti Jesu abasikwiiya bakwe bakabula ciindi cakulya. 21Bamukwasyi wakwe nibakamvwa boobo bakainka kuti bakamujate, nkaambo bamwi bakali kwaamba kuti, “Wasondoka!”

22Abalo bamayi ba Mulawo bamwi bakazwida ku Jelusalemu bakati, “Unjidwe Belizebule, mwami wamyuuya mibi!” Bamwi bakati, “Mwami wamyuuya mibi nguumupa nguzu zyakwiigwisya.”

23Mpawo Jesu wakaita bantu akubaambila muzikozyanyo kuti, “Ino Saatani inga wamugwisya buti Saatani? 24Kuti cisi calyaandaanya muzipaanzi mpoonya catalika kulilwanya lwaco, cisi eeco, cilawa. 25Kuti mukwasyi walyaandaanya muzipaanzi akutalika kulilwana, ooyo mukwasyi ulooleka. 26Kuti bulelo bwa Saatani bwalyaandaanya mutukamu, tabukookkala, bulooleka akumana.

27“Taakwe muntu uukonzya kunjila muŋanda yasinguzu akumunyanga lubono, ccita asaangune kumwaanga singuzu ooyo, mpaanga ulakonzya kumunyanga zyoonse zili muŋanda yakwe.

28“Amuciyeeye eeci! Nkasimpe bantu balakonzya kulekelelwa zibi zyoonse nzyobacita nikuba zyakusampaula Leza. 29Pele muntu ooyo uyoosampaula Muuya Uusalala takooyoolekelelwa, nkaambo wacita mulandu uutalekelelwi.” 30Ncaakambila oobo Jesu nkaambo bamwi bakati, “Unjidwe muuya mubi.”

Bamukowa wakwe Jesu

(Mateyo 12.46-50; Luka 8.19-21)

31Lino banyina ababunyina bakasika. Bakaima anze, batuma muntu kuti amwiite. 32Nkabela Jesu wakakkede abantu banji bakamwaambila kuti, “Mbabaya banyoko abanabokwanu anze, balakwiita.”

33Jesu wakavuwa kuti, “Ino banga baba baama mbaani? Abalo banga baba banabokwesu mbaani?” 34Mpawo wakalanga baabo bakakkede munsi lyakwe wakati, “Tee baama abana bokwesu mbaaba! 35Nkaambo ooyo uucita ziyanda Taata ngomwanookwesu, ngomucizi wangu, mbabaama.”

Currently Selected:

Maako 3: Tonga96

Highlight

Copy