Maako 2
2
Jesu mbwaakaponya muntu uuyuminide mubili
(Mateyo 9.1-8; Luka 5.17-26)
1Nikwakainda mazuba masyoonto, Jesu wakapiluka kumunzi wa Kapenaumu, mpuwo yakamwaika kuti wakasika kwabo. 2Bantu banji bakayoboloka ooko, ŋanda yakazula mane bamwi bakaata. Jesu wakabakambaukila Makani Mabotu. 3Naakacili kwaambaula, kwakasika bantu bakamweetela muntu mulema, wakatembedwe abaalumi bone. 4Akaambo kakuvula kwabantu, bakajana kuti cakali ciyumu kusika aafwiifwi a Jesu. Eelyo bakadonkola ciluli kululamika aawo aakakkede Jesu. Bakalengelezya macila aakalede mulwazi. 5Jesu naakabona lusyomo lwabo, wakaambila yooyo wakali mulema kuti, “Mwanaangu, walekelelwa zinyonyoono zyako.”
6Bamwi bamayi ba Mulawo bakaliwo aawo, bakatalika kulibuzya-buzya mumyoyo kuti, 7“Nkaambo nzi muntu ooyu ncasampaula Leza boobu? Taakwe muntu buyo uukonzya kulekelela zinyoonyoono zyabantu ccita Leza alikke.” 8Pele Jesu wakaziba ncibakali kuyeeya wakati, “Nkaambo nzi nomuyeeya zintu zili boobu? 9Ncili citete, kwaamba kumuntu ooyu kuti ‘Walekelelwa zinyonyoono zyako,’ naa kwaamba kuti, ‘Nyamuka, ubweze macila aako enda?’ 10Pele ono kuti muzibe kuti Mwanaa Muntu ulijisi nguzu munyika zyakulekelela zinyonyoono.” Jesu wakati kumwaalumi wakalemene 11kuti, “Nyamuka, bweza macila uye kuŋanda yako!”
12Bantu boonse kabalangilila wakabweza macila aakwe wakafwambaana wainka. Lino boonse bakakankamana balumbaizya Leza bati, “Tatuna cibwene cili boobu.”
Jesu mbwaakaita Levi
(Mateyo 9.9-13; Luka 5.27-32)
13Jesu wakainka alimwi kunkomwe yalwizi lwa Galilii. Nkabela bantu banji bakamubunganina, mpawo wakatalika kubaiisya. 14Naakali kuya bweenda, wakabona Levi simutelo, mwana wa Alufayusi, kakkede amulimo wakwe. Jesu wakamwaambila kuti, “Nditobele.” Eelyo Levi wakanyamuka akumutobela.
15Nkabela Jesu abasikwiiya bakwe bakalya muŋanda ya Levi, antoomwe abasimutelo abatakali kubamba milawo ya Mozesi. Nkaambo bunji bwabo bakamutobela. 16Lino bamwi bamayi ba Mulawo, bakali bankamu yaba Bafalisi, nibakabona kuti Jesu ulalya abantu aabo, bakabuzya basikwiiya bakwe bati, “Ino nkaambo nzi ncalidaamwi abali boobu?”
17Jesu naakamvwa boobo, wakabavuwa kuti, “Teensi baabo baumi bayanda musilisi, ccita aabo baciswa. Mebo ndakazida aabo mbomuyeeya kuti mbaasizinyonyoono, tiindakazida aabo balulami pe.”
Mbubakabuzya zyakuliimya kulya
(Mateyo 9.14-17; Luka 5.33-39)
18Ciindi cimwi basikwiiya ba Joni Mubbapatizi a Bafalisi bakali kuliimya kulya. Nkaako bantu bamwi bakasika kuli Jesu bakamubuzya bati, “Nkaambo nzi basikwiiya ba Joni Mubbapatizi aba Bafalisi balaliimya kulya kakuli basikwiiya bako tabaliimyi?”
19Mukwiingula Jesu wakababuzya mubuzyo wakati, “Sena inga beenzinyina sibwiinga balakonzya kuliimya kulya kuti sibwiinga kacili ambabo? Pe, tabakonzyi! Sibwiinga nacili ambabo tabakonzyi kucita boobo. 20Peepe, nikuba boobo ciyoosika ciindi basinkondonyina nibayoomutola sibwiinga, ndendilyo beenzinyina nibayooliimya kulya mukuusa.
21“Taakwe muntu uusuma cigamba cacisani citana fwinyana kucisani cakaindi, nkaambo kuti wacita oobo inga cigamba eeco cafwiinyana cilamonkola cisani cakaindi, eelyo ciyookomezya cimonko kwiindilila. 22Alimwi taakwe muntu uunga watila waini mupya munkomo zyamakutu zyakabeleka kale pe. Nkaambo ulaandula nkomo eezyo. Mpoonya nkomo zilanyoonyooka, alimwi waini ulasoomokela ansi. Tee kayi waini mupya utilwa munkomo mpya!”
Makani aa Buzuba bwa Kulyookezya butegwa Sabata
(Mateyo 12.1-8; Luka 6.1-5)
23Bumwi Buzuba bwa Kulyookezya butegwa Sabata Jesu wakainda akati kamyuunda yamaila, abalo basikwiiya bakwe bakali anguwe. Mpawo basikwiiya bakatalika kupulula makunka aamaila balya. 24Nkaako Bafalisi bakati kuli Jesu, “Bona, tacizumizigwi a Mulawo kuti basikwiiya bako kabacita boobu mu Buzuba bwa Sabata!”
25Jesu wakati kulimbabo, “Sena tiimwakabala Devedi mbwaakacita ciindi walo abaabo mbaakalaabo nibakafwa nzala? 26Bakanjila muŋanda ya Leza bakalya cinkwa cacituulo kuli Leza. Eeci cakacitika ciindi Abiyata naakali ngomupaizi mupati. Lino kwiindila mu Mulawo wesu bapaizi balikke mbabazumizigwa kulya cinkwa eeci, pele Devedi wakacilya akucaabana abaabo mbaakalaabo.”
27Jesu wakabaambila kuti, “Buzuba bwa Sabata bwakaanzilwa kuti bumugwasye muntu, muntu taakalengelwa Buzuba bwa Sabata. 28Aboobo Mwanaa Muntu ngo Mwami wa Buzuba nibuba bwa Sabata.”
Currently Selected:
Maako 2: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
