Mateyo 19

Makani aakuleka bakaintu

(Maako 10.1-12)

1Lino Jesu naakamana kwaamba majwi aaya, wakazwa ku Galilii, wakaya mucisi ca Judiya mutala lya Jolodani. 2Makamu aabantu akamutobela, nkabela wakabaponya nkukonya ooko.

3Mpawo Bafalisi bakasika kulinguwe bamusunka bati, “Sena muntu uleelede kuleka mukaintu wakwe mukaambo kali koonse?” 4Walo wakaingula kuti, “Sena tiimwakabala kuti kumalengelo mulengi wakalenga mwaalumi a mukaintu? 5Akuti, ‘Nkaambo kaako mwaalumi uyoosiya wisi abanyina akukakatila mukaintu wakwe. Nkabela bobilo aaba balaba mubili omwe.’ 6Tabacili babili, baba omwe. Aboobo aabo Leza mbaakaswaanganya kutabi muntu uubaandaanya.” 7Bafalisi bakati kulinguwe, “Ino nkaambo nzi Mozesi ncaakalailila kuti mwaalumi ape mukaintu wakwe lugwalo lwakumuleka, mpoonya amuleke?” 8Jesu wakati kulimbabo, “Nkaambo kabuzangi bwanu Mozesi ncaakamuzumizya kuleka bakaintu banu, pele kuzwa kumalengelo teensi mbocakabede oobo pe. 9Lino ndamwaambila kuti kufumbwa ooyo uuleka mukaintu wakwe, watalalikwa akukwata uumbi, walalika.”

10Kumane boobo basikwiiya bakati kulinguwe, “Kuti naa makani amwaalumi amukaintu ali boobo takweelede kukwata.” 11Jesu wakati kulimbabo, “Takuli kuti bantu boonse baliimvwisya nkani eeyi pe, pele aabo Leza mbagwasya. 12Nkaambo nkobali bamwi batakonzyi kukwata nkaambo mbubakazyalwa. Alimwi nkobali bamwi batakonzyi kukwata nkaambo bakacitwa boobo abantu. Alimwi nkobali bamwi bakalilesya kukwata kuti babelekele Leza. Ooyo uukonzya kumvwa eeci amvwisye.”

Jesu mbwaakaleleka bana

(Maako 10.13-16; Luka 18.15-17)

13Lino bamwi bantu bakaleta bana babo kuli Jesu kuti abaampe amaanza akubakombela. Basikwiiya bakwe bakakalalila bantu aabo. 14Pele Jesu wakati, “Amubaleke bana baze kulindime. Alimwi mutabakasyi pe, nkaambo bwami bwakujulu mbubwabo bali boobu.” 15Eelyo wakabaampa amaanza. Amane wakatozya kumbi.

Mulombwana muvubi

(Maako 10.17-31; Luka 18.18-30)

16Lino kwakasika umwi mulombwana kuli Jesu wakati, “Mwiiyi, ncintu nzi cibotu ncenjelede kucita kuti nkanjile mubuumi butamani?” 17Mpawo wakati kulinguwe, “Ino nkaambo nzi ncondibuzya kuti ncicili cibotu? Mubotu ngumwi buyo. Kuti naa koyanda kuyoonjila mubuumi butamani tobela milawo yakwe.” 18Walo wakabuzya kuti, “Milawo nzi?” Jesu wakati, “Utajayi, utaciti bumambe, utabbi, utabejelezyi umwi kaambo, 19lemeka uso abanyoko, alimwi koyanda mweenzinyoko mbubonya mboliyanda omwini.” 20Ooyo mulombwana wakati, “Eeyi yoonse ndaibamba. Lino kwasyaala nzi?”

21Jesu wakamwiingula kuti, “Kuti koyanda kuba uulondokede, koya ukauzye zyoonse nzyojisi. Mali aazyo upe bacete. Nkabela uyoojana buvubi kujulu. Omana ukaboole uzoonditobele.” 22Mulombwana ooyu naakamvwa boobo wakainka kauside kapati, nkaambo wakajisi lubono lunji.

23Jesu wakati kuli basikwiiya bakwe, “Ncobeni ndamwaambila kuti nciyumu kumuntu muvubi kunjila mubwami bwakujulu. 24Ncitete kunkamela kunjila mukapulo kanyeleti kwiinda mbocibede kumuvubi kuti anjile mubwami bwa Leza.” 25Basikwiiya nibakamvwa boobo bakagambwa kapati bakati, “Mwati kuyooba uyoofutuka buya?” 26Jesu wakabalanga wati, “Kubantu eeci tacikonzeki, pele kuli Leza zintu zyoonse zilakonzeka.” 27Eelyo Pita wakaingula kuti, “Langa, twakasiya zyoonse twakatobela nduwe, ino swebo tuyoopegwa nzi?” 28Jesu wakati kulimbabo, “Ncobeni ndamwaambila kuti mubulengi bupya ciindi Mwanaa Muntu nayookkala acuuno cakwe cabulemu, anywebo nomunditobela muyookkala azyuuno zili kkumi azibili zyabwami. Akubeteka misyobo iili kkumi aibili ya Isilayeli. 29Nkabela kufumbwa wakasiya munzi nibaba babunyina, nibaba bacizi, naba wisi, nibaba banyina, nibaba bana, niiba myuunda akaambo kandime, uyootambula zinji-zinji kwiinda eezyo nzyaakasiya, uyookona buumi butamani. 30Pele banji bataanzi, bayooba basyaalizi, basyaalizi bayooba bataanzi.

Currently Selected:

Mateyo 19: Tonga96

Highlight

Copy