Mateyo 18

Nguni mupati mubwami bwa kujulu?

(Maako 9.33-37; Luka 9.46-48)

1Ciindi eeco nciconya basikwiiya bakasika kuli Jesu akuti, “Ino nguni mupati mubwami bwakujulu?” 2Jesu wakaita kana, wakakaimika akati kabo 3wati, “Ncobeni ndamwaambila kuti mwataba mbuli twana, tamukooyoonjila mubwami bwakujulu. 4Kufumbwa uulibombya mbuli kana aaka, ngonguwe ngomupati mubwami bwakujulu. 5Alimwi kufumbwa uutambula kana mbuli aaka muzina lyangu utambula ndime.

Zilebyo

(Maako 9.42-48; Luka 17.1-2)

6“Pele kufumbwa uulebya umwi wabaniini basyoma kuti babisye, inga cabota kuti waangililwa ziyo pati munsingo akubbizigwa mumaanzi malamfu aalwizi. 7Maawe kubantu baansi aano akaambo kabaabo balebya beenzinyina kuti babisye! Iiyi zilebyo nkozili, pele maawe kuli ooyo muntu uuleta zilebyo! 8Kuti naa kuboko naa kuulu kwako kwakulebya kuti ubisye kukosole, ukusowe, nkaambo nkubotu kuti unjile mubuumi butamani kokosokede kwiinda kuti ukasowelwe mumulilo uutazimi kojisi maboko naa maulu obilo. 9Alimwi kuti naa liso lyako lyakulebya kuti ubisye, linonkole ulisowe, nkaambo nkubotu kuti unjile mubuumi butamani koli sicimbolyo kwiinda kusowelwa mumulilo uutamani ameso obilo.

Cikozyanyo cambelele yakasweekede

(Luka 15.3-7)

10“Amubone kuti tamusampauli umwi wabana baniini aaba, nkaambo ncobeni ndamwaambila kuti bangelo babo nkobali kuli Taata uuli kujulu. 11Nkaambo Mwanaa Muntu wakaboola kufutula aabo basweekede.] 12Lino muyeeya buti? Kuti naa muntu kajisi mbelele zili mwaanda, nkabela imwi yazyo yasweeka, sena takonzyi kusiya eezyo zili makumi aali fuka afuka muzilundu akuyooyandaula eeyo iisweekede? 13Nkabela kuti naa waijana, ncobeni ndamwaambila ulakondwa akaambo kanjiyo kwiinda eezyo zili makumi aali fuka afuka zyatasweekede. 14Aboobo Taata uuli kujulu tayandi umwi wabana baniini aaba kuti afwidilile.

Mbotweelede kucita bakwesu nobatubisizya

15“Kuti naa munyoko wakubisizya koya ukamwaambile kaambo kakwe. Mukaambaule kamuli nyobilo buyo. Kuti naa wakuswiilila mulamvwana. 16Pele kuti naa taswiilili, uye ubweze muntu omwe naa bobilo kuti makani oonse akosolwe akati kabakamboni bobilo naa botatwe. 17Kuti naa wakaka kubaswiilila abalo, ambila mbungano ya Leza. Kuti naa wakaka kuswiilila nikuba kumbungano, akubede buyo mbuli wakunze naa mbuli simutelo.

18“Ncobeni ndamwaambila kuti kufumbwa ncomutikaange ansi aano akujulu ciyooangwa. Alimwi kufumbwa eeco ncomutikaangunune ansi aano akujulu ciyooangununwa. 19Alimwi ndamwaambila kuti naa bantu bobilo bazuminana ansi aano akaambo kaceeco ncebakumbila, Taata uuli kujulu ulabacitila. 20Nkaambo ooko bantu bobilo naa botatwe nkobabungene muzina lyangu, ambebo mpendi akati kabo.”

Cikozyanyo camubelesi watakalekelela mweenzinyina

21Mpoonya Pita wakati kulinguwe, “Mwami, naa mukwesu ulandibisizya ino mmulekelele ziindi zyongaye? Sena ziindi zili ciloba?” 22Jesu wakati kulinguwe, “Kutali buyo ziindi zili ciloba, pele kusikila ziindi zili ciloba zivuzigwe aziindi zili makumi aali ciloba.

23“Lino bwami bwakujulu buli mbuli mwami wakaita babelesi bakwe kuti bapilusye zikoloto kulinguwe. 24Naakatalika kubasesa, umwi wakakolotede mali manji-manji wakaletwa kulinguwe. 25Pele nkaambo kakuti taakajisi cakubbadela, mwami wakwe wakalailila kuti auzigwe antoomwe amukaintu wakwe, abana azyoonse eezyo nzyaakajisi kuti mulandu umane. 26Amvwe boobo mubelesi ooyu wakafugamina mwami wakwe, wakamulomba kuti, ‘Ndeengelele, ndilakuboozezya zyoonse.’ 27Lino mwami wamubebelesi ooyo wakamufwida lubomba wakamulekelela cikoloto wamwaambila kuti ainke.

28“Pele ooyo mubelesi nguwenya naakainka, wakasika kumubelesinyina wakakolotede mali masyoonto buyo. Wakamujata wamusina wati, ‘Bbadela eeco ncookakolota!’ 29Amvwe boobo mubelesinyina wakamufugamina akumukumbila kuti ‘Ndeengelele, ndilakuboozezya!’ 30Pele walo wakakaka wakamutola akuyoomwaanga muntolongo mane kusikila akabbadele mulandu. 31Lino babelesinyina nibakabona cakacitika, bakausa kapati, mpawo bakaa kwaamba makani aaya kumwami wabo. 32Mpoonya mwami wakwe wakamwiita wati, ‘Yebo omubelesi mubi! Ndakakulekelela mulandu oonse uulya nkaambo kakuti wakandikumbila. 33Sena yebo toelede kufwida lubomba mubelesinyoko, mbuli ndime mbundakakufwida lubomba?’ 34Aboobo mukunyema mwami wakwe wakamutumya kuli basintolongo kuti akaangwe mane do akabbadele mulandu woonse. 35Mbuboobo awalo Taata uuli kujulu mbwayoocitila kufumbwa wanu uutalekeleli munyina amoyo woonse.”

Currently Selected:

Mateyo 18: Tonga96

Highlight

Copy