Mateyo 17

Ciwa ca Jesu mbucakasanduka acilundu

(Maako 9.2-13; Luka 9.28-36)

1Nkabela naakainda mazuba aali cisambomwe Jesu wakainka a Pita a babunyina bobilo Jemusi a Joni batanta cilundu cilamfu. 2Mpoonya aawo ciwa cakwe cakasanduka. Busyu bwakwe bwakabala mbuli zuba, azyalo zyakusama zyakwe zyakatuba bu. 3Mpawo basikwiiya baya bakabona Mozesi a Elija kabakanana a Jesu. 4Abone boobo Pita wakati kuli Jesu, “O Mwami, ncibotu kuti tuli aano! Kuti naa koyanda, ndilayaka zilawo zyotatwe aano. Cimwi cibe cako, cimwi cibe ca Mozesi, cimwi cibe ca Elija.” 5Kacaambaula kkumbi libala lyakabavumbilila, eelyo kwakamvwigwa mukkumbi eelyo jwi kaliti, “Ngooyu Mwanaangu ngweyandisisya mulinguwe mwenkondwa. Amumuswiilile!” 6Ciindi basikwiiya nibakabona eeci, bakayoowa kapati nkabela bakawa cakuvuntama. 7Pele Jesu wakasika akubaguma wati, “Amubuke mutayoowi.” 8Nkabela nibakalungumana bakabona kuti kwakanyina muntu uumbi pele Jesu alikke.

9Lino nibakali kuseluka kuzwa acilundu, Jesu wakabalaililisya kuti, “Eezi nzimwabona mutakaambili muntu naba omwe pe, mane kusikila Mwanaa Muntu akabusigwe kuzwa kubafu.” 10Basikwiiya bakamubuzya kuti, “Ino kayi bamayi ba Mulawo baambila nzi kuti Elija nguuelede kusaanguna kuboola?” 11Wakaingula kuti, “Ncobeni nguuelede kusaanguna Elija kuboola kuti abambe zintu zyoonse. 12Pele ndamwaambila kuti wakasika kale nkabela taakwe nibakamuziba, pele bakamucita mbuli mbubakali kuyanda. Mbuboobo awalo Mwanaa Muntu mbwayoopenzegwa ambabo.” 13Eelyo basikwiiya bakamvwa kuti wakali kubaambila makani a Joni Mubbapatizi.

Jesu mbwaakaponya sikasuntu

(Maako 9.14-29; Luka 9.37-43a)

14Lino nibakasika kwakali bantu banji, umwi muntu wakaza kulinguwe wakamufugamina wati, 15“O Mwami, mufwide lubomba mwanaangu, nkaambo ngusikasuntu alimwi ulapenzegwa kapati. Kanji-kanji ulawida mumulilo, amumaanzi. 16Ndakali muletede kuli basikwiiya bako kuti bamuponye pele cakabakakila kumuponya.” 17Mpawo Jesu wakati, “Akaka nywebo nobantu batasyomi basicinguni, ino ndikkale ciindi cilamfu cili buti andinywe? Ino mmupengele ciindi cilamfu cili buti? Amumulete kuno kulindime.” 18Mpawo Jesu wakakalalila muuya mubi wakali kusuntusya mulombe ooyo, mpoonya wakazwa mulinguwe. Eelyo mulombe wakapona ciindi eeco nciconya. 19Basikwiiya bakamubuzya kumbali bati, “Ino swebo twakakacilwa buti kuugwisya?” 20Wakati kulimbabo, “Nkaambo lusyomo lwanu nduniini. Ncobeni ndamwaambila kuti, kuti kamujisi lusyomo luli mbuli nseke yamasitadi, mulakonzya kwaambila cilundu eeci kuti, ‘Zyuka aawa uyookuya,’ nkabela cilainka ncobeni. Taakwe cikonzya kumwaalila pe. 21Pele muuya mubi wamusyobo ooyu taakwe bumbi mbuugwisigwa, ccita kwiindila mukukomba akuliimya kulya.”

Jesu mbwaakaamba zyalufu lwakwe alimwi

(Maako 9.30-32; Luka 9.43b-45)

22Lino basikwiiya nibakabungene mu Galilii, Jesu wakati kulimbabo, “Mwanaa Muntu uyooabwa kubantu. 23Bayoomujaya. Pele uyoobusigwa mubuzuba bwatatu.” Bamvwe boobo basikwiiya bakausa kapati.

Jesu mbwaakatela mutelo waŋanda ya Leza

24Lino nibakasika ku Kapenaumu, basikutezya mutelo waŋanda ya Leza bakaya kuli Pita akuti kulinguwe, “Sena mwiiyi wanu ulatela?” 25Walo wakati, “Iiyi.” Nkabela Pita naakanjila muŋanda, Jesu wakaambaula kusaanguna kulinguwe wakati, “Uyeeya nzi Saimoni? Nkuulini bami baansi nkobatezya mutelo? Sena nkuubantu babo antela kubeenzu?” 26Pita wakaingula kuti, “Nkuubeenzu!” Jesu wakamwaambila kuti, “Caamba kuti bantu babo tabeelede kutela.” 27Pele kuti tutaubausyi basikutezya aaba koya kulwizi ukalobole. Nswi iiyoocegwa kusaanguna ukayaasamune, uyoojana mali, ukaatole ukanditelele mebo alwako.

Currently Selected:

Mateyo 17: Tonga96

Highlight

Copy